മുംബൈ: പ്രത്യയശാസ്ത്രത്തില് ഉറച്ചുനില്ക്കുന്നവര് കുറയുന്നതും ഭരണകക്ഷിയുമായി ബന്ധം നിലനിര്ത്താന് ആഗ്രഹിക്കുന്ന അവസരവാദ രാഷ്ട്രീയക്കാര് കൂടുന്നതും ജനാധിപത്യത്തെ തകര്ക്കുമെന്ന് കേന്ദ്രമന്ത്രി നിതിന് ഗഡ്ക്കരി. ഏത് പാര്ട്ടിയുടെ സര്ക്കാരായാലും നന്നായി ജോലി ചെയ്യുന്നവര്ക്ക് ബഹുമാനം കിട്ടില്ലെന്നും മോശം പ്രവര്ത്തി ചെയ്യുന്നവര് ശിക്ഷിക്കപ്പെടില്ലെന്നും ഗഡ്കരി പറഞ്ഞു.
പാര്ലമെന്റംഗങ്ങളുടെ മാതൃകാപരമായ സംഭാവനകള്ക്കുള്ള പുരസ്കാരങ്ങള് നല്കുന്നതിനായി ലോക്മത് മീഡിയ ഗ്രൂപ്പ് ഇവിടെ സംഘടിപ്പിച്ച പരിപാടിയില് സംസാരിക്കുകയായിരുന്നു ഗഡ്ക്കരി. ഓരോരുത്തര്ക്കും പ്രത്യയശാസ്ത്രം ഉണ്ടെങ്കിലും അതില് ഉറച്ചു നില്ക്കുന്ന നേതാക്കളുടെ എണ്ണം ക്രമേണെ കുറഞ്ഞുകുറഞ്ഞു വരികയാണെന്നും പ്രത്യയശാസ്ത്രത്തിലെ ഇത്തരം അപചയം ജനാധിപത്യത്തിന് നല്ലതല്ലെന്നും പറഞ്ഞു.
ഏത് പാര്ട്ടിയുടെ സര്ക്കാരായാലും ശരി, ഒരു കാര്യം ഉറപ്പാണ്, നല്ല ജോലി ചെയ്യുന്നയാള്ക്ക് ഒരിക്കലും ബഹുമാനം ലഭിക്കില്ലെന്നും മോശം പ്രവൃത്തി ചെയ്യുന്നവര് ഒരിക്കലും ശിക്ഷിക്കപ്പെടില്ലെന്നും ഗഡ്കരി പറഞ്ഞു. ഞങ്ങള് വലതുപക്ഷമോ ഇടതുപക്ഷമോ അല്ല, ഞങ്ങള് അറിയപ്പെടുന്ന അവസരവാദികളാണെന്ന് ചിലര് തുറന്നുകാട്ടുകയാണെന്നും ഭരണകക്ഷിയുമായി ബന്ധം നിലനിര്ത്താനാണ് എല്ലാവരും ആഗ്രഹിക്കുന്നതെന്നും അദ്ദേഹം കൂട്ടിച്ചേര്ത്തു. സംവാദങ്ങളിലും ചര്ച്ചകളിലും അഭിപ്രായ വ്യത്യാസങ്ങളല്ല, ആശയങ്ങളുടെ അഭാവമാണ് ഞങ്ങളുടെ പ്രശ്നമെന്നും മുതിര്ന്ന ബിജെപി നേതാവ് പറഞ്ഞു.
രാഷ്ട്രീയക്കാര് വരുകയും പോകുകയും ചെയ്യുന്നുണ്ടെങ്കിലും അതത് നിയോജക മണ്ഡലങ്ങളിലെ ജനങ്ങള്ക്ക് വേണ്ടി അവര് ചെയ്ത പ്രവര്ത്തനങ്ങളാണ് ആത്യന്തികമായി പ്രാധാന്യമര്ഹിക്കുന്നതെന്നും അവര്ക്ക് ബഹുമാനം നല്കുമെന്നും ഗഡ്കരി പറഞ്ഞു. ''പബ്ലിസിറ്റിയും ജനപ്രീതിയും ആവശ്യമാണ്, എന്നാല് അവര് പാര്ലമെന്റില് എന്ത് സംസാരിക്കുന്നു എന്നതിനേക്കാള് പ്രധാനം അതാത് മണ്ഡലങ്ങളിലെ ജനങ്ങള്ക്ക് വേണ്ടി അവര് എങ്ങനെ പ്രവര്ത്തിക്കുന്നു എന്നതാണ്,'' അദ്ദേഹം പറഞ്ഞു.
ആര്ജെഡി അധ്യക്ഷന് ലാലു പ്രസാദ് യാദവിന്റെ വാക്ചാതുര്യത്തെ പ്രശംസിച്ച ഗഡ്കരി, മുന് പ്രതിരോധ മന്ത്രി ജോര്ജ് ഫെര്ണാണ്ടസിന്റെ പെരുമാറ്റം, ലാളിത്യം, വ്യക്തിത്വം എന്നിവയില് നിന്ന് താന് ഒരുപാട് കാര്യങ്ങള് പഠിച്ചിട്ടുണ്ടെന്നും പറഞ്ഞു. അടല് ബിഹാരി വാജ്പേയിക്ക് ശേഷം എന്നെ വളരെയധികം ആകര്ഷിച്ച വ്യക്തി ജോര്ജ് ഫെര്ണാണ്ടസാണെന്നും അദ്ദേഹം പറഞ്ഞു.
അടുത്തിടെ മരണാനന്തര ബഹുമതിയായി ഭാരതരത്നം ലഭിച്ച ബിഹാര് മുന് മുഖ്യമന്ത്രി കര്പ്പൂരി ഠാക്കൂര് മുഖ്യമന്ത്രിസ്ഥാനത്ത് നിന്നും ഇറങ്ങിയ ശേഷം ഓട്ടോറിക്ഷയിലാണ് യാത്ര ചെയ്തത്. അദ്ദേഹത്തിന്റെ അവസ്ഥ വളരെ സാധാരണമായിരുന്നെന്നും പറഞ്ഞു, രാഷ്ട്രീയ നേതാക്കള് ഇത്തരക്കാരില് നിന്ന് പ്രചോദനം ഉള്ക്കൊണ്ട് പ്രവര്ത്തിക്കണമെന്ന് നിര്ദ്ദേശിച്ചു.
