പൃഥ്വിരാജ് സുകുമാരൻ, ബേസിൽ ജോസഫ് എന്നിവരെ പ്രധാന കഥാപാത്രങ്ങളാക്കി വിപിൻദാസ് സംവിധാനം ചെയ്യുന്ന ‘ഗുരുവായൂർ അമ്പലനടയിൽ’ സിനിമയ്ക്കായി ആരാധകര് ആവേശത്തോടെയാണ് കാത്തിരിക്കുന്നത്. ജയ ജയ ജയ ജയഹേ എന്ന സൂപ്പർ ഹിറ്റ് ചിത്രത്തിനു ശേഷം വിപിന്ദാസ് സംവിധാനം ചെയ്യുന്ന ഈ സിനിമ ഒരു മുഴുനീള എന്റർടെയ്നറാകും സിനിമയെന്ന സൂചനയാണ് ടീസർ നൽകിയത്. ഒരിടവേളയ്ക്കു ശേഷം മുഴുനീള കോമഡി വേഷത്തിൽ ഈ സിനിമയിലൂടെ പൃഥ്വിരാജ് എത്തുന്നു എന്നതും പ്രത്യേകതയാണ്.
സിനിമയുടെ പ്രൊമോഷന് തിരക്കിലാണ് താരങ്ങള്. ഇപ്പോഴിതാ ഇതിനിടയിലുള്ള പൃഥ്വിരാജിന്റെയും ബേസിലിന്റെയും നര്മ്മങ്ങളാണ് ആരാധകരില് ചിരി പടര്ത്തുന്നത്. വേദിയില് വച്ച് ‘പുതിയ മുഖം’ എന്ന പാട്ട് പൃഥ്വിരാജ് പാടുന്നത് കാണാം. അതിനിടയില് ബേസില് പാട്ടിന്റെ താളം തെറ്റിക്കുന്നുണ്ട്. അവസാനം ബേസിലിനോട് പാടാനായി പൃഥ്വിരാജ് പാടുന്നു. അപതാളത്തില് പാടുന്ന ബേസില് പിന്നീട് രസകരമായി പാടുന്നതും വീഡിയോയിലുണ്ട്. ‘‘ശ്രുതിയൊക്കെ പിടിച്ച് പാടാനൊക്കെ അറിയാ’’മെന്നാണ് പൃഥ്വിരാജ് ബേസിലിന്റെ പാട്ടിന് കൊടുക്കുന്ന കമന്റ്. വേദിയിലുള്ളവരും ആരാധകരും പൊട്ടിച്ചിരിയും കൈയടിയും നല്കിയാണ് ഈ വീഡിയോ ഏറ്റെടുക്കുന്നത്.
അനശ്വര രാജന്, നിഖില വിമല് എന്നിവരാണ് ചിത്രത്തിൽ നായികമാരായി എത്തുന്നത്. വിവാഹത്തിനോട് അനുബന്ധിച്ച് നടക്കുന്ന രസകരമായ സംഭവങ്ങളാണ് ചിത്രത്തിന്റെ പ്രമേയമെന്നാണ് ടീസർ സൂചിപ്പിക്കുന്നത്. തമിഴിൽ നിന്നും യോഗി ബാബു ചിത്രത്തിൽ ഒരു പ്രധാനവേഷത്തെ അവതരിപ്പിക്കുന്നുണ്ട്.
