തൊടിയൂര്: ദമ്പതികളുടെ തര്ക്കപരിഹാരത്തിന് എത്തിയ പഞ്ചായത്ത് വൈസ് പ്രസിഡന്റ് വീട്ടിലുണ്ടായ കശപിശയില് ചവിട്ടേറ്റു മരിച്ചു. തൊടിയൂര് ഗ്രാമപഞ്ചായത്ത് വൈസ് പ്രസിഡന്റ് സലിം മണ്ണേലാണ് മരണമടഞ്ഞത്. വെള്ളിയാഴ്ച വൈകിട്ട് അഞ്ചുമണിയോടെ ചവിട്ടേറ്റ് ആശുപത്രിയിലേക്ക് കൊണ്ടുപോകുന്ന വഴിയില് തന്നെ മരണം സംഭവിക്കുകയായിരുന്നു. അക്രമികള് ഉടന് തന്നെ വാഹനത്തിയ കയറി രക്ഷപ്പെട്ടു.
ദമ്പതികള് തമ്മില് ദീര്ഘനാളായി നില നിന്നിരുന്ന പ്രശ്നം പരിഹരിക്കാന് ജമാ അത്ത് ഭാരവാഹികളും ബന്ധുക്കളുമെല്ലാം എത്തി പ്രശ്നം ചര്ച്ച ചെയ്യുമ്പോഴായിരുന്നു വാക്കേറ്റവും കയ്യേറ്റവും ഉണ്ടായത്. പാലോലിക്കുളങ്ങര ജമാഅത്തില് പെട്ട യുവാവും കോയിവിള ജമാ അത്ത് അംഗമായ ഭാര്യയും തമ്മിലായിരുന്നു തര്ക്കം. പ്രശ്നത്തെ തുടര്ന്ന് യുവതി അവരുടെ വീട്ടിലായിരുന്നു താമസം. പ്രശ്നം പറഞ്ഞു തീര്ക്കാന് ഇന്നലെ വൈകിട്ട് പാലോലിക്കുളങ്ങര ജമാഅത്ത് ഓഫീസില് എല്ലാവരും എത്തിയിരുന്നു.
സംഘര്ഷത്തിനിടയില് സലീം മണ്ണേല് ചവിട്ടേറ്റ് നിലത്തുവീഴുകയായിരുന്നു. ഉടന് തന്നെ ഒപ്പമുണ്ടായിരുന്നവര് കരുനാഗപ്പള്ളിയിലെ സ്വകാര്യ ആശുപത്രിയില് എത്തിച്ചെങ്കിലും മരണമടഞ്ഞതായി ഡോക്ടര്മാര് അറിയിക്കുകയായിരുന്നു. പോലീസ് എത്തി മൃതദേഹം പിന്നീട് മോര്ച്ചറിയിലേക്ക് മാറ്റി. കേസെടുത്തിട്ടുണ്ട്. അക്രമികള് ഉടന് തന്നെ വാഹനങ്ങളില് കയറി രക്ഷപ്പെടുകയും ചെയ്തു.
