ചണ്ഡീഗഡ്: തെരഞ്ഞെടുപ്പുവര്ഷം കേന്ദ്രസര്ക്കാരിനെ പ്രതിരോധത്തിലാക്കി തലസ്ഥാനം വളയാന് ഒരുങ്ങിയിറങ്ങിയ കര്ഷകസംഘടനകള് പ്രതിബന്ധങ്ങളെ മറികടക്കാന് അവലംബിക്കുന്ന മാര്ഗങ്ങളില് അമ്പരന്ന് സുരക്ഷാസേന. കണ്ണീര്വാതകഷെല്ലുകള് വഹിച്ചെത്തുന്ന ഡ്രോണുകളെ കര്ഷകര് നേരിടുന്നത് പട്ടം ഉപയോഗിച്ച്! പഞ്ചാബ്, ഹരിയാന ഉള്പ്പെടെയുള്ള സംസ്ഥാനങ്ങളില്നിന്ന് ട്രാക്ടറുകളിലും കാല്നടയായും ഡല്ഹി ലക്ഷ്യമാക്കിയെത്തുന്ന കര്ഷകരെ തടയാന് യുദ്ധസമാന സാഹചര്യങ്ങളാണ് അതിര്ത്തികളില് ഒരുക്കിയിരിക്കുന്നത്.
ആയിരക്കണക്കിന് സേനാംഗങ്ങള്ക്കു പുറമേ ഇരുമ്പു ബാരിക്കേഡുകള്, കോണ്ക്രീറ്റ് പാളികള്, ഇരുമ്പാണിപ്പാളികള് തുടങ്ങിയവ അവയില് ചിലതുമാത്രം. കഴിഞ്ഞ തവണത്തേതില്നിന്നു ഭിന്നമായി നേരിട്ടല്ലാതെ ഡ്രോണുകള് ഉപയോഗിച്ച് കണ്ണീര്വാതകഷെല്ലുകള് സേന വ്യാപകമായി പ്രയോഗിക്കുന്നതു ശ്രദ്ധയില്പ്പെട്ടതോടെയാണു കര്ഷകര് മറുതന്ത്രം പയറ്റിയത്. ആധുനികഡ്രോണുകളെ വീഴ്ത്താന് പട്ടം ഉപയോഗിക്കാനാണ് നിര്ദേശം. ആകാശത്തേക്കു പറത്തിവിടുന്ന പട്ടത്തിന്റെ നൂലുകളില് കുരുങ്ങി ഷെല്ലുകളുമായെത്തുന്ന ഡ്രോണുകള് നിലംപൊത്തും. ദൗത്യം പരാജയപ്പെടുന്നതുമാത്രമല്ല, ഉപകരണം തകരാറിലാകുന്നത് സാമ്പത്തികനഷ്ടത്തിനും വഴിവയ്ക്കുമെന്നു ചൂണ്ടിക്കാണിക്കപ്പെടുന്നു.
വിളകള്ക്കു താങ്ങുവില ഉറപ്പാക്കാന് നിയമനിര്മാണം ഉള്പ്പെടെയുള്ള ആവശ്യങ്ങളുന്നയിച്ച് കര്ഷകരുടെ ഡല്ഹി ചലോ മാര്ച്ച് രണ്ടാം ദിവസത്തിലേക്കു കടന്നതോടെയാണ് ആക്രമണവും പ്രതിരോധവും പുതിയമാനങ്ങളിലേക്കു കടന്നത്. സമരക്കാരും പോലീസും തമ്മില് ഇന്നലെയും പലയിടങ്ങളിലും നേര്ക്കുനേര് ഏറ്റുമുട്ടലുകളുണ്ടായി. അംബാലയ്ക്കു സമീപം ശംഭു അതിര്ത്തിയില് സേന സ്ഥാപിച്ച ബഹുതല ബാരിക്കേഡുകള് മറികടക്കാന് കര്ഷകര് ശ്രമിച്ചു. സിമെന്റ് ഉപയോഗിച്ച് ഉറപ്പിച്ചിരിക്കുന്ന പ്രതിബന്ധങ്ങള് ട്രാക്ടറുകള് ഉപയോഗിച്ച് ഇടിച്ചുതകര്ക്കാന് സന്നദ്ധരായി യുവകര്ഷകരെത്തിയതു സ്ഥിതി വഷളാക്കി.
കണ്ണീര്വാതക ഷെല്ലുകള് പ്രയോഗിച്ച് ഇവരെ തുരത്താന് ശ്രമിച്ചെങ്കിലും താല്ക്കാലികമായി പിരിഞ്ഞുപോയവര് വീണ്ടും സംഘടിച്ചെത്തിയതു പോലീസിനു തലവേദനയായി. നനഞ്ഞ തുണികളും കുപ്പിവെള്ളവും ഉള്പ്പെടെയുള്ളവ െകെയില് കരുതിയാണ് ഇന്നലെ കണ്ണീര്വാതകപ്രയോഗത്തെ കര്ഷകര് നേരിട്ടത്. അതിനിടയിലായിരുന്നു പട്ടം ഉപയോഗിച്ചുള്ള പ്രതിരോധം.
മാര്ച്ച് സംഘര്ഷഭരിതമായി തുടരുന്നതിനിടയിലും അനുനയനീക്കങ്ങള് സജീവമാണ്. ക്രിയാത്മക ചര്ച്ചകളിലൂടെ പ്രശ്നത്തിനു പരിഹാരം കാണാന് കര്ഷകര് സന്നദ്ധരാകണമെന്ന് കേന്ദ്രകൃഷിമന്ത്രി അര്ജുന് മുണ്ട ഇന്നലെയും അഭ്യര്ഥിച്ചു. ഏറ്റുമുട്ടലിലൂടെ ലക്ഷ്യം നേടാനുള്ള ശ്രമങ്ങള് ഉപേക്ഷിക്കണം. സാധാരണക്കാരുടെ െദെനംദിനജീവിത്തിനു ഭംഗം വരുത്തുന്ന പ്രവൃത്തികളില്നിന്ന് കര്ഷകര് പിന്മാറണമെന്നും മുണ്ട അഭ്യര്ഥിച്ചു.
