കാകിനാഡ: ആത്മഹത്യ ചെയ്ത യജമാനത്തിയുടെ തിരിച്ചുവരവ് കാത്ത് വളര്ത്തുനായ ഒരേയിരുപ്പ് തുടര്ന്നത് 24 മണിക്കൂര്. മാതാവുമായി വഴക്കുണ്ടാക്കി ഗോദാവരി നദിയില് ചാടി മരിച്ച മന്ദാംഗികാഞ്ചന എന്ന കൗമാരക്കാരിയുടെ നായയാണ് കരയ്ക്ക് അഴിച്ചുവെച്ച ചെരിപ്പും ദുപ്പട്ടയും നോക്കിയിരുന്നത്. ഞായറാഴ്ച ഗോദാവരി നദിയ്ക്ക് കുറുകെയുള്ള പാലത്തില് നിന്നും ചാടിയാണ് കാഞ്ചന മരിച്ചത്.
ഞായറാഴ്ച വൈകിട്ട് മരിച്ച കാഞ്ചനയെ കാത്തിരുന്ന നായ തിങ്കളാഴ്ച രാത്രി യുവതിയുടെ സഹോദരനെത്തി വീട്ടില് പോകാന് പറയുന്നത് വരെ പെണ്കുട്ടി അഴിച്ചുവെച്ച ചെരിപ്പും ദുപ്പട്ടയും നോക്കിയിരുന്നു. യാനത്തിന് സമീപം താമസിക്കുന്ന കാഞ്ചനയ്ക്ക് കഴിഞ്ഞ വര്ഷമാണ് പിതാവിനെ ഹൃദയാഘാതത്തെ തുടര്ന്ന് നഷ്ടമായത്. മാതാവ് കമല ഫെരിറോഡില് ടിഫിന് സെന്റര് നടത്തിയാണ് ഇവര് ജീവിക്കുന്നത്.
ഒരു എണ്ണക്കമ്പനിയിലെ ക്ലാര്ക്കാണ് സഹോദരന്. മൂത്ത സഹോദരി ധനലക്ഷ്മിയെ വിവാഹം കഴിച്ചയച്ചു. പത്താംക്ലാസ്സില് പഠിക്കുന്ന കാഞ്ചന തെരുവില് നിന്നും കിട്ടിയ നായ്ക്കുട്ടിയെ വളര്ത്തുന്നത് മാതാവിന് ഇഷ്ടമില്ലായിരുന്നു. വീട്ടിലെ സാധനങ്ങള് നശിപ്പിക്കുന്നതിനാല് അതിനെ ഉപേക്ഷിക്കാന് മാതാവ് നിരന്തരം ആവശ്യപ്പെട്ടിരുന്നു. എന്നാല് കാഞ്ചന തയ്യാറായില്ല. ഇക്കാര്യം പറഞ്ഞ് ഇരുവരും വഴക്കും ഉണ്ടാക്കിയിരുന്നു.
സാധാരണഗതിയില് ഹോട്ടല് ജോലിയില് കാഞ്ചന മാതാവിനെ പതിവായി സഹായിച്ചിരുന്നു. സംഭവദിവസവും ഇതുപോലെ കാഞ്ചന മാതാവുമായി വഴക്കിട്ടു. ശനിയാഴ്ച പിറ്റേദിവത്തേക്കുള്ള ഭക്ഷണം തയ്യാറാക്കുന്നതിനിടയില് കാഞ്ചനയെ കമല വഴക്കുപറഞ്ഞു. ഈ വഴക്ക് ഞായറാഴ്ചയിലേക്കും നീണ്ടു. ഇതിന് പിന്നാലെ വൈകിട്ട് 6.30 യോടെ ജോലികഴിഞ്ഞ് പോയ കാഞ്ചന യാനത്തെ യദുര്ലങ്കാ പാലത്തില് എത്തി മാതാവിനെയും ചേച്ചിയേയും താന് മരിക്കാന് പോകുകയാണെന്ന് ഫോണ്വിളിച്ചു പറഞ്ഞു. അതിന് ശേഷം ദുപ്പട്ടയും ചെരുപ്പുമെല്ലാം പാലത്തില് വെച്ച് നദിയിലേക്ക് ചാടുകയായിരുന്നെന്ന് പോലീസ് പറഞ്ഞു.
നായ കാഞ്ചനയെ പിന്തുടരുന്നുണ്ടായിരുന്നു. അതുകൊണ്ടു തന്നെ വഴിയാത്രക്കാര് കരുതിയത് നായ്ക്കുട്ടിയുമായി കാഞ്ചന നടക്കാനിറങ്ങിയതാണെന്നായിരുന്നു. നദിയില് കാഞ്ചന ചാടുന്നത് കണ്ട് പാലത്തില് ഉണ്ടായിരുന്നവര് ഓടിക്കൂടി. വിവരമറിഞ്ഞ് പോലീസും സ്ഥലത്തെത്തി. ഇതിനിടെ കാഞ്ചനയുടെ ചെരിപ്പും ദുപ്പട്ടയും അഴിച്ചുവെച്ച സ്ഥലത്തിരുന്ന നായ അതിനടുത്തേക്ക് ആരേയും അടുപ്പിച്ചില്ല.
ഒടുവില് നായ മാറാതെ വന്നപ്പോള് പോലീസ് കാഞ്ചനയുടെ സഹോദരന് ബോസിനോട് നായയെ മാറ്റാന് ആവശ്യപ്പെടുകയായിരുന്നു. തുടര്ന്ന് തിങ്കളാഴ്ച രാത്രി 11.30 ബോസ് പറഞ്ഞപ്പോഴാണ് നായ മാറിയത്. ചൊവ്വാഴ്ച രാവിലെ 8.30 യോടെയാണ് കാഞ്ചനയുടെ മൃതദേഹം കനകലാപേട്ട പുഷ്ക്കര് ഘട്ടില് നിന്നും കണ്ടെത്തി.
വിശ്വസ്തതയുടെ പ്രതീകമായി കണക്കാക്കുന്ന ഒമ്പതു വര്ഷം യജമാനന് ഹിദേസാബുര് യുനോ യെ കാത്തിരുന്ന ജാപ്പനീസ് ഡോഗ് ഹാച്ചികോയാണ് കാഞ്ചനയുടെ നായയുടെ കഥ കേട്ടപ്പോള് പലരുടേയും ഓര്മ്മകളില് എത്തിയത്. ഈ വര്ഷമാണ് ഹച്ചികോയുടെ 100 ാം ജന്മദിനം ആഘോഷിച്ചത്.
(ആത്മഹത്യ ഒന്നിനും പരിഹാരമല്ല, ആത്മഹത്യാ പ്രവണത ഉണ്ടായാല് മനശ്ശാസ്ത്ര വിദഗ്ദ്ധരുടെ ഉപദേശം തേടുക)
