സമൂഹത്തിലെ പല മേഖലകളിലും കാഴ്ച വൈകല്യമുള്ളവര് ഒട്ടനവധി പ്രതിസന്ധികള് നേരിടാറുണ്ട്. ഇവയില് നിസ്സാരമെന്ന് തോന്നാമെങ്കിലും ഏറെ ചിന്തിക്കേണ്ടി ഇരിക്കണ്ട കാര്യമാണ് കാഴ്ച പ്രശ്നമുള്ള ആളുകള് ഹോട്ടലുകളില് കയറുമ്പോള് നേരിടുന്ന പ്രശ്നങ്ങള്. കാരണം ഇത്തരത്തിലുള്ള ആളുകള് റെസ്റ്റോറന്റുകളിലെ ഭക്ഷണ മെനു വായിക്കാന് ഏറെ പ്രയാസം നേരിടുന്നത് ഒരു യാഥാര്ത്ഥ്യമാണ്. ചെറിയ അക്ഷരങ്ങളില് അച്ചടിച്ച ഭക്ഷണമെനു കാഴ്ച പ്രശ്നമുള്ളവര്ക്ക് വായിക്കാന് കഴിയില്ല. ഈ പ്രശ്നത്തിന് പരിഹാരവുമായി ഒരു റെസ്റ്റോറന്റ് ഇപ്പോള് രംഗത്തെത്തിയിരിക്കുകയാണ്.
മധ്യപ്രദേശിലെ ഇന്ഡോറിലെ ഒരു റെസ്റ്റോറന്റാണ് ഇന്ത്യയില് ആദ്യമായി ബ്രെയില് ലിപിയിലുള്ള മെനു കാര്ഡുകള് അവതരിപ്പിച്ചത്. കാഴ്ച വൈകല്യമുള്ള വ്യക്തികള്ക്ക് ഇനി മെനുവിലൂടെ വിരലുകള് ഓടിച്ച് തങ്ങള്ക്ക് ഇഷ്ടമുള്ള ഭക്ഷണം ഓഡര് ചെയ്ത് കഴിക്കാം. ഇന്ഡോറിലെ ഗുരുകൃപ റെസ്റ്റോറന്റാണ കഴിഞ്ഞ ശനിയാഴ്ച മുതല് തങ്ങളുടെ പുതിയ പരിഷ്ക്കാരം ആരംഭിച്ചത്. പുതിയ മെനു ഉപയോഗിച്ച് ഭക്ഷണം കഴിക്കുന്നതിനായി റെസ്റ്റോറന്റ് മഹേഷ് ദൃഷ്ടിഹിന് കല്യാണ് സംഘില് നിന്നുള്ള കാഴ്ച വൈകല്യമുള്ള കുട്ടികളെ ഭക്ഷണം കഴിക്കാനായി ക്ഷണിച്ചു. ബ്രെയില് ലിപിയില് ആലേഖനം ചെയ്തിരിക്കുന്ന മെനു കാര്ഡുകള് പരിശോധിച്ച് ഈ കുട്ടികള്ക്ക് സ്വതന്ത്രമായി ഓര്ഡറുകള് നല്കി ഭക്ഷണം കഴിച്ചെന്നും റിപ്പോര്ട്ടുകള് പറയുന്നു.
റെസ്റ്റോറന്റ് ഓപ്പറേറ്റര്മാരും കോണ്ഫെഡറേഷന് ഓഫ് ഇന്ത്യന് ഇന്ഡസ്ട്രിയുടെ യംഗ് ഇന്ത്യന്സ് ഗ്രൂപ്പും തമ്മിലുള്ള കൂടിക്കാഴ്ചയില് നിന്നാണ് ഈ സംരംഭത്തിന് പ്രേരണ ലഭിച്ചതെന്ന് റെസ്റ്റോറന്റ് ഉടമകള് പറഞ്ഞു. ''മഹേഷ് ദൃഷ്ടിഹിന് കല്യാണ് സംഘിലെ കാഴ്ച വൈകല്യമുള്ള കുട്ടികളെ റെസ്റ്റോറന്റിലേക്ക് ഭക്ഷണം കഴിക്കാന് ഞങ്ങള് ക്ഷണിച്ചിട്ടുണ്ട്. അവര്ക്കായി ഞങ്ങള് റെസ്റ്റോറന്റില് ബ്രെയില് ലിപിയില് മെനു കാര്ഡുകള് നല്കി. ഈ ബ്രെയിലി സ്ക്രിപ്റ്റ് കാര്ഡുകള് കഴ്ച പരിമിതരായ ആളുകള്ക്കായി ഇന്ന് മുതല് ഈ റെസ്റ്റോറന്റില് സൂക്ഷിക്കും.' യംഗ് ഇന്ത്യന് ഗ്രൂപ്പിന്റെ ചെയര്പേഴ്സണ് ഭാവ്ന ഗനേദിവാള് എഎന്ഐയോട് പറഞ്ഞു. ചണ്ഡീഗഡില് നിന്നും കൂടുതല് ബ്രെയില് സ്ക്രിപ്റ്റ് കാര്ഡുകള് ഓര്ഡര് ചെയ്തിട്ടുണ്ടെന്നും അദ്ദേഹം അറിയിച്ചു. ''ഇത്തരം 10 കാര്ഡുകള് ഞങ്ങള് മറ്റ് റെസ്റ്റോറന്റുകളിലേക്കും അയയ്ക്കും. ഈ റെസ്റ്റോറന്റുകളെല്ലാം ബ്രെയിലി സ്ക്രിപ്റ്റ് മെനു കാര്ഡുകള് കൈവശം വയ്ക്കാന് സമ്മതിച്ചിട്ടുണ്ട്,' അദ്ദേഹം കൂട്ടിചേര്ത്തു.
