ഹൈദരാബാദില് കഴിഞ്ഞ ദിവസം ഉദ്ഘാടനം കഴിഞ്ഞ ഒരു ലുലുമാളില് നിന്ന് പുറത്തുവരുന്ന ഞെട്ടിക്കുന്ന ദൃശ്യങ്ങളാണ് ഇപ്പോള് സമൂഹ മാധ്യമങ്ങളിലൂടെ പുറത്തുവരുന്നത്. കുക്കട്ട്പള്ളിയിലെ മാളിലാണ് നാടകീയ സംഭവങ്ങള് നടന്നിരിക്കുന്നത്. ഉദ്ഘാടനത്തോട് അനുബന്ധിച്ച് ഓഫറുകള് ഇട്ടിരുന്നതിനാല് സൂപ്പര് മാര്ക്കറ്റുകളിലേക്ക് ജനം ഇരച്ചുകറയുകയായിരുന്നു.
ജനത്തിരക്ക് നിയന്ത്രിക്കാന് കഴിയാതെ വന്നതോടെ പലരും അവസരം മുതലെടുത്തു. ചിലര് ഷെല്ഫുകളില് നിന്നും മറ്റും ഭക്ഷണ സാധനങ്ങള് ബില് ചെയ്യാതെ എടുത്തു കഴിക്കുകയായിരുന്നു. മറ്റ് ചിലര് പാതി ഭക്ഷണം കഴിച്ചിട്ട് അവശിഷ്ടങ്ങള് മാളിനുള്ളില് തന്നെ ഉപേക്ഷിച്ചു. ഇതിന്റെ ദൃശ്യങ്ങള് സോഷ്യല് മീഡിയയിലൂടെ വ്യാപകമായി പ്രചരിക്കുന്നുണ്ട്. വലിയ തോതില് മോഷണം നടന്നതായും റിപ്പോര്ട്ടുണ്ട്. ആളുകള് കൂട്ടത്തോടെ എത്തിയതോടെ മാളിലെ എസ്കലേറ്ററുകളുടെ പ്രവര്ത്തനം പോലും തടസ്സപ്പെട്ടിരുന്നു.
ഒരുകൂട്ടം ആളുകള് മനപ്പൂര്വ്വം പ്രശ്നം സൃഷ്ടിക്കുകയെന്ന ലക്ഷ്യത്തോടെയായിരുന്നു എത്തിയതെന്നാണ് ദൃക്സാക്ഷികളും സുരക്ഷാ ഉദ്യോഗസ്ഥരും പറയുന്നത്. പ്രത്യേകിച്ച് പാക്കേജുചെയ്ത സാധനങ്ങളും പാനീയങ്ങളും ഇവര് ബില് ചെയ്യാതെ എടുത്ത് ഉപയോഗിക്കുകയായിരുന്നു. ചില വസ്തുകള് പാക്കറ്റ് പൊട്ടിച്ച് ഉപയോഗ ശൂന്യമാക്കുകയും ചെയ്തിട്ടുണ്ട്.
ലുലു ഗ്രൂപ്പ് ഇന്റര്നാഷണലിന്റെ തെലങ്കാനയിലെ ആദ്യ ഹൈപ്പര്മാര്ക്കറ്റും മാളുമാണ് ഹൈദരാബാദിലേത്. ലുലു ഗ്രൂപ്പ് ചെയര്മാന് യൂസഫലി സാന്നിധ്യത്തില് തെലങ്കാന ഐ ടി, വ്യവസായ മന്ത്രി കെ ടി രാമറാവുവാണ് കഴിഞ്ഞ ബുധനാഴ്ച മാള് ഉദ്ഘാടനം ചെയ്തത്. ഹൈദരാബാദിലെ അതിവേഗം വികസിച്ചുകൊണ്ടിരിക്കുന്ന പ്രദേശമായ കുക്കട്ട്പള്ളിയിലാണ് മെഗാ ഷോപ്പിംഗ് മാള് സ്ഥിതി ചെയ്യുന്നത്.
