ദുബായ്: ഊര്ജ്ജ ഉച്ചകോടിയില് പങ്കെടുക്കാന് ദുബായില് എത്തിയ കേന്ദ്രമന്ത്രിയുടെ സന്ദര്ശനവേളയില് ദേശീയപതാക തലതിരിച്ച് വെച്ചത് വിവാദമാകുന്നു. കേന്ദ്രമന്ത്രി പീയൂഷ് ഗോയലിന്റെ അബുദാബി സന്ദര്ശന വേളയിലെ ദൃശ്യങ്ങളാണ് വൈറലായി മാറിയിരിക്കുന്നത്.
വേള്ഡ് ഫ്യൂച്ചര് എനര്ജി സമ്മിറ്റ് 2017 ല് പങ്കെടുക്കാന് ദുബായില് എത്തിയ മന്ത്രി തിങ്കളാഴ്ച അബുദാബിയിലെ ഊര്ജ്ജമന്ത്രിയുമായുള്ള കൂടിക്കാഴ്ച നടത്തിയ വേദിയാണ് ദേശീയപതാകയെ അപമാനിക്കുന്നതായി മാറിയത്.
അന്താരാഷ്ട്ര ഊര്ജ്ജ പുനരുദ്ധാരണവുമായി ബന്ധപ്പെട്ട വിഷയത്തെ അദ്ദേഹം അഭിസംബോധന ചെയ്യുകയുമുണ്ടായി. രണ്ടു മന്ത്രിമാരും കൂടിക്കാഴ്ച നടത്തുമ്പോള് തല തിരിഞ്ഞിരിക്കുന്ന ഇന്ത്യന് പതാകയുടെ ദൃശ്യം വൈറലായി മാറിയിട്ടുണ്ട്. സൗദി മന്ത്രിയുമായി നാലിലധികം ഉഭയകക്ഷി കൂടിക്കാഴ്ചയില് മന്ത്രി പങ്കെടുത്തതായി ഒപ്പമുണ്ടായിരുന്ന നയതന്ത്ര പ്രതിനിധികള് വ്യക്തമാക്കി. അതേസമയം കൂടിക്കാഴ്ചയ്ക്കിടയില് പതാക തലതിരിഞ്ഞിരിക്കുന്നത് മന്ത്രി ശ്രദ്ധിച്ചില്ലെന്നും ആകസ്മികമായി സംഭവിച്ച കാര്യത്തില് ഖേദമുണ്ടെന്നും അദ്ദേഹം പറഞ്ഞു.
അതേസമയം അന്താരാഷ്ട്ര കൂടിക്കാഴ്ചാ വേളയില് ദേശീയപതാക തല തിരിഞ്ഞിരിക്കുന്നത് ഇതാദ്യ സംഭവമല്ല. മുമ്പും ഇത് സംഭവിച്ചിട്ടുണ്ട്. 2015 ല് മലേഷ്യയില് നടന്ന ഏഷ്യന് ഉച്ചകോടിയില് ജപ്പാന് പ്രധാനമന്ത്രിയുമായി ഇന്ത്യന് പ്രധാനമന്ത്രി നരേന്ദ്രമോഡി നടത്തിയ കൂടിക്കാഴ്ചയിലും ദേശീയപതാക തലകുത്തി നില്ക്കുന്ന ദൃശ്യങ്ങള് പുറത്തു വന്നിരുന്നു. എന്നാല് ഇക്കാര്യം ശ്രദ്ധിച്ച മോഡി ഉടന് തന്നെ നേരെ വെയ്ക്കുവാന് ആവശ്യപ്പെടുകയും ചെയ്തു.
എന്നാല് ദുബായ് യിലെ സന്ദര്ശനത്തില് ഈ രീതിയിലുള്ള ഒരു ശ്രദ്ധ വന്നിരുന്നില്ല. അതിനാല് ദേശീയപതാക നേരെ വെയ്ക്കാനും ആരും ആവശ്യപ്പെട്ടില്ലെന്നാണ് റിപ്പോര്ട്ട്.
