ന്യൂഡല്ഹി: ഇന്ത്യന് നയതന്ത്ര ഉദ്യോഗസ്ഥനെ പുറത്താക്കിയ കാനഡയുടെ നടപടിക്ക് പിന്നാലെ ഇന്ത്യയിലെ കനേഡിയന് നയതന്ത്ര ഉദ്യോഗസ്ഥനെ ഇന്ത്യയും പുറത്താക്കി. കനേഡിയന് ഹൈക്കമ്മീഷണര് കാമറോണ് മക്കേയെ വിളിച്ചുവരുത്തിയാണ് ഇന്ത്യ പുറത്താക്കിയത്.
ഖലിസ്ഥാന് തീവ്രവാദി നേതാവ് കൊല്ലപ്പെട്ട വിഷയത്തില് ഇന്ത്യയും കാനഡയും തമ്മിലുള്ള നയതന്ത്രബന്ധം രൂക്ഷമായതിന് പിന്നാലെയാണ് ഇരു രാജ്യങ്ങളും നയതന്ത്ര ഉദ്യോഗസ്ഥരെ പുറത്താക്കിയത്. അഞ്ചു ദിവസത്തിനുള്ള ഇന്ത്യ വിടാനാണ് ആവശ്യപ്പെട്ടിരിക്കുന്നത്.
ഖലിസ്ഥാന് തീവ്രവാദി നേതാവ് ഹര്ദീപ്സിംഗ് നിജ്ജാര് കാനഡയില് ജൂണില് വെടിയേറ്റു മരിച്ച സംഭവത്തിന് പിന്നില് ഇന്ത്യയാണെന്ന് കാനഡ ആരോപിച്ചിരുന്നു. കാനഡയുടെ പരമാധികാരത്തിനും അഖണ്ഡതയ്ക്കും മേലുള്ള കൈകടത്തല് എന്നാരോപിച്ചാണ് കാനഡ് ഇന്ത്യന് നയതന്ത്ര ഉദ്യോഗസ്ഥനെ പുറത്താക്കിയത്. വിശ്വസനീയമായ തെളിവ് കിട്ടിയിട്ടുണ്ടെന്നും കാനഡ് പ്രധാനമന്ത്രി ജസ്റ്റിന് ട്രൂഡോ പറഞ്ഞു.
ട്രൂഡോ ഈ ആരോപണം നടത്തിയതിന് തൊട്ടുപിന്നാലെയാണ് ഇന്ത്യയുടെ സീനിയര് ഡിപ്ളോമാറ്റിനെ പുറത്താക്കിയത്. എന്നാല് കനേഡിയന് പ്രധാനമന്ത്രിയുടെ പ്രസ്താവന ഇന്ത്യ തള്ളുകയാണെന്നും കാനഡയില് നടന്ന അക്രമത്തില് ഇന്ത്യയ്ക്ക് ഒരു പങ്കുമില്ലെന്നും ഇന്ത്യന് വിദേശകാര്യമന്ത്രാലയം പുറത്തിറക്കിയ പ്രസ്താവനയില് പറയുന്നു. ഇത്തരം ആരോപണങ്ങള് നടത്തി തീവ്രവാദം പോലെയുള്ള ഗൗരവതരമായ വിഷയത്തില് നിന്നും ശ്രദ്ധ തിരിക്കാന് ശ്രമിക്കരുതെന്നും ഇന്ത്യ കാനഡയോട് പറഞ്ഞു.
ഈ വര്ഷം ജൂണില് കനേഡിയന് പ്രവിശ്യയായ ബ്രിട്ടീഷ് കൊളംബിയയിലെ ഒരു ഗുരുദ്വാരയ്ക്ക് പുറത്തുവെച്ചായിരുന്നു നിജ്ജാര് വെടിയേറ്റ് മരിച്ചത്. ഇന്ത്യയില് നടന്ന പല കുറ്റകൃത്യവുമായി ബന്ധപ്പെട്ട് ഇന്ത്യ തിരയുന്ന ഭീകരനാണ് നിജ്ജാര്.
