ബോളിവുഡില് അന്നുമിന്നും തിളങ്ങി നില്ക്കുന്ന താരമാണ് അനുപം ഖേര്. തിയേറ്റര് മേഖലയില് നിന്നു തുടങ്ങി പിന്നീട് നടനും നിര്മ്മാതാവും അവതാരകനുമൊക്കെയായി അനുപം ഖേര് ബോളിവുഡില് നിറഞ്ഞു നില്ക്കുകയാണ്. സോഷ്യല് മീഡിയയില് വളരെ സജീവമായ താരമായ അനുപം പലപ്പോഴും സാമൂഹിക പ്രസക്തിയുള്ള പോസ്റ്റുകള് പങ്കുവയ്ക്കാറുണ്ട്. സാധാരണക്കാരുടെ ഹൃദയഹാരിയായ വീഡിയോകള് പലപ്പോഴും താരം പങ്കിട്ടിട്ടുണ്ട്. ഇപ്പോഴിതാ നടനും എംപിയുമായ രവി കിഷന്റെ മകള് ഇഷിത സൈന്യത്തില് ചേര്ന്ന സന്തോഷമാണ് അനുപം ഖേര് പങ്കുവച്ചിരിക്കുന്നത്. ഗവണ്മെന്റിന്റെ അഗ്നിപഥിലൂടെയാണ് 21 കാരിയായ ഇഷിത സൈന്യത്തിന്റെ ഭാഗമായത്. രവി കിഷന് തന്നെ സന്തോഷവാര്ത്ത ആരാധകരുമായി പങ്കുവച്ചിരുന്നു. തുടര്ന്ന് നിരവധി പേര് ഇഷിതയെ പ്രശംസിച്ചുകൊണ്ട് രംഗത്തെത്തി. അതിനൊപ്പമാണ് അനുപം ഖേറും പ്രശംസയുമായി എത്തിയത്. ‘‘എന്റെ പ്രിയ സുഹൃത്ത് രവി കിഷന്! നിങ്ങളുടെ മകളെ കുറിച്ചുള്ള പ്രചോദനാത്മകമായ വാർത്തകൾ വായിച്ചു...ഇഷിത, അവൾ അഗ്നിവീർ പദ്ധതി പ്രകാരം നമ്മുടെ പ്രതിരോധ സേനയിൽ ചേർന്നു എന്ന സന്തോഷം . എനിക്ക് സന്തോഷവും അഭിമാനവും ഉണ്ട്. ഇഷിതയ്ക്ക് എന്റെ സ്നേഹവും അനുഗ്രഹവും നൽകുക. അവളുടെ ഈ നടപടി ദശലക്ഷക്കണക്കിന് പെൺകുട്ടികൾക്ക് പ്രചോദനത്തിന്റെ ഉദാഹരണമായി മാറുമെന്ന് അവളോട് പറയുക! ജയ് ഹിന്ദ്!...’’ എന്നാണ് അനുപം ഖേര് കുറിച്ചത്.
രവി നേരത്തെ സോഷ്യൽ മീഡിയ പോസ്റ്റിലൂടെ വാർത്ത സ്ഥിരീകരിച്ചിരുന്നു. രാജ്യത്തെ സേവിക്കാനായി കഴിഞ്ഞ മൂന്നു വര്ഷമായി മകള് കഠിന പ്രയത്നത്തിലായിരുന്നു എന്നാണ് രവി കുറിച്ചത്. ‘‘എന്റെ ധീരയായ മകള് ഇഷിത ശുക്ല കഴിഞ്ഞ മൂന്നു വര്ഷമായി രാജ്യത്തെ സേവിക്കാനുള്ള കഠിനപ്രയത്നത്തിലായിരുന്നു. ഡല്ഹി ഡയറക്ടറേറ്റിലെ 7 ഗേള്സ് ബെറ്റാലിയനിലെ കേഡറ്റാണ് അവള്. കടുത്ത ശൈത്യത്തിലും കോടമഞ്ഞിലും പരിശീലനം നടത്തിയാണ് റിപ്പബ്ലിക് ഡേ പരേഡില് പങ്കെടുത്തത്. അഗ്നിപഥിലൂടെ സൈന്യത്തില് ചേരാന് താല്പ്പര്യമുണ്ടെന്ന് അവള് എന്നോട് പറയുകയായിരുന്നു. മുന്നോട്ടു പോകാന് ഞാന് അവളോട് പറഞ്ഞു....’’ രവി കിഷന് കുറിച്ചു.
— Ravi Kishan (@ravikishann) June 29, 2023
