പൃഥ്വിരാജ്, ബേസിൽ ജോസഫ് എന്നിവര് പ്രധാന വേഷത്തിൽ എത്തുന്ന വിപിൻദാസ് സംവിധാനം ചെയ്യുന്ന ഗുരുവായൂരമ്പലനടയില് എന്ന സിനിമ പ്രേക്ഷകര് ആവേശത്തോടെയാണ് കാത്തിരിക്കുന്നത്. നിഖില വിമൽ, അനശ്വര രാജൻ എന്നിവരാണ് ഈ സിനിമയില് നായിക വേഷങ്ങളില് എത്തുന്നത്.
വര്ഷങ്ങള്ക്കു മുമ്പ് ഒരു അഭിമുഖത്തിനിടയില് തന്റെ ഭാവിയെ കുറിച്ചും കയ്യെത്തി തൊടാൻ ആഗ്രഹിക്കുന്ന സ്വപ്നങ്ങളെ കുറിച്ചുമൊക്കെ പൃഥ്വി പറഞ്ഞ വാക്കുകള് വലിയ രീതിയില് ശ്രദ്ധ നേടിയിരുന്നു. 20 വർഷങ്ങള്ക്കിപ്പുറമുള്ള പൃഥ്വിരാജ് എന്തായിരിക്കുമെന്ന് പൃഥ്വി പറഞ്ഞ വാക്കുകളെല്ലാം പില്ക്കാലത്ത് സത്യമായി മാറുന്ന കാഴ്ചയും പ്രേക്ഷകരറിഞ്ഞതാണ്. താരത്തിന്റെ ഏറ്റവും പുതിയ ചിത്രമായ ‘ഗുരുവായൂരമ്പലനടയില്’ പ്രേക്ഷകര് ആവേശത്തോടെ കാത്തിരിക്കുന്ന സിനിമയാണ്. സിനിമയുടെ പ്രൊമോഷന്റെ തിരക്കിലാണ് താരം.
ഇപ്പോഴിതാ പ്രമോഷൻ അഭിമുഖങ്ങള്ക്കിടയില് പൃഥ്വിയോടു ചോദിച്ച ഒരു ചോദ്യത്തിന് തഗ്ഗ് മറുപടി നല്കുകയാണ് നിഖില. ‘‘രാജുവേട്ടൻ കുറെ വർഷങ്ങള്ക്ക് മുൻപ് ഇപ്പോഴത്തെ പൃഥ്വിരാജിന്റെ കരിയർ എങ്ങനെ ആയിരിക്കും എന്ന് പ്രെഡിക്ട് ചെയ്തിരുന്നല്ലോ ?’’ എന്നാണ് അവതാരക ചോദിച്ചത്.
അവതാരകയുടെ ചോദ്യം മുഴുമിക്കും മുൻപു തന്നെ പൃഥ്വിരാജിനു കാര്യം പിടികിട്ടി. ‘‘അടുത്ത പത്ത് വർഷം എങ്ങനെ ആയിരിക്കും എന്ന് പറയണോ?’’ എന്ന മറുചോദ്യം പൃഥ്വി ചോദിച്ചു.
‘‘അറുപതുകളില് പൃഥ്വിരാജ് എങ്ങനെ ആയിരിക്കും എന്ന് പറയാമോ?’’ എന്ന് അവതാരക ചോദ്യം ആവർത്തിച്ചു.
പക്ഷേ, അവതാരകയേയും പൃഥ്വിയേയും ഞെട്ടിച്ചുകൊണ്ട് ഉത്തരം പറഞ്ഞത് ഗുരുവായൂരമ്പല നടയില് എന്ന ചിത്രത്തില് പൃഥ്വിയുടെ സഹതാരം കൂടിയായി നിഖില വിമലാണ്. ‘‘വയ്യായിരിക്കും... ഒട്ടും വയ്യ...’’ എന്നായിരുന്നു നിഖിലയുടെ തഗ്ഗ് ഉത്തരം.
‘‘നാളെ രാവിലത്തെ പൃഥ്വിരാജ് എങ്ങനെയായിരിക്കും എന്നു പോലും എനിക്കറിയില്ല...’’ എന്നും കൂടി പൃഥ്വി മറുപടി കൊടുത്തു. ഏതായാലും പല കാര്യങ്ങളും പ്രെഡിക്റ്റ് ചെയ്യുന്ന നടൻ, ഇല്യുമിനാറ്റി തുടങ്ങിയ വിളിപ്പേരുകളുമുള്ള താരത്തിന്റെ ഓരോ സിനിമയും ആരാധകര്ക്ക് വ്യത്യസ്തമായ ആവേശമാണ് നല്കിക്കൊണ്ടിരിക്കുന്നത്.
ബേസിലും പൃഥ്വിരാജും നിഖില വിമലും അനശ്വര രാജനും കേന്ദ്രകഥാപാത്രങ്ങളാകുന്ന സിനിമയില് യോഗി ബാബു, ജഗദീഷ്, രേഖ, ഇർഷാദ്,സിജു സണ്ണി, സഫ്വാൻ, പി.പി. കുഞ്ഞികൃഷ്ണൻ , മനോജ് കെ. യു തുടങ്ങിയവരാണ് മറ്റ് താരങ്ങൾ. പൃഥ്വിരാജ് പ്രൊഡക്ഷൻസിന്റെ ബാനറിൽ സുപ്രിയ മേനോൻ, ഇഫോർ എന്റർടെയ്ൻമെന്റ് ബാനറിൽ മുകേഷ് ആർ മേത്ത, സി .വി സാരഥി എന്നിവർ ചേർന്നാണ് നിർമ്മാണം.
