തിരുവനന്തപുരം; കോലഞ്ചേരി സെന്റ് പിറ്റേഴ്സ് കോളേജില് പരിപാടി അവതരിപ്പിക്കുന്നതിനിടെ ഗായകന് ജാസി ഗിഫ്റ്റിന്റെ കൈയില് നിന്നും മൈക്കി പിടിച്ച്വാങ്ങിയ പ്രിന്സിപ്പലിന്റെ നടപടി വലിയ വിവാദം സൃഷ്ടിച്ചിരുന്നു.സംഭവത്തിനെ തുടര്ന്ന് ഉന്നത വിദ്യാഭ്യാസ മന്ത്രിയായ ആര് ബിന്ദു ഖേദം രേഖപ്പെടുത്തി. ഫേസ്ബുക്കിലൂടെയാണ് മന്ത്രി ഖേദം രേഖപ്പെടുത്തിയത്.
മന്ത്രിയുടെ ഫേസ്ബുക്ക് കുറിപ്പ് ഇങ്ങനെ;
കലാകാരന്മാരെയും സാംസ്കാരിക നായകരേയും മറ്റും ക്ഷണിച്ചുവരുത്തി അപമാനിക്കുന്നത് ഒരു കലാലയത്തിനും ഭൂഷണമല്ല. മലയാളഗാനശാഖയില് നൂതനമായ ഒരു ധാരയ്ക്ക് രൂപം കൊടുത്ത ജാസി ഗിഫ്റ്റ് എന്ന അനുഗൃഹീത കലാകാരന് ഉണ്ടായ ദുരനുഭവത്തില് ഖേദം രേഖപ്പെടുത്തുന്നു.....
കോലഞ്ചേരി സെന്റ് പീറ്റേഴ്സ് കോളേജിലെ പ്രിന്സിപ്പാള് കാളേജ് ഡേ പരിപാടിയില് പാടുന്നതിനിടെ ഗായകന് ജാസി ഗിഫ്റ്റ്ിന്റെ കൈയില് നിന്ന് മൈക്ക് പിടിച്ചുവാങ്ങുകയായിരുന്നു. ജാസി ഗിഫ്റ്റിനൊപ്പം കോറസ് പാടാന് പുറത്തു നിന്ന് മറ്റൊരു പാട്ടുകാരന് എത്തിച്ചിരുന്നു. എന്നാല് ഉദ്ഘാടകന് ആയ ജാസി ഗിഫ്റ്റിന് മാത്രം പാടാനാണ് അനുമതി നല്കിയിരുന്നതെന്ന് പ്രിന്സിപ്പാള് നിലപാടെടുക്കുകയും തുടര്ന്ന് മൈക്ക് പിടിച്ച് വാങ്ങുകയുമായിരുന്നു. ഇതോടെ പ്രിന്സിപ്പാളിന്റെ നടപടിയില് പ്രതിഷേധിച്ച് ഗായകന് വേദിയില് നിന്നും ഇറങ്ങിപ്പോയി.
അതേസമയം, പുറത്ത് നിന്നുള്ള ആളുകളുടെ സംഗീത നിശ കോളേജിനകത്ത് നടത്തുന്നതിന് നിയന്ത്രണങ്ങളുണ്ടെന്നും ഇക്കാര്യം മൈക്ക് വാങ്ങി പറയുക മാത്രമാണ് ചെയ്തതെന്നുമാണ് സംഭവത്തില് പ്രിന്സിപ്പാള് പ്രതികരിച്ചത്. എന്നാല്, പ്രിന്സിപ്പാളിന്റെ നടപടി വിഷമമുണ്ടാക്കിയെന്നാണ് ജാസി ഗിഫ്റ്റ് പ്രതികരിച്ചത്. ഒരു കലാകാരനെയും ഇങ്ങനെ അപമാനിക്കരുതെന്നും, പാട്ടുകാരനൊപ്പം കോറസ് പാടാന് ആളുകളെത്തുന്നത് പതിവാണെന്നും ഗായകന് പ്രതികരിച്ചു. എന്നാല് ഇക്കാര്യമൊന്നും നോക്കാതെയാണ് പ്രിന്സിപ്പാള് തന്റെ കയ്യില് നിന്നും മൈക്ക് പിടിച്ചുവാങ്ങിയതെന്ന് പറഞ്ഞ ജാസി ഗിഫ്റ്റ് കാലാകാരനെന്ന നിലയില് ഇത് അപമാനിക്കലാണെന്നും കൂട്ടിച്ചേര്ത്തു.
