സുപ്രീംകോടതി വിവാഹിതരായ പുരുഷന്മാര് ഗാര്ഹിക പീഡനത്തിന് ഇരയായി ആത്മഹത്യ ചെയ്യുന്നുവെന്നും പുരുഷന്മാരുടെ അവകാശങ്ങള് സംരക്ഷിക്കാന് കമ്മീഷന് രൂപീകരിക്കണമെന്നും ആവശ്യപ്പെട്ടു കൊണ്ടുള്ള ഹര്ജി തള്ളി. വിവാഹിതരായ പുരുഷന്മാരുടെ താല്പ്പര്യങ്ങള് സംരക്ഷിക്കുന്നതിന് ദേശീയ പുരുഷ കമ്മിഷന് രൂപീകരിക്കണമെന്നും പുരുഷന്മാര് ഗാര്ഹിക പീഡനം മൂലം ആത്മഹത്യ ചെയ്യുന്ന സംഭവങ്ങളെ കൈകാര്യം ചെയ്യാന് മാര്ഗനിര്ദേശം ഇറക്കണമെന്നും ആവശ്യപ്പെട്ടായിരുന്നു പൊതുതാല്പര്യ ഹര്ജി സുപ്രീം കോടതിയിലെത്തിയത്.
അഭിഭാഷകനായ മഹേഷ് കുമാര് തിവാരിയായിരുന്നു ഹര്ജിക്കാരന്. കുടുംബ പ്രശ്നങ്ങള് മൂലം പ്രയാസം അനുഭവിക്കുന്ന പുരുഷന്മാരുടെ പരാതി സ്വീകരിക്കാന് നിര്ദേശം നല്കണമെന്നും ഹര്ജിക്കാരന് വാദിച്ചു. ജസ്റ്റിസുമാരായ സൂര്യകാന്ത് മിശ്രയും ദീപാങ്കര് ദത്ത എന്നിവരാണ് ഹര്ജി പരിഗണിച്ചത്. പുരുഷ ആത്മഹത്യയെ കുറിച്ച് കണക്കുകള് നിരത്തിയായിരുന്നു ഹര്ജിക്കാരന്റെ വാദം. ഏകദേശം 33.2% പുരുഷന്മാര് കുടുംബ പ്രശ്നങ്ങള് കാരണവും 4.8% വിവാഹ സംബന്ധമായ പ്രശ്നങ്ങളും കാരണവും ജീവിതം അവസാനിപ്പിച്ചുവെന്നായിരുന്നു ക്രൈം റെക്കോര്ഡ്സ് ബ്യൂറോ ഡാറ്റ ഉദ്ധരിച്ച് നിരത്തിയ വാദം. ഹര്ജിക്കാരന് വിവാഹിതരായ പുരുഷന്മാര് ആത്മഹത്യ ചെയ്യുന്ന സംഭവങ്ങള് കൈകാര്യം ചെയ്യാന് ദേശീയ മനുഷ്യാവകാശ കമ്മിഷന് നിര്ദേശം നല്കണമെന്നും ആവശ്യപ്പെട്ടു.
എന്നാല് ബെഞ്ച് ഹര്ജിക്കാരന് പറയുന്നത് ഏകപക്ഷീയമായ കാര്യങ്ങളാണെന്നും വിവാഹത്തിന് ശേഷം ആത്മഹത്യ ചെയ്ത പെണ്കുട്ടികളുടെ കണക്ക് കൈവശമുണ്ടോയെന്നും ഹര്ജിക്കാരനോട് ചോദിച്ചു. ഇത്തരം വിഷയങ്ങള് കൈകാര്യം ചെയ്യാന് ഇന്ത്യന് നിയമത്തില് സംവിധാനമുണ്ടെന്നും കോടതി ചൂണ്ടിക്കാട്ടി. ആരും ആത്മഹത്യ ചെയ്യാന് ആഗ്രഹിക്കുന്നില്ലെന്നും വ്യക്തിപരമായ വിഷയങ്ങളാണ് ഇതിന് കാരണമെന്ന് കോടതി നിരീക്ഷിക്കുകയും ഹര്ജി തള്ളുകയുമായിരുന്നു.
