അടുത്തിടെ ഇറങ്ങിയതില് പ്രേക്ഷകര് ഏറെ സ്വീകരിച്ച ഒരു സിനിമയായിരുന്നു ജിസ് ജോയിയുടെ സംവിധാനത്തില് പിറന്ന ഇൻവെസ്റ്റിഗേഷൻ ത്രില്ലറുകളിലൊന്നൊണ് ‘തലവന്’. ആസിഫ് അലിയും ബിജു മേനോനും പ്രധാന വേഷങ്ങള് ചെയ്ത ഈ ഇൻവെസ്റ്റിഗേഷൻ ത്രില്ലർ ചിത്രം സൂപ്പർ വിജയം നേടിയാണ് മുന്നേറുന്നത്. ആസിഫ് അലിയുടെ കരിയറിലെ തന്നെ ഏറ്റവും വലിയ വിജയമായും ഈ ചിത്രം മാറി.
ഇപ്പോഴിതാ മലയാള സിനിമാ പ്രേമികളുടേയും ചലച്ചിത്ര പ്രവർത്തകരുടേയും അഭിനന്ദനങ്ങള് ഏറ്റുവാങ്ങിയ ഈ ചിത്രത്തിന് പ്രശംസയും കൈയടിയും നല്കുന്നത് ഇന്ത്യൻ സിനിമയിലെ ഇതിഹാസമായ തമിഴ് സൂപ്പർ താരം കമല് ഹാസനാണ്. തലവൻ ടീമിനെ രാജ്കമല് ഫിലിംസന്റെ ചെന്നൈ ഓഫീസിലേക്ക് വിളിച്ചുവരുത്തിയാണ് കമല് ഹാസൻ അഭിനന്ദനം അറിയിച്ചത്.
ഇന്ത്യൻ സിനിമയിലെ ഈ വിസ്മയതാരത്തിന്റെ അംഗീകാരത്തിനും പ്രോത്സാഹനത്തിനുമപ്പുറം ഇനി മറ്റൊന്നും കിട്ടാനില്ലെന്നാണ് തലവൻ ടീം പറയുന്നത്. ബുധനാഴ്ച കമല് ഹാസന്റെ സന്ദേശം വന്നയുടനെ തന്നെ ചെന്നൈയിലെത്തിയ തലവൻ ടീം, വ്യാഴാഴ്ച അദ്ദേഹത്തെ കണ്ടു. ഷൂട്ടിങ് തിരക്കുകള് മൂലം ബിജു മേനോന് പങ്കെടുക്കാൻ കഴിഞ്ഞില്ലെങ്കിലും, തന്റെ നിറഞ്ഞ സന്തോഷം ബിജുവിനെ അറിയിക്കണമെന്ന് കമല് ഹാസൻ തലവൻ ടീമിനെ ഓർമ്മിപ്പിച്ചു. ഉലകനായകനോടൊപ്പം ഒരു മേശക്ക് ചുറ്റുമിരുന്നു സന്തോഷം പങ്കുവെക്കുന്ന ആസിഫ് അലിയുടേയും തലവൻ ടീമിന്റെയും ചിത്രങ്ങള് സോഷ്യല് മീഡിയയില് വൈറലാണ്. ഫ്യൂച്ചർ റണ് അപ് ഫിലിംസിന്റെ അനുപ് കുമാർ വഴിയാണ് തലവൻ ടീം കമല് ഹാസനെ നേരിട്ട് കണ്ടത്.
അരുണ് നാരായണ് പ്രൊഡക്ഷൻസിന്റെയും ലണ്ടൻ സ്റ്റുഡിയോസിന്റെയും ബാനറുകളില് അരുണ് നാരായണ്, സിജോ സെബാസ്റ്റ്യൻ എന്നിവർ ചേർന്ന് നിർമ്മിച്ച ഈ ചിത്രത്തില് അനുശ്രീ, മിയ, ദിലീഷ് പോത്തൻ, കോട്ടയം നസീർ, ശങ്കർ രാമകൃഷ്ണൻ, ജോജി കെ. ജോണ്, ദിനേശ്, അനുരൂപ്, നന്ദൻ ഉണ്ണി, ബിലാസ് എന്നിവരാണ് സിനിമയിലെ മറ്റു താരങ്ങള്.
