എന്തു വസ്ത്രം ധരിക്കണം എങ്ങനെ വസ്ത്രം ധരിക്കണം എന്നുള്ളത് ഓരോ വ്യക്തിയുടെയും സ്വകാര്യതയില്പെടുന്ന കാര്യമാണ്. എങ്കിലും മറ്റുള്ളളവരുടെ വസ്ത്രധാരണത്തോട് വിമര്ശനാത്മകമായ മനോഭാവം കാണിക്കുന്നവരും നിരവധിയാണ്. സ്കൂള് , കോളെജ് പോലെയുള്ള ഇടങ്ങളില് വിദ്യാര്ത്ഥികള് എന്തു വസ്ത്രം ധരിക്കണം എന്തൊക്കെ ധരിക്കാന് പാടില്ല എന്നുള്ള തരത്തിലുള്ള നിര്ദ്ദേശങ്ങള് പുറപ്പെടുവിക്കാറുണ്ട്. ഇപ്പോഴിതാ കൊല്ക്കത്തയില് നിന്ന് ഒരു കോളെജില് നിന്ന് പുറത്തുവരുന്ന ഒരു വാര്ത്തയാണ് ഇപ്പോള് നെറ്റീസണ്സിനിടയില് ശ്രദ്ധ നേടുന്നത്.
കൊല്ക്കത്തയിലെ ഒരു കോളേജ് പുതുതായി കോളേജില് ചേര്ന്ന വിദ്യാര്ത്ഥികളോട് ഒരു സത്യവാങ്മൂലത്തില് ഒപ്പിടാന് പറഞ്ഞതോടെയാണ് സംഭവം പുറത്തറിയുന്നത്. ആചാര്യ ജഗദീഷ് ചന്ദ്ര ബോസ് കോളേജ് (AJC ബോസ് കോളേജ്) ആണ് പുതുതായി ചേര്ന്ന വിദ്യാര്ത്ഥികളോട് അസഭ്യമായ രീതിയില് വസ്ത്രം ധരിച്ച് കോളേജില് വരില്ല എന്ന് എഴുതി ഒപ്പിടീച്ചിരിക്കുന്നത്. പ്രത്യേകിച്ചും റിപ്പ്ഡ് ജീന്സ് ധരിച്ച് വരരുത് എന്നാണ് നിര്ദ്ദേശം. തികച്ചും ഔപചാരികമായ വസ്ത്രങ്ങള് മാത്രമേ കോളേജിന്റെ പരിസരത്ത് സ്വീകാര്യമാകൂ എന്നാണ് കോളേജ് ഉത്തരവ്. അതിന്റെ ഭാഗമാണ് ഈ സത്യവാങ്മൂലവും.
വിദ്യാര്ത്ഥികളുടെ വസ്ത്രധാരണത്തിന്റെ കാര്യത്തിലുള്ള കോളേജിന്റെ നിബന്ധനകള് കോളേജിന്റെ വെബ്സൈറ്റിലും വ്യക്തമായി പറയുന്നുണ്ട്. അതില് പറയുന്നത് ഒന്നാം വര്ഷ ബിരുദ വിദ്യാര്ത്ഥികളുടെ ക്ലാസുകള് ആരംഭിക്കുന്നതിനെ കുറിച്ചും റിപ്പ്ഡ് ജീന്സ് കര്ശനമായി നിരോധിച്ചിരിക്കുന്നു എന്നുമാണ്. മാത്രമല്ല, ഫോര്മലായിട്ടുള്ള വസ്ത്രം മാത്രമേ അനുവദിക്കൂ എന്നും എഴുതിയിട്ടുണ്ട്. എന്നാല്, കോളേജ് ഇത് ആദ്യമായിട്ടല്ല ഇങ്ങനെ ഒരു സമീപനം വിദ്യാര്ത്ഥികളോട് കാണിക്കുന്നത്. കഴിഞ്ഞ വര്ഷവും കോളേജില് റിപ്പ്ഡ് ജീന്സിന് വിലക്ക് കല്പ്പിച്ചിരുന്നു. എന്നാല്, വിദ്യാര്ത്ഥികള് അത് ധരിക്കുന്നത് തുടരുകയായിരുന്നു. അതോടെയാണ് കൂടുതല് കര്ശനമായി വിലക്ക് നടപ്പിലാക്കാന് കോളേജ് മുന്നിട്ടിറങ്ങിയത്. വിദ്യാര്ത്ഥികള് ആകട്ടെ തീരുമാനത്തോട് കടുത്ത എതിര്പ്പാണ് പ്രകടിപ്പിക്കുന്നത്.
