നര്ക്കോട്ടിക് കണ്ട്രോള് ബ്യൂറോ കൊച്ചിയില് പിടികൂടിയ രാസലഹരി പാക്കിസ്താനിലെ ഹാജി സലീം മാഫിയ സംഘത്തിന്റേതെന്ന് സ്ഥീരികരിച്ചു. ലഹരി കടത്തിന് പിന്നില് കൂടുതല് രാജ്യാന്തര സംഘങ്ങള്ക്കും പങ്കുണ്ടെന്നാണ് എന്സിബി സൂപ്രണ്ട് നല്കുന്ന വിവരം. പാക്കിസ്ഥാന്റേതെന്ന് സൂചിപ്പിക്കുന്ന അടയാളങ്ങള് ലഹരി പാക്കറ്റുകളിലുണ്ട്.
15,000 കോടി രൂപ വില വരുന്ന രാസ ലഹരി പാക്കിസ്ഥാന് കാരനായ ഹാജി സലീമിന്റെ നേതൃത്വത്തിലുള്ള മാഫിയ സംഘത്തിന്റേതെന്നാണ് സ്ഥിരീകരിച്ചിരിക്കുന്നത്. കടല് വഴി പാക്കിസ്ഥാന്, അഫ്ഗാനിസ്ഥാന് എന്നിവിടങ്ങളില് നിന്ന് വലിയതോതില് ലഹരിമരുന്ന് മറ്റിടങ്ങളിലേക്ക് കടത്തുന്ന സംഘമാണ് ഹാജി സലീമിന്റേത്. ഇയാള്ക്ക് മറ്റ് രാജ്യാന്തര റാക്കറ്റുകളുടെ സഹായം ലഹരി മരുന്നു കടത്താന് ലഭിച്ചിട്ടുണ്ടെന്നാണ് വിവരം. നര്ക്കോട്ടിക്ക് കണ്ട്രോള് ബ്യൂറോ ഈ സംഘങ്ങളെ കുറിച്ചും അന്വേഷണം ആരംഭിച്ചിട്ടുണ്ട്.
നാവികസേനയുടെ ഹെലികോപ്റ്ററും കപ്പലും പിന്തുടരുന്നത് അറിഞ്ഞതോടെ ലഹരി എത്തിക്കാന് ഉപയോഗിച്ച കപ്പല് ലഹരി കടത്ത് സംഘം കടലില് മുക്കുകയായിരുന്നു. കപ്പലില് ഉണ്ടായിരുന്ന ചിലര് രക്ഷപ്പെട്ടതായി സംശയം ഉണ്ട്. കേസില് പിടിയിലായ പാക്കിസ്ഥാന് സ്വദേശിയെ അന്വേഷണസംഘം വിശദമായി ചോദ്യം ചെയ്ത് വരികയാണ്.
