സംസ്ഥാന ചലച്ചിത്ര പുരസ്കാര പ്രഖ്യാപനം കഴിഞ്ഞ ദിവസമാണ് നടന്നത്. മികച്ച കലാകാരന്മാര്ക്ക് ആദരം നല്കി തന്നെയായിരുന്നു ഇത്തവണത്തെ പുരസ്കാരങ്ങള്. സാധാരണയായി ചലച്ചിത്ര അവാര്ഡ് പ്രഖ്യാപനത്തോടനുബന്ധിച്ച് എതിരഭിപ്രായങ്ങളും വിമര്ശനങ്ങളുമൊക്കെ ഉണ്ടാകാറുണ്ട്. പ്രേക്ഷകര് മികച്ചതെന്ന് കരുതുന്ന താരങ്ങളെ ജൂറി ഒഴിവാക്കിയെന്നും അവാര്ഡ് കൊടുത്തില്ലെന്നുമൊക്കെ പലരും പറയാറുണ്ട്. ഈ വിമര്ശനങ്ങള് ചില സിനിമാപ്രവര്ത്തകരും പറയാറുണ്ട്. എന്നാല് എല്ലാ വര്ഷത്തെയും പോലെയല്ലാതെ താരതമ്യേന വിമര്ശനങ്ങള് വളരെ കുറച്ചു മാത്രം വന്നൊരു അവാര്ഡ് പ്രഖ്യാപനമായിരുന്നു ഇപ്രാവശ്യത്തേത്. ബംഗാളി സംവിധായകന് ഗൌതം ഘോഷ് ചെയര്മാന് ആയ ജൂറിയാണ് ഇത്തവണ അവാര്ഡ് ജേതാക്കളെ തെരഞ്ഞെടുത്തത്. വിമര്ശനങ്ങള് ഇല്ല എന്നല്ല അതിന്റെ തോത് കുറവായിരുന്നു എന്നു മാത്രം. അക്കൂട്ടത്തില് പ്രേക്ഷകര് എടുത്തു പറഞ്ഞ ഒന്നായിരുന്നു മാളികപ്പുറത്തില് കല്ലു എന്ന കഥാപാത്രത്തെ അവതരിപ്പിച്ച ബാലതാരം ദേവനന്ദയ്ക്ക് അവാര്ഡ് കൊടുത്തില്ല എന്നത്. ഇപ്പോഴിതാ ഈ വിഷയത്തില് പ്രതികരണവുമായി എത്തിയിരിക്കുകയാണ് നടന് ശരത് ദാസ്. ദേവനന്ദയ്ക്കൊപ്പമുള്ള ചിത്രം പങ്കിട്ടാണ് ശരത് തന്റെ അഭിപ്രായം കുറിച്ചത്. ‘‘എല്ലാ വിജയികള്ക്കും അഭിനന്ദനങ്ങള്... എന്തായാലും കോടിക്കണക്കിന് മലയാളികളുടെയും എന്റെയും മനസ് കൊണ്ടും ഹൃദയം കൊണ്ടും നിനക്ക് എപ്പോഴേ അവാര്ഡ് തന്നുകഴിഞ്ഞു മോളേ...’’ എന്നാണ് ശരത് കുറിച്ചത്.
ഇതൊന്നുമല്ലാതെ റോഷാക്കിലെ ബിന്ദു പണിക്കരുടെ പ്രകടനം, മമ്മൂട്ടി തന്നെ കേന്ദ്ര കഥാപാത്രത്തെ അവതരിപ്പിച്ച പുഴു എന്ന ചിത്രം ഇവയൊക്കെ പരിഗണിക്കപ്പെടാതിരുന്നതിനെക്കുറിച്ച് സോഷ്യല് മീഡിയയില് പോസ്റ്റുകള് വന്നിട്ടുണ്ട്. എന്നാല് മികച്ച ബാലതാരങ്ങള്ക്കുള്ള പുരസ്കാരം തന്മയ സോള്, മാസ്റ്റര് ഡാവിഞ്ചി എന്നിവര്ക്കാണ്. പല്ലൊട്ടി നയന്റീസ് കിഡ്സ് എന്ന ചിത്രത്തിലെ അഭിനയത്തിനാണ് ഡാവിഞ്ചിക്ക് പുരസ്കാരം ലഭിച്ചത്. സനല്കുമാര് ശശിധരന് ചിത്രം വഴക്കിലെ പ്രകടനമാണ് തന്മയയെ പുരസ്കാരത്തിന് അര്ഹയാക്കിയത്. അതേസമയം മമ്മൂട്ടിയാണ് ഇത്തവണത്തെ മികച്ച നടന്. വിന്സി അലോഷ്യസ് നടിയും.
