നടനെന്നതിലുപരി നര്ത്തകനായി പ്രേക്ഷകമനസ്സില് നിറഞ്ഞു നില്ക്കുന്ന താരമാണ് വിനീത്. വിനീതെന്ന പേരില് പല പ്രശസ്തരും മലയാളത്തിലുണ്ടെങ്കിലും അതിനൊക്കെ മുമ്പ് മലയാള സിനിമയില് ഇടം പിടിച്ചയാളാണ് വിനീത്. നന്നേ ചെറുപ്പത്തില് തന്നെ പ്രഗല്ഭരായ ഫിലിം മേക്കേര്സിനൊപ്പം പ്രവര്ത്തിക്കാന് വിനീതിന് കഴിഞ്ഞു. ഐവി ശശിയുടെ ഇടങ്ങളില് എന്ന സിനിമയിലൂടെയാണ് വിനീത് അഭിനയ രംഗത്തേക്ക് കടന്ന് വരുന്നത്. രണ്ടാമത്തെ ചിത്രം ഹരിഹരന്റെ നഖക്ഷതങ്ങളാണ്. ഏറെ പ്രേക്ഷക പ്രീതി നേടാന് ഈ സിനിമയിലൂടെ വിനീതിന് കഴിഞ്ഞു. തുടര്ന്ന് നായകവേഷത്തില് മാത്രമല്ല സഹനടനായും വില്ലനായി പോലും വിനീത് നിറഞ്ഞു നിന്നു. നിരവധി വേദികളില് ക്ലാസിക്കല് ഡാന്സും അവതരിപ്പിച്ച താരം മലയാളത്തെ പോലെ തന്നെ തമിഴ് തെലുങ്ക് സിനിമകളിലും സജീവമായിരുന്നു. കാതല് ദേശം, ചന്ദ്രമുഖി തുടങ്ങിയവ വിനീതിന്റെ ഹിറ്റ് തമിഴ് സിനിമകളാണ്. മലയാള ചിത്രം മണിച്ചിത്രത്താഴിന്റെ റീമേക്കായിരുന്നു ചന്ദ്രമുഖി. മലയാളത്തില് ഡോ. ശ്രീധര് ശ്രീരാം ചെയ്ത രാമനാഥന് എന്ന കഥാപാത്രമാണ് തമിഴില് വിനീത് ചെയ്തത്. യഥാര്ത്ഥത്തില് മണിച്ചിത്രത്താഴില് രാമനാഥനായി എത്തേണ്ടിയിരുന്നത് വിനീതായിരുന്നു. ഇപ്പോഴിതാ ഒരു ഓണ്ലൈന് മീഡിയയ്ക്ക് നല്കിയ അഭിമുഖത്തില് വിനീത് പറയുന്നു.
‘‘ഒരു സിനിമ കമ്മിറ്റ് ചെയ്ത് കഴിഞ്ഞാല് എത്ര ചെറിയ പടം ആണെങ്കിലും അതിനൊരു പ്രയോരിറ്റി ഉണ്ട്. അന്നും എന്നും അതിന് മൂല്യമുണ്ട്. ഡേറ്റ് അഡ്ജസ്റ്റ് ചെയ്യാന് പറ്റുമോ എന്ന് കമിറ്റ് ചെയതവരോട് ചോദിക്കാം. അങ്ങനെ എന്റെ കാര്യത്തില് ഒരുപാട് സംഭവിച്ചിട്ടുണ്ട്. പക്ഷേ മണിച്ചിത്രത്താഴ് ഒരു നിവൃത്തിയും ഇല്ലായിരുന്നു. സുരേഷേട്ടന്റെയും ലാലേട്ടന്റെയും ഡേറ്റുകളില് പാച്ചിക്ക മറ്റ് സംവിധായകരോടൊപ്പം സിനിമ ചെയ്യുകയായിരുന്നു. അദ്ദേഹത്തിന് ഈ കഥാപാത്രം മുഴുനീളെ വേണമായിരുന്നു. എനിക്കാണെങ്കില് അന്ന് പരിണയത്തിന്റെ സീനുകള് നടക്കുകയാണ്. ഭരതന് സാര് എനിക്ക് ഡേറ്റ് അഡ്ജസ്റ്റ് ചെയ്തു തരാന് പറ്റുമോ എന്ന് നോക്കി. പക്ഷെ അത് ചെയ്യാന് പറ്റിയില്ല. ’’ വിനീത് പറയുന്നു. ‘‘ചന്ദ്രമുഖിയില് രജിനികാന്ത് സാറാണ് എന്നെ നിര്ദ്ദേശിച്ചതെന്ന് കേട്ടിട്ടുണ്ട്. ജ്യോതിക നല്ല ഫിലിം ഡാന്സറാണ്. ക്ലാസിക്കല് ഡാന്സ് ഒരു ദിവസം കൊണ്ട് കാണിക്കാന് പറ്റിയതല്ല. നിരന്തര പരിശീലനത്തിലൂടെയേ ബോഡി മനസ്സിലാക്കൂ. പക്ഷെ ജ്യോതികയ്ക്ക് കലാ മാസ്റ്റര് സിംപ്ലിഫൈ ചെയ്ത് കാണിച്ച് കൊടുത്തു. അവര് ആ രീതിയില് ചെയ്തു.
മണിച്ചിത്രത്താഴിനെ റീമേക്കുകളുമായി താരതമ്യം ചെയ്യുന്നതിനെക്കുറിച്ചും വിനീത് സംസാരിച്ചു. ‘‘ഒറിജിനല് ഒറിജിനലാണ്. ലാലേട്ടന്റെയും ശോഭനയുടെയും പെര്ഫോമന്സുകള് താരതമ്യം ചെയ്യാന് പറ്റില്ല. ശോഭന അക്കാദമിക്കലി ട്രെയ്ന് ചെയ്ത രാജ്യത്തെ മികച്ച നര്ത്തകിമാരിലൊരാളാണ്. അതൊരിക്കലും ക്ലാസിക്കല് ഡാന്സറാല്ലാത്തവര്ക്ക് ചെയ്യാന് പറ്റില്ല. ആ താരതമ്യം ശരിയല്ല..’’ വിനീത് പറയുന്നു.
കേരളത്തില് നിന്നും രണ്ട് തവണ സ്റ്റേറ്റ് അവാര്ഡും, തമിഴ്നാട് സര്ക്കാരിന്റെ കലൈമാണി പുരസ്കാരവും വിനീതിന് ലഭിച്ചിട്ടുണ്ട്. കഴിഞ്ഞ കുറച്ച് വര്ഷങ്ങളായി വിനീതിന് എടുത്ത് പറയത്തക്ക സിനിമ മലയാളത്തില് നിന്ന് ലഭിച്ചിരുന്നില്ല. എന്നാല് അഖില് സത്യന് സംവിധാനം ചെയ്ത ഫഹദ് ഫാസില് നായകനായ പാച്ചുവും അത്ഭുതവിളക്കില് ശ്രദ്ധേയമായ വേഷമാണ് വിനീത് ചെയ്തിരിക്കുന്നത്. റിയാസ് എന്ന കഥാപാത്രത്തിനെയാണ് സിനിമയില് വിനീത് അവതരിപ്പിച്ചത്.
