എല്ലാ സമ്മര്ദ്ദവും ഉണ്ടായത് മുഖ്യമന്ത്രിയുടെ ഓഫീസില് നിന്നുമാണെന്നും തെറ്റാണ് ചെയ്യുന്നതെന്ന്് അറിഞ്ഞുകൊണ്ടാണ് ഡോ.ഗോപിനാഥ് രവീന്ദ്രന്റെ പുനര് നിയമനത്തില് ഒപ്പുവെച്ചതെന്നും പ്രതികരിച്ച് ഗവര്ണര്. കണ്ണൂര് വൈസ് ചാന്സലാറായി ഡോ. ഗോപിനാഥ് രവീന്ദ്രന്റെ പുനര് നിയമനം സുപ്രീംകോടതി റദ്ദാക്കിയതിന് പിന്നാലെയായിരുന്നു ഗവര്ണര് ആരിഫ് മുഹമ്മദ് ഖാന്റെ പ്രതികരണം.
മുഖ്യമന്ത്രിയുടെ ഉപദേശകന് തന്നെ വന്നു കണ്ടെന്നും മുഖ്യമന്ത്രിക്ക് തുടരാന് കഴിയുമോ എന്നത് ധാര്മ്മിക ചോദ്യമെന്നും ആരിഫ് മുഹമ്മദ് ഖാന് പറഞ്ഞു. ഉന്നതവിദ്യാഭ്യാസമന്ത്രി വെറും ഉപകരണം മാത്രമാണ് മുഖ്യമന്ത്രിയുടെ ഓഫീസാണ് എല്ലാം ചെയ്തതെന്നും ഗവര്ണര് തുറന്നടിച്ചു. വിസിയുടെ പുനര് നിയമന ആവശ്യം വന്നപ്പോള് തന്നെ ഇത് ചട്ട വിരുദ്ധമെന്ന് പറഞ്ഞിരുന്നതാണ്. എന്നാല് എ ജിയുടെ നിയമോപദേശം ഉണ്ടെന്ന് സര്ക്കാര് അറിയിക്കുകയായിരുന്നുവെന്നും ഗവര്ണര് വിശദീകരിച്ചു. മുഖ്യമന്ത്രിക്ക് തുടരാന് കഴിയുമോ എന്നത് ധാര്മികമായ ചോദ്യമാണ്. ഇക്കാര്യം അവര് തീരുമാനിക്കട്ടെ. താന് ആരുടേയും രാജി ആവശ്യപ്പെടുന്നില്ലെന്നും ഗവര്ണര് വിശദീകരിച്ചു.
ചാന്സലര് തന്റെ അധികാരപരിധി അടിയറ വെച്ചെന്നും വിഷയത്തില് ബാഹ്യശക്തികളുടെ ഇടപെടല് ഉണ്ടായെന്നും കാണിച്ചാണ് പുനര് നിയമനം സുപ്രീംകോടതി റദ്ദാക്കിയത്. വിധി അംഗീകരിക്കുന്നതായി ഗോപിനാഥ് രവീന്ദ്രനും പറഞ്ഞു. വി.സി. സ്ഥാനത്ത് നിന്നും പുറത്തായി ഗോപിനാഥ് രവീന്ദ്രന് നാളെ ഡല്ഹിയിലെ ജാമിയ മിലിയ സര്വകലാശാലയില് സ്ഥിരം ജോലിയില് പ്രവേശിക്കാനൊരുങ്ങുകയാണ്.
