തൃശൂര്: കഴിഞ്ഞ ദിവസം രാത്രി ട്രെയിനില് നിന്നും ടിടിഇ യെ തള്ളിയിട്ട് കൊലപ്പെടുത്തിയ കേസില് അറസ്റ്റിലായ അന്യസംസ്ഥാന തൊഴിലാളി രജനീകാന്തയുമായി പോലീസ് ഇന്ന് തെളിവെടുപ്പ് നടത്തും. പിഴ അടയ്്ക്കാന് പറഞ്ഞതിന്റെ വൈരാഗ്യത്തിലാണ് പ്രതി ടിടിഇ വിനോദിനെ ആക്രമിച്ചതെന്നാണ് വിവരം. രജനീകാന്ത അമിതമായി മദ്യപിച്ചിരുന്നതായി ദൃക്സാക്ഷികള് പറഞ്ഞു.
ടിക്കറ്റ് എടുക്കാതെയായിരുന്നു ഇയാള് ട്രെയിനില് യാത്ര ചെയ്തത്. തൃശൂര് എത്തിയപ്പോള് ടിക്കറ്റ് ചോദിച്ചു. ഇയാളുടെ കയ്യില് ടിക്കറ്റ് ഇല്ലായിരുന്നു. തുടര്ന്ന് വിനോദ് 1000 രൂപ പിഴയടയ്ക്കാന് ആവശ്യപ്പെട്ടു. എന്നാല് തയ്യാറാകാതെ വന്നപ്പോള് വിനോദ് റെയില്വേ പോലീസിനെ വിളിക്കുന്നത് ശ്രദ്ധയില് പെട്ട രജനീകാന്ത വിനോദ് വാതിലിന് അരികിലേക്ക് ചെന്നപ്പോള് ചവിട്ടി വീഴ്ത്തുകയായിരുന്നെന്നാണ് ദൃക്സാക്ഷി മൊഴികളില് പറയുന്നത്.
പെട്ടെന്നായിരുന്നു ഇയാളുടെ ആക്രമണം. വിനോദിന്റെ മൃതദേഹം പോസ്റ്റുമാര്ട്ടം നടപടികള്ക്ക് ശേഷം ഇന്ന് ബന്ധുക്കള്ക്ക് വിട്ടുകൊടുക്കും. രജനീകാന്ത അമിത മദ്യപാനത്തിന്റെ പേരില് നേരത്തേ കൊച്ചിയിലെ ഒരു ഹോട്ടലില് നിന്നും പിരിച്ചുവിടപ്പെട്ടിരുന്നു. പിഴയടയ്ക്കാന് ആവശ്യപ്പെട്ടപ്പോള് ഇയാള് ടിടിഇ യുടെ കുടുംബത്തെയും അമ്മയേയും സഹോദരിയേയുമെല്ലാം ചേര്ത്ത് ചീത്ത പറഞ്ഞതായും ദൃക്സാക്ഷികള് പറഞ്ഞു.
