ന്യൂഡല്ഹി: കുപ്രസിദ്ധ ഗുണ്ടാതലവന് സുനില് ടില്ലു ടാജ്പുരിയയെ ഡല്ഹി തീഹാര്ജയിലിനുള്ളിലിട്ട് കുത്തിയത് 100 പ്രാവശ്യം. സംഭവത്തിന്റെ ഞെട്ടിപ്പിക്കുന്ന ജയിലിനുള്ളില് നിന്നുള്ള സിസിടിവി ദൃശ്യങ്ങള് ദേശീയ മാധ്യമങ്ങള് പുറത്തുവിട്ടിട്ടുണ്ട്. എതിര് ഗ്യാംഗിലെ ആള്ക്കാര് ചേര്ന്ന് ടില്ലുവിനെ മുറിയില് നിന്നും വലിച്ചിറക്കിക്കൊണ്ടുവരുന്നതും കുത്തുന്നതുമെല്ലാം ദൃശ്യങ്ങളിലുണ്ട്.
യോഗേഷ് ടണ്ടയും മറ്റ് തടവുകാരും ചേര്ന്നാണ് ടില്ലുവിനെ കുത്തുന്നത്. യോഗേഷ് ടണ്ട, ദീപക് ടീറ്റര്, റിയാസ് ഖാന്, രാജേഷ് ബവാനിയ എന്നിവരെ അറസ്റ്റ് ചെയ്യാനും ചോദ്യം ചെയ്യാനും പോലീസ് കോടതിയോട് അനുവാദം തേടിയിട്ടുണ്ട്. മുറിക്കുള്ളിലിട്ടും പുറത്ത് കൊണ്ടുവന്നും എഴുന്നേല്ക്കാന് പോലുമാകാതെ വളഞ്ഞിട്ടു ചലനം നിലയ്ക്കുന്നത് വരെ ഇവര് കുത്തുന്നത് ദൃശ്യത്തിലുണ്ട്. സംഭവത്തിന്റെ 2.49 മിനിറ്റ് ദൈര്ഘ്യം വരുന്ന വീഡിയോ ക്ലിപ്പില് സിനിമയെ വെല്ലുന്ന രംഗങ്ങളാണ് ഉള്ളത്.
ബെഡ്ഷീറ്റ് ഉപയോഗിച്ച് മുകളില് നിന്നും താഴത്തെ നിലയിലേക്ക് രണ്ടുപേര് ചാടുന്നു. പിന്നാലെ ടണ്ടാ ആദ്യം ടാജ്പുരിയയുടെ ബാരക്കിന്റെ ഗേറ്റിലേക്ക് അടുക്കുന്നത് കാണാം. ഒരു കറുത്ത ടി ഷര്ട്ടും ചുവപ്പ് ഷോര്ട്ട്സും ധരിച്ച് ടീറ്റ പിന്നാലെയെത്തുന്നു. വെളുത്ത വസ്ത്രം ധരിച്ച ഗ്യാംഗ് ലീഡര് മഞ്ജീത് മഹല് ഇതിനിടെ ബവാനിയെ പിടിച്ചു നിര്ത്താന് ശ്രമിക്കുന്നുണ്ട്. എന്നാല് പരാജയപ്പെടുന്നു. തുടര്ന്ന് ആക്രമണത്തിനായി ഖാനൊപ്പം ബവാനിയും ചേരുന്നു.
അക്രമികളെ കണ്ട് തന്റെ സെല്ലിന്റെ ഗേറ്റ് വലിച്ചടയ്ക്കാന് ടാജ്പുരിയ ശ്രമിക്കുന്നുണ്ട്. ഇതിനിടയില് ഇയാളുടെ കൈകള്ക്ക് കുത്തേല്ക്കുന്നു. തുടര്ന്ന് ഗേറ്റിലെ പിടുത്തം വിടുവിച്ച് ടാജ്പുരിയയെ നടുത്തളത്തിന്റെ അരികിലേക്ക് വലിച്ചുകൊണ്ടുവന്ന് നാലുപേരും ചേര്ന്ന് കുത്തിക്കൊല്ലുന്നു. ടാജ്പുരിയയെ ജയില് അധികൃതര് ആശുപത്രിയില് എത്തിച്ചെങ്കിലും ഇതിനകം അയാള് മരണപ്പെട്ടിരുന്നു. ടില്ലുവിന്റെയും ഗോജിയുടെയും ഗ്യാംഗുകളെ എതിര്വശങ്ങളിലെ സെല്ലുകളിലായിട്ടായിരുന്നു പാര്പ്പിച്ചിരുന്നത്. ഇരുമ്പ് അഴികളിട്ട സെല്ലുമായിരുന്നു. ഇതിന്റെ രണ്ടു ഗ്രില്ലുകള് അറുത്തുമാറ്റിയാണ് അക്രമികള് വെളിയില് എത്തിയതെന്നാണ് അധികൃതര് നല്കുന്ന വിശദീകരണം.
2021 ലെ രോഹിണി കോര്ട്ട് ഷൂട്ടൗട്ട് കേസ് പ്രതിയാണ് ടാജ്പുരിയ. കേസ് ഡല്ഹിപോലീസിലെ സ്പെഷ്യല് സെല്ലിന് കൈമാറിയിട്ടുണ്ട്. ടാജ്പുരിയ ഗ്യാംഗ് ഈ നാലു പേരെയും ആക്രമിക്കാതിരിക്കാന് വീഡിയോ കോണ്ഫറന്സ് വഴിയുള്ള കോടതി നടപടികളാണ് ഉദ്ദേശിക്കുന്നത്. കൃത്യം നടന്ന സ്ഥലത്ത് ഉണ്ടായിരുന്ന തമിഴ്നാട് സ്പെഷ്യല് പോലീസ് ഉദ്യോഗസ്ഥരെയും തീഹാര് ജയില് ഗാര്ഡുകളെയും ചോദ്യം ചെയ്യുമെന്ന് സ്പെഷ്യല് സെല് ഉദ്യോഗസ്ഥര് പറയുന്നു. കൊലപാതകത്തില് ജയിലിനുള്ളില് നിന്നും ഉള്പ്പെട്ടിട്ടുണ്ടോ എന്നാണ് പ്രധാനമായും നോക്കുന്നത്.
കേസിലെ പ്രധാന സാക്ഷി രോഹിത് എന്ന തടവുകാരനാണ്. ഇയാള്ക്കും പരിക്കേറ്റിട്ടുണ്ട്. ഇയാളുടെ മൊഴിയും രേഖപ്പെടുത്തി. ഗോഗിയുടേയും ടാജ്പുരിയയുടെയും ഗ്യാംഗിന്റെയും അവരില് എത്രപേര് ജയിലില് ഉണ്ടെന്നതുമടക്കമുള്ള വിവരങ്ങളും ശേഖരിക്കുന്നുണ്ട്. സംഭവത്തിന്റെ പശ്ചാത്തലത്തില് ഗ്യാംഗ് അംഗങ്ങളെ പരസ്പരം കാണാന് കഴിയാത്ത വിധം സെല്ലുകളിലേക്ക് മാറ്റാനുള്ള നീക്കമാണ് ജയില് അധികൃതര് നടത്തിക്കൊണ്ടിരിക്കുന്നത്.
