നന്പകല് നേരത്ത് മയക്കം എന്ന ചിത്രത്തിലൂടെ മികച്ച നടനുള്ള സംസ്ഥാന പുരസ്കാരം മമ്മൂട്ടിയെ തേടി ആറാം തവണയും എത്തിയിരിക്കുന്നു. 1984-ല് ഐ.വി. ശശി സംവിധാനം ചെയ്ത അടിയൊഴുക്കുകള് എന്ന ചിത്രത്തിനാണ് മമ്മൂട്ടിക്ക് ആദ്യമായി മികച്ച നടനുള്ള സംസ്ഥാന പുരസ്കാരം ലഭിച്ചത്.
അവിടെനിന്ന് അഭിനയ കളരിയില് തന്റെ അഭിനേതാവിനെ തേച്ചുമിനുക്കി പതം വരുത്തിയ മമ്മൂട്ടിക്ക് നൈപുണ്യം മാറ്റുരച്ചുനോക്കാനുള്ള കഥാപാത്രമായിരുന്നു ലിജോ ജോസ് പെല്ലിശേരി സംവിധാനം ചെയ്ത നല്പകല് നേരത്തെ മയക്കത്തിലെ ജെയിംസ്/സുന്ദരം എന്നീ ഇരുമുഖ കഥാപാത്രങ്ങള്. തെളിച്ചു പറയുകയാണെങ്കില് 14 വര്ഷത്തിനുശേഷമാണു മമ്മൂട്ടിക്ക് മലയാളത്തില് അഭിനയ സാധ്യതയുള്ള ഒരു കഥാപാത്രം ലഭിക്കുന്നത്. 2009-ല് പാലേരി മാണിക്യം ഒരു പാതിരാ കൊലപാതകത്തിന്റെ കഥ എന്ന ചിത്രത്തിലെ അഭിനയത്തിനാണ് ഒടുവില് മമ്മൂട്ടിക്ക് സംസ്ഥാന സര്ക്കാരിന്റെ മികച്ച നടന്നുള്ള പുരസ്കാരം ലഭിച്ചത്.
നന്പകല് നേരത്ത് മയക്കം മമ്മൂട്ടിയിലെ അഭിനേതാവിന് ഒരു പരീക്ഷണശാലയായിരുന്നു. വേളാങ്കണ്ണി തീര്ഥയാത്ര കഴിഞ്ഞു മടങ്ങുന്ന കേരളത്തില്നിന്നുള്ള സംഘത്തിലെ അംഗമായ ജെയിംസ് എന്ന കഥാപാത്രം തമിഴ്നാട്ടിലെ ഗ്രാമത്തിലൂടെ ബസ് കടന്നുപോകുമ്പോള് ഒരു ഗ്രാമത്തില് നിര്ത്തിക്കുകയും അവിടെ ഒരു വീട്ടില് ഉച്ചയ്ക്ക് കയറിച്ചെന്ന് ആ വീട്ടിലെ ഒരംഗത്തെപോലെ പെരുമാറുകയും ചെയ്യുന്നതാണ് കഥ. ഈ വീട്ടിലെ ഗൃഹനാഥനായിരുന്ന സുന്ദരം എന്നയാളായി ജെയിംസ് പെരുമാറുകയും തമിഴ് സംസാരിക്കുകയും ചെയ്യുന്നു. ഒരു ഉറക്കത്തില്നിന്നാണു മമ്മൂട്ടിയുടെ ജെയിംസ് ഈ ഗ്രാമത്തിലേക്ക് ഉണര്ന്നെഴുന്നേറ്റു പോകുന്നത്.
തന്റെ ശരീരത്തില് രണ്ടു വര്ഷം മുമ്പ് കാണാതായ കുഗ്രാമത്തിലെ സുന്ദരം പരകായ പ്രവേശം ചെയ്തപോലെ പെരുമാറുമ്പോള് സുന്ദരത്തിന്റെ കുടുംബവും ജെയിംസിന്റെ കുടുംബവും ആശയക്കുഴപ്പത്തിലാകുന്നു. ഇവിടെ രണ്ട് കുടുംബത്തിലെ നാഥന്മാര് ജെയിംസ്/സുന്ദരം മമ്മൂട്ടിയുടെ അസാമാന്യമായ അഭിനയമികവിലൂടെ പ്രേക്ഷകരുടെ കണ്ണുനിറയ്ക്കുന്നു. എന്നോ അപ്രത്യക്ഷനായ ആ ഗ്രാമത്തിലെ സുന്ദരം, ജെയിംസിലൂടെ, ആ ഗ്രാമത്തിലെ ഓരോരുത്തരോടും എന്നെ അറിയില്ലേ എന്നുള്ള നിസഹായതയോടെയുള്ള ചോദ്യത്തോടെ വിങ്ങിപ്പൊട്ടുമ്പോള് മമ്മൂട്ടി പ്രേക്ഷകരെ ഒരിക്കല്ക്കൂടി അത്ഭുതപ്പെടുത്തുന്നു. ഒട്ടും അതിഭാവുകത്വം വരുത്താതെയാണ് ജെയിംസ് എന്ന സുന്ദരം അഭിനയിക്കുന്നത്.
സുന്ദരം എന്ന നാട്ടുമ്പുറത്തുകാരന് മമ്മൂട്ടിക്ക് ഇതുവരെയുള്ള അഭിനയകലയുടെ, അനുഭവത്തിന്റെ, ഉത്പന്നമാണ്. രണ്ടു ഭാഷ, രണ്ടു സംസ്കാരം ഒരു അഭിനേതാവിലൂടെ ഒരേസമയം സമന്വയിപ്പിച്ചത് ജൂറി അംഗങ്ങളെപ്പോലും അത്ഭുതപ്പെടുത്തി. അക്ഷരാര്ഥത്തില് നാഗവല്ലിയായി ശോഭന പകര്ന്നാടിയപ്പോള് മലയാളികള് അത്ഭുതപ്പെട്ടിരുന്നതിന്റെ അപ്പുറമാണ് മമ്മൂട്ടി നന്പകല് നേരത്ത് മയക്കത്തിലൂടെ കാണിച്ചുതരുന്നത്.
ഇതുപോലെയുള്ള പരീക്ഷണ ചിത്രത്തില് മമ്മൂട്ടിയെ അല്ലാതെ മറ്റൊരു നടനെ ലിജോ ജോസ് പെല്ലിശേരിക്കു തെരഞ്ഞെടുക്കാന് കഴിയില്ല. രണ്ടു സംസ്കാരത്തെക്കുറിച്ചും നല്ല ധാരണയുള്ള ഒരാള്ക്കുമാത്രമേ ഈ കഥാപാത്രങ്ങളെ അഭിനയിച്ചു ഫലിപ്പിക്കാന് കഴിയൂ. ഒരുപക്ഷേ, മമ്മൂട്ടിക്ക് ഇതുവരെ ലഭിച്ച മികച്ച നടനുള്ള പുരസ്കാരങ്ങളില് എറ്റവും മികച്ച കഥാപാത്രമായിരിക്കും നന്പകല് നേരത്ത് മയക്കം എന്ന ചിത്രത്തിലേത്.
