ന്യൂഡല്‍ഹി: കഴിഞ്ഞ ദിവസം വൈകിട്ട് 4.30 യോടെയായിരുന്നു നിബിന്‍ അപകടത്തില്‍ പെട്ടതായി വീട്ടുകാര്‍ക്ക് വിവരം കിട്ടിയത്. ഒരു ബന്ധുവിളിച്ചു പറഞ്ഞായിരുന്നു വിവരമറിഞ്ഞത്. എന്നാല്‍ രാത്രി 12.30 യോടെ വീട്ടുകാര്‍ക്ക് വലിയ ദു:ഖത്തിന് കാരണമായി അത് മരണവാര്‍ത്തയായി മാറിയെന്ന് നിബിന്റെ പിതാവ് ആന്റണി മാക്‌സ്‌വെല്‍ പറഞ്ഞു. ഇസ്രായേലില്‍ മിസൈല്‍ ആക്രമണത്തില്‍ കൊല്ലപ്പെട്ട പാറ്റ് നിബിന്‍ മാക്‌സ്‌വെല്ലിന്റെ മരണം ഇപ്പോഴും കുടുംബത്തിന് വിശ്വസിക്കാനായിട്ടില്ല. രണ്ടുമാസം മുമ്പായിരുന്ന നിബിന്‍ ഇസ്രായേലില്‍ എത്തിയത്.
ആന്റണി മാക്‌സ്‌വെല്ലിന്റെ മൂന്ന് മക്കളില്‍ രണ്ടുപേര്‍ ഇസ്രായേലിലും ഒരാള്‍ അബുദാബിയിലുമാണ്. മൃതദേഹം നാലു ദിവസത്തിനുള്ളില്‍ നാട്ടിലെത്തും. കൊല്ലപ്പെട്ട നിബിന്റെ ഭാര്യ ഏഴുമാസം ഗര്‍ഭിണിയാണ്. അഞ്ചുവയസ്സുള്ള മൂത്തമകളുമുണ്ട്. നിബിന്റെ മരണവിവരം ഇസ്രായേലിലുള്ള അവരുടെ കുടുംബമാണ് നാട്ടില്‍ അറിയിച്ചത്. തിങ്കളാഴ്ചയായിരുന്നു ലെബനനിലെ തീവ്രവാദഗ്രൂപ്പിന്റെ ആക്രമണത്തില്‍ നിബിന്‍ കൊല്ലപ്പെട്ടത്. മൃതദേഹം സിവ് ഹോസ്റ്റിലില്‍ സൂക്ഷിച്ചിരിക്കുകയാണ്. മൃതദേഹം നാട്ടിലേക്ക് കൊണ്ടുപോകാന്‍ ഇവര്‍ ഇസ്രായേലിലെ ഇന്ത്യന്‍ എംബസിയെ സമീപിച്ചിരിക്കുകയാണ്. രണ്ടു മലയാളികള്‍ക്ക് കൂടി പരിക്കേറ്റിട്ടുണ്ട്. ഇടുക്കിയില്‍ നിന്നുള്ള പോള്‍ മെല്‍വിനും ബുഷ് ജോസഫിനും.
നിബിന്റെ മരണത്തില്‍ ഇസ്രായേലും ഞെട്ടലും ദു:ഖവും രേഖപ്പെടുത്തിയിട്ടുണ്ട്. ആക്രമണത്തില്‍ പരിക്കേറ്റ് ചികിത്സയില്‍ കഴിയുന്ന ബുഷ് ജോസഫിനും പോള്‍ മെല്‍വിനും ഏറ്റവും മികച്ച ചികിത്സ നല്‍കുമെന്നും ഇസ്രായേല്‍ പ്രതികരിച്ചു. തിങ്കളാഴ്ച പ്രദേശിക സമയം രാവില്‍െ 11 മണിയോടെയാണ് ആക്രമണം ഉണ്ടായത്. കാര്‍ഷികമേഖലയും കൃഷിക്കാര്‍ കൂടുതലുള്ളതുമായ വടക്കന്‍ ഇസ്രായേലിലെ ഗലീലി മേഖലയിലെ മാര്‍ഗാലിയോട്ടിലെ ഒരു ഫാം ഹൗസിലായിരുന്നു ആക്രമണം ഉണ്ടായത്. ഇവിടെ കൃഷിജോലികള്‍ ചെയ്തു വരികയായിരുന്നു നിബിനും മറ്റുള്ളവരും. കൃഷിയിടത്ത് ജോലി ചെയ്യുന്നതിനിടയിലായിരുന്നു മിസൈല്‍ ആക്രമണം ഉണ്ടായത്.
Comments