ടെക്സാസിലെ ഹൂസ്റ്റണിലെ ഒരു ഹോട്ടല് സ്വിമ്മിംഗ് പൂളില് ബന്ധിപ്പിച്ചിരിക്കുന്ന പൈപ്പില് കുടുങ്ങി എട്ടു വയസ്സുകാരി മരിച്ചു. മാര്ച്ച് 23 ന് ഡബിള് ട്രീ ഹോട്ടലില് കുടുംബത്തോടൊപ്പം സമയം ചെലവഴിക്കുന്നതിനിടെയാണ് അലിയാ ലിനറ്റ് ജെയ്ക്കോ മരിച്ചത്. സ്വിമ്മിംഗ്പൂളുമായി ബന്ധിപ്പിച്ചിരിക്കുന്ന പൈപ്പ് തെറ്റായി പ്രവര്ത്തിച്ചപ്പോള് വെള്ളം വലിച്ചെടുക്കപ്പെട്ട പൈപ്പിനുള്ളില് കുടുങ്ങിപ്പോകുകയുമായിരുന്നു എന്നാണ് വിവരം. സംഭവത്തിന്റെ വീഡിയോ നിരീക്ഷണം കണ്ട ഒരു സെര്ച്ച് ആന്ഡ് റെസ്ക്യൂ ടീമിലെ ഒരു വിദഗ്ദനാണ് ഇപ്പോള് ഭീകരത വിവരിച്ചത്.
നീന്തല്കുളത്തില് മാതാവിനൊപ്പം നീന്തുമ്പോള് പെട്ടെന്ന് വെള്ളത്തിനടിയിലേക്ക് പോയ ജെയ്ക്കോയെ കാണാതാകുകയായിരുന്നു. നന്നായി നീന്താന് അറിയാവുന്ന ജെയ്ക്കോയുടെ മൃതദേഹം പിറ്റേന്ന് രാവിലെയാണ് കണ്ടെത്തിയത്. രക്ഷാപ്രവര്ത്തകര് വെള്ളത്തിനടിയില് ക്യാമറകള് ഉപയോഗിച്ച് എടുത്ത ദൃശ്യങ്ങളില് കുളത്തിന്റെ പൈപ്പിനുള്ളില് പെണ്കുട്ടിയുടെ കൈ കണ്ടെത്തുകയായിരുന്നു. അതേസമയം പെണ്കുട്ടി എങ്ങിനെയാണ് പൈപ്പിനുള്ളില് കുടുങ്ങിയതെന്ന് വ്യക്തമായിട്ടില്ല. പൈപ്പ് അടുത്തിടെ നന്നാക്കിയതായി ഹോട്ടല് അധികൃതര് പറഞ്ഞു.
ഒരുപക്ഷേ പമ്പിന്റെ വയറിംഗില് വന്ന പിഴവായിരിക്കാം ഇതെന്നും വെള്ളം പുറത്തേക്ക് തള്ളുന്നതിന് പകരം പൈപ്പ് വെള്ളം വലിച്ചെടുക്കാന് സാധ്യതയുണ്ടെന്നും വിദഗ്ദ്ധര് പറയുന്നു. അടുത്തടുത്തായി രണ്ടു പൈപ്പുകള് ഉണ്ടായിരുന്നു. ഒന്ന് വെള്ളം തള്ളാനും മറ്റൊന്ന് വലിച്ചെടുക്കാനും ഉള്ളതാണ്. സംഭവത്തില് ഹോട്ടലിനെതിരേ കുട്ടിയുടെ മാതാപിതാക്കള് രംഗത്ത് വന്നു. ജെയ്ക്കോ മുങ്ങി മരിക്കുകയായിരുന്നു എന്നാണ് ഹാരിസ് കൗണ്ടി മെഡിക്കല് എക്സാമിനര് ഓഫീസ് പറഞ്ഞിരിക്കുന്നതും. സംഭവത്തെത്തുടര്ന്ന്, വിവിധ നിയമലംഘനങ്ങള് കണ്ടെത്തിയതിനെത്തുടര്ന്ന് കുളം അടയ്ക്കാന് ഇന്സ്പെക്ടര്മാര് നിര്ദ്ദേശിച്ചു.
പുനര്രൂപകല്പ്പനയ്ക്ക് ശേഷം പൂള് പ്രവര്ത്തനക്ഷമമാക്കുന്നതിന് മുമ്പ് ഒരു ഓപ്പണിംഗ് പരിശോധന നടത്താന് ഓപ്പറേറ്റര് പരാജയപ്പെട്ടെന്നാണ് അന്വേഷണ ഉദ്യോഗസ്ഥര് മൂന്ന് പേജുള്ള പരിശോധനാ റിപ്പോര്ട്ടില് എഴുതിയത്. ജെയ്ക്കോയുടെ കുടുംബം ഇപ്പോള് ഹോട്ടലിനും അതിന്റെ മാതൃസ്ഥാപനങ്ങള്ക്കും എതിരെ തെറ്റായ നടപടിക്ക് കേസ് ഫയല് ചെയ്തിട്ടുണ്ട്. കടുത്ത അവഗണനയാണ് ഇവര്ക്കെതിരെ ചുമത്തിയിരിക്കുന്നത്. ഒരു മില്യണ് ഡോളറിലധികം നഷ്ടപരിഹാരമാണ് കുടുംബം ആവശ്യപ്പെട്ടിരിക്കുന്നത്.
