തിരുവനന്തപുരം: പാഠ്യപദ്ധതി പരിഷ്കരണത്തിന്റെ ഭാഗമായി തയാറാക്കിയ പുതിയ പാഠപുസ്തകങ്ങള്ക്ക് തിരുവനന്തപുരത്ത് ചേര്ന്ന സംസ്ഥാന സ്കൂള് കരിക്കുലം സ്റ്റിയറിങ് കമ്മിറ്റി അംഗീകാരം നല്കിയതായി പൊതുവിദ്യാഭ്യാസ മന്ത്രി വി.ശിവന്കുട്ടി അറിയിച്ചു. ഒന്ന്, മൂന്ന്, അഞ്ച്, ഏഴ്, ഒന്പത് ക്ലാസുകളിലായി തയാറാക്കിയ 173 ടൈറ്റില് പാഠപുസ്തകങ്ങള്ക്കാണ് അംഗീകാരം നല്കിയതെന്ന് മന്ത്രി വാര്ത്താസമ്മേളനത്തില് പറഞ്ഞു.
16 വര്ഷത്തിനുശേഷമാണ് കേരളത്തിലെ പാഠ്യപദ്ധതിയും അതിന്റെ തുടര്ച്ചയായി പാഠപുസ്തകങ്ങളും സമഗ്രമായ മാറ്റത്തിന് വിധേയമാകുന്നതെന്ന് മന്ത്രി ചൂണ്ടിക്കാട്ടി. എല്ലാ പാഠപുസ്തകങ്ങളിലും ഭരണഘടനാ ആമുഖം ചേര്ത്തിട്ടുണ്ട്. കായികരംഗം, മാലിന്യ പ്രശ്നം, ശുചിത്വം, പൗരബോധം, തുല്യനീതി മുന്നിര്ത്തിയുള്ള ലിംഗ അവബോധം, ശാസ്ത്രബോധം, െഹെക്കോടതി അടക്കം നിര്ദ്ദേശം വെച്ച പ്രകാരം പോക്സോ നിയമങ്ങള്, കൃഷി, ജനാധിപത്യ മൂല്യങ്ങള്, മതനിരപേക്ഷത എന്നിവ പാഠപുസ്തകങ്ങളുടെ ഭാഗമാണ്. പാഠപുസ്തകങ്ങളില് കുട്ടികള് വരച്ച ചിത്രങ്ങളും ഉള്ക്കൊള്ളിച്ചിട്ടുണ്ട്.
മലയാളം, ഇംഗ്ലീഷ്, തമിഴ്, കന്നട ഭാഷകളിലാണ് പുസ്തകങ്ങള് തയാറാക്കിയിട്ടുള്ളത്. ഒന്നാം ക്ലാസിലെ എല്ലാ പുസ്തകങ്ങള്ക്കും പ്രവര്ത്തന പുസ്തകം അഥവാ ആക്ടിവിറ്റി ബുക്ക് തയാറാക്കും. അഞ്ചാം ക്ലാസു മുതല് കലാ വിദ്യാഭ്യാസം, തൊഴില് വിദ്യാഭ്യാസം എന്നിവയ്ക്ക് പാഠപുസ്തകങ്ങള് ഉണ്ടാകും. ഇത് ആദ്യമായാണ് ഇത്തരത്തില് ഒരു ക്രമീകരണം നടപ്പിലാക്കിയത്. പാഠപുസ്തകങ്ങള് പുറത്തിറക്കുന്നതോടൊപ്പം ഡിജിറ്റല് പതിപ്പു പ്രസിദ്ധീകരിക്കുമെന്നും മന്ത്രി പറഞ്ഞു.
അഞ്ച് മുതല് 10 വരെ തൊഴില് വിദ്യാഭ്യാസം നല്കും. ടൂറിസം, കൃഷി, ഐ.റ്റി., ടെക്സ്െറ്റെല്, െനെപുണ്യ വികസനം എന്നിവ ഉള്പ്പെടുന്നതാകും ഇത്. പാഠപുസ്തക പരിഷ്കരണത്തെ തുടര്ന്ന് അധ്യാപകര്ക്കുള്ള അധ്യാപക പുസ്തകങ്ങള് വികസിപ്പിക്കും. ഇതിന്റെ ഭാഗമായി അധ്യാപകര്ക്ക് മികച്ച പരിശീലനം നല്കും. കൂടാതെ രക്ഷാകര്ത്താക്കള്ക്കുള്ള പുസ്തകങ്ങളും വികസിപ്പിക്കും. രാജ്യത്ത് ആദ്യമായാണ് രക്ഷാകര്ത്താക്കള്ക്കുള്ള പുസ്തകങ്ങള് വികസിപ്പിക്കുന്നത്. രണ്ട് തീരുമാനങ്ങളും സമയബന്ധിതമായി പൂര്ത്തീകരിക്കുമെന്നും മന്ത്രി അറിയിച്ചു.
അടുത്ത അധ്യയന വര്ഷം സ്കൂള് തുറക്കുന്നതിന് രണ്ടാഴ്ച മുമ്പ് തന്നെ പുതിയ പാഠപുസ്തകങ്ങള് വിദ്യാര്ത്ഥികളിലേക്ക് എത്തിക്കാനുള്ള പ്രവര്ത്തനങ്ങളാണ് നടന്നു വരുന്നത്. പൊതു വിദ്യാഭ്യാസ വകുപ്പ് പ്രിന്സിപ്പല് സെക്രട്ടറി റാണി ജോര്ജ്, ഡയറക്ടര് എസ്. ഷാനവാസ് തുടങ്ങിയവരും വാര്ത്താസമ്മേളനത്തില് പങ്കെടുത്തു.
