അബുജ: മഴ കനത്തതോടെ ബോട്ടില് കയറി വിവാഹ ചടങ്ങില് പങ്കെടുക്കാന് പോയ ആളുകള്ക്ക് ബോട്ട് മറിഞ്ഞ് ദാരുണാന്ത്യം. നൈജീരിയയില് തിങ്കളാഴ്ച ആണ് സംഭവം. 250ഓളം യാത്രക്കാരാണ് ബോട്ടിലുണ്ടായിരുന്നത്. ബോട്ട് മറിഞ്ഞ് 100 ലധികം ആളുകളാണ് കൊല്ലപ്പെട്ടത്. റോഡില് വെള്ളം കയറിയതോടെ ആളുകള് ബോട്ട് മാര്ഗം തെരഞ്ഞെടുക്കുകയായിരുന്നു. എന്നാല് കനത്ത മഴയില് ബോട്ട് നദിയിലുണ്ടായിരുന്ന മരത്തടിയില് തട്ടി പിളര്ന്നതോടെയാണ് ദുരന്തമുണ്ടായത്. 250ഓളം യാത്രക്കാരാണ് ബോട്ടിലുണ്ടായിരുന്നത്.
തിങ്കളാഴ്ച പുലര്ച്ചെയോടെയാണ് അപകടമുണ്ടായത്. ക്വാരയിലെ പാടിഗിയില് നിന്ന് നെജറിലെ ഗ്ബോട്ടിയിലേക്ക് പുറപ്പെട്ട ബോട്ടാണ് അപകടത്തില്പ്പെട്ടത്. ബോട്ട് പുറപ്പെട്ടതിന് പിന്നാലെ വെളളത്തിലുണ്ടായിരുന്ന തടിക്കഷ്ണത്തില് തട്ടി എന്ജിന് തകരുകയായിരുന്നു. തുടര്ന്ന് ബോട്ടില് വെള്ളം ഇരച്ചുകയറി ബോട്ട് മുങ്ങുകയായിരുന്നു. ബോട്ടിന് ഉള്ക്കൊള്ളാവുന്നതിലുമധികം ആളുകള് ബോട്ടിലുണ്ടായിരുന്നു. ശക്തമായ അടി ഒഴുക്കും അപകടത്തിന് കാരണമായി എന്നാണ് സൂചന. 144 പേരെ ഇതിനോടകം രക്ഷിക്കാനായിട്ടുണ്ടെന്നാണ് പുറത്തുവരുന്ന റിപ്പോര്ട്ട്.
റോഡ് വെള്ളത്തില് മുങ്ങിയതോടെ വിവാഹം നടക്കുന്ന സ്ഥലത്തേക്ക് പോകാനായി അതിഥികള്ക്ക് വധുവരന്മാരുടെ ബന്ധുക്കളൊരുക്കിയ ബോട്ടാണ് അപകടത്തില്പ്പെട്ടത്. നൈജീരയയില് നിലവില് മഴക്കാലമാണ്. വരും ദിവസങ്ങളില് മഴ കനക്കുമെന്നാണ് വിദഗ്ധര് പറയുന്നത്.
