രണ്ടരവയസ്സുകാരിയെ ക്രൂരമായി കൊലപ്പെടുത്തിയ കേസില് രണ്ടാനച്ഛന് പിടിയിലായി. മയക്കുമരുന്നിന് അടിമയായ യുവാവ് അതിക്രൂരമായാണ് കുഞ്ഞിനെ കൊലപ്പെടുത്തിയത്. അമ്മയുടെ കാമുകനായ കൈല് ബെവന്റെ അക്രമത്തില് ലോല ജെയിംസ് ആണ് ഹാവര്ഫോര്ഡ്വെസ്സിലെ വീട്ടില് വച്ച് കൊല്ലപ്പെട്ടത്. പരിക്കേറ്റ ശേഷം നാലു ദിവസങ്ങള് കഴിഞ്ഞാണ് കുഞ്ഞ് മരിക്കുന്നത്. ലോലയുടെ അമ്മയുമായി താമസം തുടങ്ങി നാല് മാസത്തിന് ശേഷമാണ് ഇയാള് ഈ ക്രൂരത കാണിച്ചത്.
2020 ലാണ് നാടിനെ നടുക്കിയ സംഭവം ഉണ്ടാകുന്നത്. വീട്ടിലുള്ള നായയ്ക്ക് പിന്നാലെ ഓടവേ കുട്ടി സ്റ്റെയറില് നിന്നും വീണതാണ് എന്നായിരുന്നു ഇയാള് ആദ്യം പറഞ്ഞിരുന്നത്. എന്നാല്, ഇപ്പോള് സ്വാന്സീ ക്രൗണ് കോടതിയിലെ ജൂറിയാണ് 31 -കാരനായ ഇയാളെ കൊലക്കുറ്റത്തിന് വിചാരണ ചെയ്യുന്നത്. ലോലയുടെ അമ്മ സിനേഡ് ജെയിംസ് അവളുടെ മരണത്തിന് കാരണക്കാരിയായില്ലെങ്കിലും കുറ്റക്കാരിയാണ് എന്ന് കണ്ടെത്തി. നേരത്തെ തന്നെ ഗാര്ഹിക പീഡനത്തിന് ഇരയായിട്ടുള്ള സിനേഡിന് തന്റെ കുട്ടിയുടെ സുരക്ഷ ഉറപ്പാക്കാന് സാധിച്ചില്ല എന്നും കുഞ്ഞിനെ ക്രൂരനായ രണ്ടാനച്ഛനില് നിന്നും രക്ഷിക്കാന് സാധിച്ചില്ല എന്നും കോടതി നിരീക്ഷിച്ചു. കാറപടത്തില് പരിക്കേല്ക്കുന്നതിന് സമാനമായിരുന്നു കുഞ്ഞിന്റെ പരിക്കുകള് എന്നാണ് കോടതി കണ്ടെത്തിയത്.
ഏകദേശം 101 ഓളം പരിക്കുകളാണ് കുഞ്ഞിന്റെ ശരീരത്തില് ഉണ്ടായിരുന്നത്. കുഞ്ഞിനെ ആശുപത്രിയില് എത്തിക്കാനോ ആംബുലന്സ് വിളിക്കാനോ ഇയാള് ശ്രമിച്ചില്ല. ഇതിനിടയില് പരിക്കേറ്റ കുഞ്ഞിന്റെ വീഡിയോയും ഇയാള് ചിത്രീകരിച്ചു. ഏപ്രില് 25 നാണ് ഇയാള്ക്കും ലോലയുടെ മാതാവിനും എതിരെ കോടതി ശിക്ഷ വിധിക്കുന്നത്.
