ഇലക്ട്രിക്ക് സ്കൂട്ടറുകള്ക്ക് നിരോധം ഏര്പ്പെടുത്തി ഫ്രാന്സിന്റെ തലസ്ഥാനമായ പാരീസ്. ഇവിടെ വാടക ഇലക്ട്രിക്ക് സ്കൂട്ടറുകളാണ് നിരോധിച്ചത്. പാരീസ് തെരുവുകളില് നിന്ന് ഇലക്ട്രിക് സ്കൂട്ടറുകള് നിരോധിക്കാന് നടത്തിയ ജനഹിതപരിശോധനയില് പാരീസിലെ ഭൂരിപക്ഷം ജനങ്ങളും വോട്ട് ചെയ്തുവെന്നാണ് റിപ്പോര്ട്ട്. പാരീസിലെ 20 ജില്ലകളില് പൊതുകൂടിയാലോചന ബില്ലിനു വേണ്ടി നടത്തിയ ജനഹിതപരിശോധനയില് 85.77 ശതമാനം മുതല് 91.77 ശതമാനം വരെ വോട്ടുകള് രേഖപ്പെടുത്തി.
പാരീസില് ഇ-സ്കൂട്ടറുകള് നിമിത്തം ആളുകള് കൊല്ലപ്പെടുകയും പരിക്കേല്ക്കുകയും ചെയ്യുന്ന സാഹചര്യത്തിലാണ് ഇവ നിരോധിക്കണമോ വേണ്ടയോ എന്ന കാര്യത്തില് ജനഹിതപരിശോധന നടത്തിയത്. പാരീസ് വൈദ്യുത വാഹനങ്ങള് ആദ്യമായി സ്വീകരിച്ച നഗരങ്ങളിലൊന്നായാണ് അറിയപ്പെടുന്നത്. എന്നാല് ഇവ ഗുണത്തേക്കാളേറെ ദോഷമാണ് ഉണ്ടാക്കുന്നതെന്നാണ് വിമര്ശകര് വാദിക്കുന്നത്.
യുവാക്കള്ക്കിടയില്, ഇലക്ട്രിക്ക് ഇരുചക്ര വാഹനങ്ങള്ക്ക് ജനപ്രീതി വര്ധിച്ചപ്പോള് അപകടങ്ങളുടെ എണ്ണവും ക്രമാതീതമായി വര്ധിച്ചു. 2022 ലെ കണക്കുകള് പ്രകാരം പാരീസിലെ ഇ-സ്കൂട്ടര് അപകടങ്ങളില് മൂന്ന് പേര് മരിക്കുകയും 459 പേര്ക്ക് പരിക്കേല്ക്കുകയും ചെയ്തിട്ടുണ്ട്. 2021-ല് ഫ്രാന്സില് സ്കൂട്ടര് അപകടങ്ങളില് , പാരീസില് ഒരാള് ഉള്പ്പെടെ 24 പേര് മരിച്ചിരുന്നു. കഴിഞ്ഞ വര്ഷം ഇ-സ്കൂട്ടറുകളള് നിമിത്തമുണ്ടായത് 459 അപകടങ്ങളാണ്.. ഇതില് മൂന്ന് മാരകമായ അപകടങ്ങളും ഉള്പ്പെടുന്നു. .
നഗരത്തില് പലരും സ്കൂട്ടറുകള് ഓടിക്കുന്ന രീതിയെക്കുറിച്ച് വര്ദ്ധിച്ചുവരുന്ന ആശങ്ക നിലനില്ക്കുന്നുണ്ട്. ഇലക്ട്രിക്ക് സ്കൂട്ടറുകളുടെ അമിതവേഗം മൂലം കാല്നട യാത്രികര് പലപ്പോഴും ഭീതിയിലാണ്. റൈഡര്മാര് പലപ്പോഴും ഹെല്മറ്റ് ധരിക്കാറില്ല. മാത്രമല്ല 12 വയസ് പ്രായമുള്ള കുട്ടികള്ക്ക് പോലും പാരീസില് ഇലക്ട്രിക്ക് സ്കൂട്ടറുകള് നിയമപരമായി വാടകയ്ക്ക് എടുക്കാന് അനുമതി നല്കിയിട്ടുണ്ട്.
തുടര്ന്നാണ് പാരീസ് മേയറായ ആനി ഹിഡാല്ഗോ ജനഹിത പരിശോധന നടത്താന് റഫറണ്ടം വിളിച്ചത്. പാരീസിലെ സോഷ്യലിസ്റ്റ് മേയറായ ആനി ഹിഡാല്ഗോ സൈക്ലിംഗും ബൈക്ക് ഷെയറിംഗും പ്രോത്സാഹിപ്പിച്ചിരുന്നു വ്യക്തിയായിരുന്നു. എങ്കിലും ഇ-സ്കൂട്ടറുകള് നിരോധിക്കുന്നതിനെ അവരും പിന്തുണച്ചു. ജനഹിത പരിശോധനയില് വോട്ടര്മാര്ക്ക് ഇ-സ്കൂട്ടറുകള്ക്ക് അനുകൂലമായോ പ്രതികൂലമായോ വോട്ട് ചെയ്യാന് ഇവര് അവസരമൊരുക്കി. എന്നാല് സ്വകാര്യ ഉടമസ്ഥതയിലുള്ള വാഹനങ്ങള് വോട്ടെടുപ്പിന്റെ ഭാഗമായിരുന്നില്ല. ഔദ്യോഗിക കണക്കുകള് പ്രകാരം നഗരത്തിലെ ഇലക്ടറല് രജിസ്റ്ററിലെ 1.38 ദശലക്ഷം ആളുകളില് 103,000 പേര് മാത്രമാണ് പങ്കെടുത്തത്. ഇതില് 91,300 പേര് സ്കൂട്ടറുകള്ക്കെതിരെ വോട്ട് ചെയ്തു.
