പലപ്പോഴും ആരും സഹായിക്കാനും സംരക്ഷിക്കാനും വേദന പറയാനും ഇല്ലാതെ ഒറ്റപ്പെട്ടുപോയി എന്ന തോന്നല് ഉണ്ടാകുമ്പോഴാണ് മനുഷ്യന് മറ്റ് പലതിലേക്കും തിരിയുന്നത്. ഇതില് ചിലരെല്ലാം കുറ്റവാളികളായും തീവ്രവാദികളായും ഒക്കെ മാറാറുണ്ട്. എന്നാല് ഇവരിലും സ്നേഹം കൊതിക്കുന്ന ഒരു മനസ്സുണ്ടെന്നുള്ള കാര്യം മറന്നുപോകരുത്. ആരെങ്കിലും അവര്ക്ക് താങ്ങായും തണലായും ഉണ്ടെന്നുള്ള തോന്നല് വരുമ്പോഴാണ് ഇങ്ങനെയുള്ളവര് മനസ്സ് മാറി ചിന്തിക്കാന് തുടങ്ങുന്നത്. അത്തരത്തിലൊരു സംഭവമാണ് യുഎസിലെ കാലിഫോര്ണിയയില് നിന്ന് കഴിഞ്ഞ ദിവസം പുറത്തുവന്നിരിക്കുന്നത്. ഒരു ബാങ്ക് കവര്ച്ചയ്ക്കെത്തിയ പ്രതിയെ സ്നേഹം കൊണ്ടൊരാള് കീഴ്പ്പെടുത്തുകയും അയാളെ കുറ്റകൃത്യത്തില് നിന്ന് പിന്തിരിപ്പിച്ചിരിക്കുകയും ചെയ്തിരിക്കുകയാണ്.
സംഭവം ഇങ്ങനെ, ബാങ്കില് ഇടപാടിനെത്തിയതായിരുന്നു മൈക്കല് ആര്മസ് എന്നയാള്. ഈ സമയത്തായിരുന്നു മുഖം മറച്ചെത്തിയ ഒരാള് ബാങ്കിലെ ഉദ്യോഗസ്ഥയ്ക്ക് ഒരു കുറിപ്പ് കൈമാറിയത്. താന് ബാങ്ക് കവര്ച്ചയ്ക്ക് എത്തിയതാണെന്നും തന്റെ കൈവശം സ്ഫോടകവസ്തുക്കളുണ്ട്, തന്നോട് സഹകരിക്കുന്നതാണ് നല്ലത് എന്നുമായിരുന്നു കുറിപ്പിലുണ്ടായിരുന്നത്. കുറിപ്പ് വായിച്ചതും ബാങ്ക് ഉദ്യോഗസ്ഥ പരിഭ്രാന്തയായി, സംഭവം അവിടെയുണ്ടായിരുന്നവരെല്ലാം നിമിഷങ്ങള്ക്കകം അറിഞ്ഞു. അക്രമിയുടെ കൈയ്യില് സ്ഫോകട വസ്തുക്കള് ഉണ്ടായിരുന്നതിനാല് എന്തു ചെയ്യണമെന്ന് അറലയാന് കഴിയാത്ത അവസ്ഥയിലായിരുന്നു ബാങ്കിലുള്ളവര്.
എല്ലാവരും ഇതെല്ലാം കണ്ട് പകച്ചുനില്ക്കുന്നതിനിടയില് മുഖം മറച്ചിരുന്നുവെങ്കില് പോലും അക്രമിയെ എവിടെയോ കണ്ടുമറന്നത് പോലെ ആര്മസിന് തോന്നി. അദ്ദേഹം ധൈര്യസമേതം അക്രമിയെ സമീപിച്ചു. മുമ്പ് താന് താമസിച്ചിരുന്ന വീടിന് അടുത്ത് താമസിച്ചിരുന്ന, തന്റെ മകളുടെ സുഹൃത്ത് കൂടിയായിരുന്ന യുവാവാണതെന്ന് ആര്മസ് പെട്ടെന്ന് തന്നെ മനസിലാക്കി. അദ്ദേഹം യുവാവിനോട് സംയമനത്തോടെ എന്തുപറ്റിയെന്ന് ചോദിക്കുകയും, തുടര്ന്ന് തനിക്ക് ജോലിയൊന്നും ആയില്ലേടോ എന്ന് സ്നേഹപൂര്വം അന്വേഷിക്കുകയും ചെയ്തു. ഉടനെ അക്രമിയായ യുവാവ് വികാരധീനനായി എനിക്കായി ഇവിടെ ഒന്നും ബാക്കിയില്ല. എനിക്ക് ജയിലില് പോയാല് മതിയെന്നുമാണ് യുവാവ് മറുപടി പറഞ്ഞത്.
ഇതിന് പിന്നാലെ ആര്മസ് ആ യുവാവിനെ പുറത്തേക്ക് കൂട്ടിക്കൊണ്ടുപോയി. അയാളെ ഏറെ സ്നേഹത്തോടെ കെട്ടിപ്പിടിച്ചു. ഉടനെ തന്നെ ആ യുവാവ് കരഞ്ഞുതുടങ്ങി. അയാളെ ആര്മസ് സമാധാനിപ്പിച്ചുകൊണ്ടിരിക്കെ സ്ഥലത്ത് പൊലീസെത്തി. സൈറണ് മുഴക്കാതെ വെളിച്ചം മാത്രമിട്ടാണ് പൊലീസെത്തിയത്. പൊലീസ് അയാളെ അറസ്റ്റ് ചെയ്ത് കൂട്ടിക്കൊണ്ട് പോവുകയും കവര്ച്ചാശ്രമത്തിന് കേസെടുക്കുകയും ചെയ്തു. എന്നാല് ഇയാളുടെ പക്കല് ആയുധങ്ങളോ ഒരു വിധത്തിലുള്ള സ്ഫോടകവസ്തുക്കളോ ഉണ്ടായിരുന്നില്ലെന്നാണ് പൊലീസ് വ്യക്തമാക്കിയത്.
'ഒരു 20-25 വര്ഷം മുമ്പാണ്. എന്റെ അയല്ക്കാരനായിരുന്നു അവന്. എനിക്കവനെ ഒരുപാടൊന്നും അടുത്തറിയില്ല. പക്ഷേ എപ്പോഴും ഇങ്ങനെ കാണാം. എന്റെ മകളുടെ സുഹൃത്തുമായിരുന്നു. അതുകൊണ്ടൊക്കെയാണ് ധൈര്യപൂര്വം അവന്റെയടുത്തേക്ക് പോകാന് എനിക്ക് കഴിഞ്ഞത്. എനിക്ക് തോന്നിയത് അയാള് ഡിപ്രഷനിലാണെന്നാണ്. അയാളുടെ സംസാരമൊക്കെ അങ്ങനെയായിരുന്നു...'- ആര്മസ് മാധ്യമങ്ങളോട് പറഞ്ഞു. യുവാവിനെ ജയിലില് പോയി കാണുമെന്നും സ്നേഹം മനുഷ്യനെ മാറ്റുമെന്നും ആര്മസ് കൂട്ടിച്ചേര്ത്തു.
