ഷിക്കാഗോ: അമേരിക്കയിലെ വന് നഗരങ്ങളില് ഒന്നായ ഷിക്കാഗോയില് അലഞ്ഞുതിരിയുന്ന ഹൈദരാബാദില് നിന്നുള്ള ഇന്ത്യന് വിദ്യാര്ത്ഥിനിയ്ക്ക് വേണ്ടി തെരച്ചിലാരംഭിച്ച് ഷിക്കാഗോയിലെ ഇന്ത്യന് കോണ്സുലേറ്റ്. കഴിക്കാന് ആഹാരം പോലുമില്ലാതെ പട്ടിണിയിലും കടുത്ത വിഷാദത്തിലും കഴിയുന്ന പെണ്കുട്ടിയെ നാട്ടിലെത്തിക്കണമെന്ന പെണ്കുട്ടിയുടെ അഭ്യര്ത്ഥന വൈറലായതിന് പിന്നാലെയാണ് തെരച്ചില്.
പെണ്കുട്ടിയുടെ വിവരം മാതാവാണ് പങ്കുവെച്ചത്. മകളെ കണ്ടെത്തി വീട്ടിലേക്ക് തിരിച്ചയയ്ക്കാന് സഹായിക്കണം എന്ന് അഭ്യര്ത്ഥിച്ച് കേന്ദ്ര വിദേശകാര്യമന്ത്രി ജെയ്ശങ്കറിന് എഴുതിയ കത്ത് ട്വിറ്ററില് വൈറലായിരുന്നു. തന്റെ മകള് സയ്യേദാ ലുലു മിന്ഹാജ് സെയ്ദി ഡിട്രോയിറ്റിലെ ട്രിന് സര്വകലാശാലയില് നിന്നും എംഎസ് പഠിക്കുന്നതിനായി 2021 ആഗസ്റ്റില് അമേരിക്കയ്ക്ക് പോയതാണെന്ന് മാതാവ് കത്തില് പറയുന്നു.
കഴിഞ്ഞ രണ്ടുമാസമായി മകളുടെ ഒരു വിവരവും ഇല്ലെന്നും മകള് കടുത്ത വിഷാദത്തിലാണെന്നും അവരുടെ സാധനങ്ങള് മുഴുവന് മോഷണം പോയെന്നും പട്ടിണിയിലും ദുരിതത്തിലുമായ നിലയില് ഷിക്കാഗോയിലെ തെരുവില് കണ്ടതായി ചിലര് അറിയിച്ചതായും ഇവര് കത്തില് വ്യക്തമാക്കിയിട്ടുണ്ട്.
കത്ത് ഭാരത് രാഷ്ട്ര സമിതിയാണ് ട്വിറ്ററില് പോസ്റ്റ് ചെയ്തത്. ഷിക്കാഗോയിലെ സാമൂഹ്യപ്രവര്ത്തകന് മുക്കാറം വഴി പെണ്കുട്ടിയിലേക്ക് എത്താനായിട്ടുണ്ടെന്ന് ബിആര്എസ് നേതാവ് ഖലീകര് റഹ്മാന് പിന്നീട് അറിയിച്ചു. പെണ്കുട്ടി കടുത്ത വിഷാദത്തില് മനോനില തെറ്റിയ നിലയിലാണെന്നും അമേരിക്കയില് അവര്ക്ക് ഒരു ജോലി കണ്ടെത്താന് കഴിയാതെ വന്നത് സാമ്പത്തീക സ്ഥിതി വളരെ മോശമാക്കിയെന്നും വീട്ടിലേക്ക് പോകുക മാത്രമാണ് പരിഹരിക്കാനുള്ള മാര്ഗ്ഗമെന്നും മുക്കാറമിനെ ഉദ്ധരിച്ച് റഹ്മാന് പറഞ്ഞു.
പെണ്കുട്ടിയെ കണ്ടെത്താനുള്ള ശ്രമത്തിലാണ് തങ്ങളെന്ന് ഷിക്കാഗോയിലെ ഇന്ത്യന് കോണ്സുലേറ്റ് ജനറല് പറഞ്ഞു. ലോക്കല് പോലീസിന്റെയും എന്ജിഒകളുടെയും സഹായത്തോടെ പെണ്കുട്ടിയിലേക്ക് എത്താനുള്ള ശ്രമത്തിലാണെന്നും കണ്ടെത്തിക്കഴിഞ്ഞാല് ആവശ്യമുള്ള എല്ലാ സഹായങ്ങളും പെണ്കുട്ടിക്ക് ചെയ്തുകൊടുക്കുമെന്നും കോണ്സുലേറ്റ് പറയുന്നു.
