മലയാള സിനിമയിലെ കാരണവരായ മധു നവതി ആഘോഷിക്കുകയാണ്. താരങ്ങളെല്ലാം അദ്ദേഹത്തിന് ആശംസ അറിയിച്ചിരുന്നു. തെന്നിന്ത്യന് സിനിമകളിലെല്ലാം അദ്ദേഹം സാന്നിധ്യം അറിയിച്ചിരുന്നു. 400 ലധികം സിനിമകളില് വേഷമിട്ട അദ്ദേഹം സംവിധായകനായും നിര്മ്മാതാവായും തിളങ്ങിയിരുന്നു. ജെസി ഡാനിയേല് പുരസ്കാരമുള്പ്പടെ നിരവധി ബഹുമതികളും അദ്ദേഹം സ്വന്തമാക്കിയിരുന്നു. മധുവിന് ആശംസ അറിയിച്ചിരിക്കുകയാണ് റഹ്മാന്. അദ്ദേഹത്തിനൊപ്പമുള്ള ചിത്രവും പോസ്റ്റ് ചെയ്തിരുന്നു.
പ്രിയപ്പെട്ട മധുസാറിന് പിറന്നാളാണ് ഇന്ന്. ഭരതേട്ടന്റെ ഇത്തിരിപ്പൂവേ ചുവന്ന പൂവേ മുതല് എത്രയെത്ര സിനിമകളില് എന്റെ അച്ഛനായി. ഒരിക്കല് ഒരിടത്ത്, കഥ ഇതുവരെ, അറിയാത്ത വീഥികള്, ഇവിടെ ഈ തീരത്ത്, വീണമീട്ടിയ വിലങ്ങുകള്...ഓര്ത്തെടുക്കാന് പോലും ആവുന്നില്ല. ക്യാമറയ്ക്കു മുന്നിലും പിന്നിലും മധുസാറിന്റെ സ്നേഹം അനുഭവിക്കാന് എനിക്കു ഭാഗ്യം കിട്ടി.
എന്റെ ഉപ്പയുടെ അതേ കണ്ണുകളാണ് അദ്ദേഹത്തിന്റേതുമെന്ന് എനിക്ക് തോന്നിയിട്ടുണ്ട്. അഭിനയിക്കുമ്പോള് ആ കണ്ണുകള് നിറഞ്ഞുകണ്ടാല് എന്റെ കണ്ണും അറിയാതെ നിറഞ്ഞുപോകുമായിരുന്നു. അത്തരം അഭിനയമുഹൂര്ത്തങ്ങള് ഇപ്പോഴും മനസ്സിലുണ്ട്..
സെറ്റിലെ കളിചിരി തമാശകളില് അദ്ദേഹം ഞങ്ങള്ക്കൊപ്പം പങ്കാളിയായി. എല്ലാവരോടും നിറഞ്ഞ സ്നേഹം മാത്രം. ആ നന്മയുടെ തെളിച്ചമാണ് അദ്ദേഹത്തിന്റെ മുഖത്ത് ഇപ്പോഴും കാണുന്ന പ്രകാശമെന്ന് എനിക്ക് തോന്നിയിട്ടുണ്ട്.മധുരം പകര്ന്ന ആ സ്നേഹപ്രകാശത്തിന് നവതി ആശംസകള്... എന്നായിരുന്നു റഹ്മാന് കുറിച്ചത്.
