തമിഴ്, തെലുങ്ക് സിനിമാ പ്രേക്ഷകര്ക്ക് സുപരിചിതയാണ് നടി അഞ്ജലി. സമൂഹമാധ്യമങ്ങളില് സജീവമായ താരം പങ്കുവയ്ക്കുന്ന വിശേഷങ്ങളെല്ലാം ആരാധകര് ഏറ്റെടുക്കാറുണ്ട്. ഇപ്പോഴിതാ നടന് വിശാലിനൊപ്പമുളള ചിത്രങ്ങളും ഹൃദ്യമായ ഒരു കുറിപ്പുമാണ് നടി സോഷ്യല് മീഡിയയിലൂടെ പങ്കുവച്ചിരിക്കുന്നത്. വിശാലുമായുളള സൗഹൃദത്തെ കുറിച്ചാണ് അഞ്ജലിയുടെ കുറിപ്പ്.
'' സമയം അതിവേഗം കടന്നുപോകുന്നു. വര്ഷങ്ങള് കൊഴിഞ്ഞുപോയേക്കാം. എന്നാല് ചില പ്രത്യേക വ്യക്തികള്ക്കൊപ്പമുള്ള ചില ഓര്മ്മകള് ഇന്നും ഒട്ടും മങ്ങാതെ, സവിശേഷമായി, എന്നും നിലനില്ക്കുന്നു.
ദശകത്തിലേറെ നീണ്ട തകര്ക്കാന് കഴിയാത്ത ഈ സൗഹൃദത്തിന് ശേഷവും, നമ്മളിലുള്ള ആ കുട്ടിക്കളിയും കുസൃതികളും ഒക്കെ ഇപ്പോഴും ഒരുപോലെ കാത്തുസൂക്ഷിക്കാന് കഴിയുന്നത് എത്രയോ സന്തോഷകരമായ കാര്യമാണ്.
ഇത് എന്നും ഇങ്ങനെ തന്നെ തുടരട്ടെ. നമ്മുടെ സൗഹൃദത്തെ മാറ്റാന് ഒന്നിനും കഴിയില്ലെന്ന് നമ്മള് സ്വയം പ്രതിജ്ഞ ചെയ്യുന്നതുകൊണ്ട് തന്നെ ഇത് എന്നും തുടരുക തന്നെ ചെയ്യും.ഒരുപാട് സ്നേഹത്തോടെ'', അഞ്ജലി കുറിച്ചു.
അഞ്ജലിയുടെ പോസ്റ്റിന് താഴെ കമന്റുമായി വിശാലും എത്തി. ' നിങ്ങള് അന്നും ഇന്നും ഒരുപോലെ തന്നെയാണ്, 2012-ല് മദ ഗജ രാജ ഷൂട്ടിംഗ് സെറ്റില് വെച്ച് നമ്മള് ആദ്യമായി കണ്ടുമുട്ടിയ അന്നുമുതല് ഇന്നുവരെ നമ്മുടെ ഈ സൗഹൃദത്തിനും ഒരു മാറ്റവും വന്നിട്ടില്ല. നിങ്ങള് എപ്പോഴും ഇതുപോലെ തന്നെ തുടരുക, ഞാനും അങ്ങനെ തന്നെയായിരിക്കും. ദൈവം നിങ്ങളെ സമൃദ്ധമായി അനുഗ്രഹിക്കട്ടെ', എന്നാണ് വിശാലിന്റെ വാക്കുകള്.
2006ല് പുറത്തിറങ്ങിയ ' ഫോട്ടോ' എന്ന ചിത്രത്തിലൂടെ അഭിനയരംഗത്തേക്ക് എത്തിയ നടിയാണ് അഞ്ജലി. ' അങ്ങാടി തെരു' , ' എങ്കേയും എപ്പോതും' തുടങ്ങിയ ചിത്രങ്ങളിലെ അഞ്ജലിയുടെ കഥാപാത്രങ്ങള് ഏറെ ശ്രദ്ധ നേടിയിരുന്നു.ജയസൂര്യ നായകനായ ' പയ്യന്സ്', ജോജു ജോര്ജിന്റെ ' ഇരട്ട' എന്നീ ചിത്രങ്ങളിലൂടെ മലയാള സിനിമയിലും അഞ്ജലി ശ്രദ്ധ നേടിയിട്ടുണ്ട്. അതേസമയം വിശാല് ആദ്യമായി സംവിധാനം ചെയ്ത് അഭിനയിക്കുന്ന ' മകുടം' എന്ന ചിത്രത്തില് അഞ്ജലിയും ഒരു കഥാപാത്രത്തെ അവതരിപ്പിക്കുന്നുണ്ട്.
