പുതിയ പാര്ലമെന്റ് മന്ദിരത്തിന്റെ ഉദ്ഘാടനത്തിന്റെ ഭാഗമായി 75 രൂപ നാണയം പുറത്തിറക്കി. പാര്ലമെന്റ് കെട്ടിടത്തിന്റെ ചിത്രം ആലേഖനം ചെയ്ത നാണയമാണ് പുറത്തിറക്കിയത്. ഭരണഘടനയുടെ ഒന്നാം ഷെഡ്യൂളിലെ മാര്ഗനിര്ദേശങ്ങളെല്ലാം പാലിച്ചാണ് നാണയത്തിന്റെ ഡിസൈന് തയ്യാറാക്കിയതെന്ന് കേന്ദ്രം അറിയിച്ചു.
നാണയത്തിന്റെ ഒരു വശം അശോക സ്തംഭവും അതിന് താഴെയായി സത്യമേവ ജയതേ എന്നും ആലേഖനം ചെയ്തിരിക്കും. ഇടതുവശത്ത് 'ഭാരത്' എന്നത് ദേവനാഗരി ലിപിയിലും വലത് വശത്ത് 'ഇന്ത്യ' എന്ന് ഇംഗ്ലീഷിലുമുണ്ടാകും. നാണയത്തില് 'രൂപ' ചിഹ്നവും ലയണ് ക്യാപിറ്റലിന് താഴെ അന്താരാഷ്ട്ര അക്കങ്ങളില് '75 'എന്ന മൂല്യവും രേഖപ്പെടുത്തും. മുകളിലെ 'സന്സദ് സങ്കുല്' എന്നും താഴെ ഇംഗ്ലീഷില് 'പാര്ലമെന്റ് മന്ദിരം' എന്നും എഴുതും.
44 മില്ലിമീറ്റര് വ്യാസമുള്ള വൃത്താകൃതിയിലുള്ള നാണയത്തിന്റ അഗ്രഭാഗങ്ങളില് 200 സെറേഷനുകള് ഉണ്ടാവും. നാണയത്തിന്റെ ഭാരം 35 ഗ്രാം ആയിരിക്കും. 50 ശതമാനം വെള്ളി, 40 ശതമാനം ചെമ്പ്, 5 ശതമാനം നിക്കല്, 5 ശതമാനം സിങ്ക് ഉള്പ്പെടെ നാല് ഭാഗങ്ങളുള്ള അലോയ് ഉപയോഗിച്ചാണ് നാണയം നിര്മിക്കുന്നത്.
