ഹരിപ്പാട്: കൂട്ടുകാരനെയും അമ്മയേയും തെരുവ് നായയില് നിന്നും രക്ഷിക്കാന് ശ്രമിച്ച എട്ടുവയസ്സുകാരന് നായയുടെ കടിയേറ്റ് പേവിഷബാധ മൂലം മരണമടഞ്ഞു. ഹരിപ്പാട് പള്ളിപ്പാട് സ്വദേശി ദേവനാരായണനാണ് മരണപ്പെട്ടത്. മൂന്നാംക്ലാസ്സുകാരനായ ദേവനാരായണന് മെഡിക്കല് കോളേജില് ചികിത്സയില് കഴിയവേയാണ് മരണത്തിന് കീഴടങ്ങിയത്. താലൂക്കാശുപത്രി ചികിത്സ നിഷേധിച്ചതായി ബന്ധുക്കള് പരാതിപ്പെട്ടു.
ദിവസങ്ങള്ക്ക് മുമ്പ് വീടിന്റെ മുറ്റത്ത് കളിച്ചുകൊണ്ടിരിക്കെ കൂട്ടുകാരനും അമ്മയും വീടിന് മുന്നിലെ വഴിയിലൂടെ വരികയും തെരുവ്നായ ഇവര്ക്ക് നേരെ വരികയുമായിരുന്നു. ഉടന് കയ്യിലിരുന്ന ബോര്ഡ് കൊണ്ടു ദേവനാരായണന് പട്ടിയെ എറിഞ്ഞതോടെ നായ കുട്ടിയുടെ നേരെ വരികയും കുട്ടി വീഴുകയുമായിരുന്നു. കുട്ടിയെ ഹരിപ്പാട് താലൂക്ക് ആശുപത്രിയില് കൊണ്ടുപോയെങ്കിലും പേവിഷ വാക്സിന് നിഷേധിച്ചെന്ന് കുട്ടിയുടെ ബന്ധുക്കള് പറയുന്നു.
ആശുപത്രിയില് കാണിച്ചപ്പോള് കല്ലു കൊണ്ട് ഉണ്ടായ മുറിവാണെന്ന് പറഞ്ഞ് വിടുകയായിരുന്നു എന്നാണ് ആരോപണം. ദിവസങ്ങള്ക്ക് ശേഷം കുട്ടിയുടെ നില വഷളായതോടെ സ്വകാര്യ ആശുപത്രിയിലേക്കും പിന്നീട് ആലപ്പുഴ മെഡിക്കല് കോളേജിലേക്കും മാറ്റിയെങ്കിലും മെഡിക്കല് കോളേജിലെ ചികിത്സയ്ക്കിടയില് മരണമടഞ്ഞു. അതേസമയം കുട്ടിക്ക് പട്ടികടി ഏറ്റതായോ പട്ടി ഓടിച്ചതായോ പറഞ്ഞില്ലെന്നും ഓടി വീണതായിരുന്നു എന്നുമാണ് ബന്ധുക്കള് ഡോക്ടറോട് പറഞ്ഞതെന്നാണ് താലൂക്ക് ആശുപത്രിയൂടെ മറുപടി.
