സാമൂഹ്യമാധ്യമത്തില് രൂക്ഷ വിമര്ശനം നേരിട്ടതിനെ തുടര്ന്ന് പരസ്യത്തില് നിന്നും മായ്ച്ചു കളഞ്ഞ 'ക്രിസ്തു'വിനെ തിരികെ കൊണ്ടുവന്ന് പ്രശ്നം പരിഹരിച്ച് പോര്ഷേ. അന്താരാഷ്ട്ര കാര് കമ്പനിയുടെ ഐക്കണിക് മോഡലായ 911 ന്റെ പുതിയ പതിപ്പിന്റെ പരസ്യമാണ് വിവാദമുണ്ടാക്കിയത്. പരസ്യത്തില് മായ്ചു കളഞ്ഞ ക്രിസ്തുവിനെ ആള്ക്കാരുടെ എതിര്പ്പിനെ തുടര്ന്ന് തിരിച്ചു കൊണ്ടുവന്നു.
പോര്ഷേയുടെ വിഖ്യാതമായ 911 മോഡലിന്റെ അറുപതാം വാര്ഷികത്തിന്റെ ഭാഗമായിട്ടാണ് പുതിയ വെര്ഷനും പരസ്യവും കെണ്ടുവന്നത്. പോര്ച്ചുഗലിലാണ് പരസ്യചിത്രം ഷൂട്ട് ചെയ്തത്. പേര്ഷേയുടെ വന് വിലവരുന്ന ലിമിറ്റഡ് എഡീഷനായ പോര്ഷേ 911 എസ്/ടി മോഡലിന്റെ പരസ്യമായിരുന്നു ഇത്. ഒരു സ്ത്രീ നടന്നുപോകുമ്പോള് ഇവര്ക്ക് അരികിലൂടെ കാര് അതിവേഗത്തില് പോകുന്ന പാലം പശ്ചാത്തലമാകുന്ന ദൃശ്യത്തില് 75 അടി ഉയരമുള്ള പോര്ച്ചുഗലിലെ ലാന്റ്മാര്ക്കായി കണക്കാക്കുന്ന ക്രിസ്റ്റോ റേ പ്രതിമയുടെ ഭാഗം എഡിറ്റ് ചെയ്ത് മായ്ച്ചുകളഞ്ഞു.
ഇത് സസൂഷ്മം നിരീക്ഷിച്ച് മനസ്സിലാക്കിയ പ്രേക്ഷകര് പ്രതികരണവുമായി ഉടന് രംഗത്ത് വന്നു. സാമൂഹ്യമാധ്യമങ്ങളില് വന് വിമര്ശനമാണ് ഉയര്ന്നത്. പ്രശസ്ത ജര്മ്മന് കാര് നിര്മ്മാതാക്കള് സ്വന്തം കാലില് ചവിട്ടിയെന്നും തെറ്റുവരുത്തിയെന്നുമാണ് ഒരാളിട്ട ട്വീറ്റ്. ഭയാനകമെന്നാണ് മറ്റൊരാള് കുറിച്ചത്. ഒരു പരസ്യത്തില് നിന്നും ഒരു പ്രതിമ നീക്കുന്നത് പരിഹാസ്യമാണെന്നായിരുന്നു മറ്റൊരു കുറിപ്പ്. പോര്ഷേ ഇനി വാങ്ങില്ലെന്ന് വരെ കുറിച്ചവരുണ്ട്. എന്തായാലും പ്രതികരണം കമ്പനി ഗൗരവത്തിലെടുത്തു.
ഉടന് തന്നെ എഡിറ്റ് ചെയ്ത പരസ്യം പിന്വലിച്ച പോര്ഷേ ഒറിജിനല് പരസ്യം തിരികെ കൊണ്ടുവരികയും ചെയ്തു. തങ്ങള്ക്ക് പറ്റിയ പിഴവാണെന്ന് പറഞ്ഞ് പിന്നാലെ പത്രക്കുറിപ്പും ഇറക്കി. ''911 എസ്/ടി ലോഞ്ച് ഫിലിമിന്റെ മുമ്പ് അപ്ലോഡ് ചെയ്ത പതിപ്പില്, ഒരു ലാന്ഡ്മാര്ക്ക് നീക്കം ചെയ്തു. ഇതൊരു തെറ്റാണ്, എന്തെങ്കിലും കുറ്റം തങ്ങളുടെ ഭാഗത്ത് ഉണ്ടായിട്ടുണ്ടെങ്കില് ക്ഷമ ചോദിക്കുന്നു. യഥാര്ത്ഥ ചിത്രം ഇപ്പോള് ഓണ്ലൈനില് കാണാനാകും. പരസ്യത്തിന്റെ പൂര്ണ്ണമായ പതിപ്പ് - പ്രതിമയോടെ - ചുവടെ നിങ്ങള്ക്ക് കാണാം. ഏകദേശം 40 സെക്കന്ഡിനുള്ളില് പാലം രംഗം സംഭവിക്കുന്നു.'' വാര്ത്താകുറിപ്പില് കമ്പനിയുടെ വക്താക്കള് വ്യക്തമാക്കി.
പോര്ച്ചുഗലിന്റെ ലാന്റ്മാര്ക്കുകളില് ഒന്നും രണ്ടാം ലോകമഹായുദ്ധകാലത്ത് ലിസ്ബന് നഗരത്തിലെ ഡീ അബ്രീല് പാലത്തിന് മുകളില് പൂര്ത്തിയാക്കിയതുമായ കൈകള് വിടര്ത്തി നില്ക്കുന്ന രീതിയിലുള്ള ക്രിസ്തു രൂപം ബ്രസീലിലെ റിയോഡി ജനീറോയിലെ 'ക്രൈസ്റ്റ് ദി റെഡിമീര്' മാതൃകയിലുള്ളതാണ്.
