സിനിമാ തിയേറ്ററുകളില് പോകാത്തതായി അധികമാരും ഉണ്ടാകില്ല. ഇനി പോകാത്തവര് ഉണ്ടെങ്കില് അവര് വീട്ടിലിരുന്നെങ്കിലും സിനിമ കണ്ടിട്ടുണ്ടാകും. എന്നാല് ഇവിടെ ഒന്നുമല്ലാത്തെ എപ്പോഴെങ്കിലും ഇരുണ്ട ആകാശത്തിന് കീഴിലെ വിശാലതയിലിരുന്ന് സിനിമ കണ്ടിട്ടുണ്ടോ? ചിലരെങ്കിലും ഉണ്ടാവാം. എന്നാല്, തായ്ലന്ഡില് കഴിഞ്ഞദിവസം ഇത്തരത്തില് ഒരു സിനിമാ പ്രദര്ശനം നടന്നു. പക്ഷേ, അതിന്റെ കാണികള് ആരും ജീവിച്ചിരിപ്പുണ്ടായിരുന്നില്ല. മരിച്ചുപോയവര്ക്ക് വേണ്ടി ഒരു സെമിത്തേരിയില് ആയിരുന്നു ഈ പ്രത്യേക സിനിമാ പ്രദര്ശനം നടന്നത്.
വിശ്വസിക്കാന് അല്പം ബുദ്ധിമുട്ടാണെന്ന് അറിയാം. എങ്കിലും വിശ്വസിച്ചേ മതിയാകൂ. സൗത്ത് ചൈന മോണിംഗ് പോസ്റ്റ് റിപ്പോര്ട്ട് പ്രകാരം ജൂണ് 2 മുതല് ജൂണ് 6 വരെയാണ് ഒരു ശ്മശാനത്തില് മരിച്ചുപോയവരുടെ ആത്മാക്കള്ക്കായി സിനിമകളുടെ പ്രദര്ശനം നടത്തിയത്. തായ്ലന്ഡിലെ സവാങ് മെട്ട തമ്മസതന് ഫൗണ്ടേഷനാണ് ഈ സിനിമാ ഫെസ്റ്റിവല് സംഘടിപ്പിച്ചത്. പ്രദര്ശനം നടന്ന വടക്കുകിഴക്കന് തായ്ലന്ഡിലെ നഖോണ് റാച്ചസിമ പ്രവിശ്യയിലെ ഈ ശ്മശാനത്തില് ഏകദേശം 3,000 ആളുകളെയാണ് അടക്കം ചെയ്തിട്ടുള്ളത്. ഈ ആത്മാക്കള്ക്കായാണ് ശമ്ശാന അധികാരികളുടെ കൂടി സഹകരണത്തോടെ സിനിമാ പ്രദര്ശനം നടത്തിയത്. ആത്മാക്കള്ക്കിരിക്കാനായി ഒഴിഞ്ഞ കസേരകളും ഇവിടെ സജ്ജീകരിച്ചിരുന്നു.
ആധുനിക രീതിയിലുള്ള വിനോദം നല്കാനും ആത്മാക്കളെ സമാധാനിപ്പിക്കാനുമുള്ള ശ്രമത്തിന്റെ ഭാഗമായാണ് സിനിമാ പ്രദര്ശനം നടത്തിയത് എന്നാണ് ഇതുമായി ബന്ധപ്പെട്ടവര് പറയുന്നത്. എല്ലാ ദിവസവും രാത്രി 7 മണിക്ക് ആരംഭിച്ച പ്രദര്ശനം അര്ദ്ധരാത്രിയോടെ അവസാനിപ്പിച്ചതായാണ് റിപ്പോര്ട്ടുകള് പറയുന്നത്. ഈ പ്രദര്ശനത്തില് ശ്മശാനത്തിലെ നാലു ജീവനക്കാര് മാത്രമാണ് ജീവനുള്ളവരായി കാണികളുടെ കസേരയില് ഉണ്ടായിരുന്നത്. ബാക്കിയുള്ള മുഴുവന് കസേരകളും മരിച്ചുപോയവരുടെ ആത്മാക്കള്ക്കായി ഇവര് ഒഴിച്ചിട്ടിരിക്കുകയായിരുന്നു. സിനിമാ പ്രദര്ശനത്തോടൊപ്പം ജീവനക്കാര് മരിച്ചവര്ക്കായി ഭക്ഷണം, വസ്ത്രം, വാഹനങ്ങള്, മോഡല് വീടുകള്, മറ്റ് ദൈനംദിന അവശ്യത്തിനുള്ള വസ്തുക്കള് എന്നിവയെല്ലാം ഉള്ക്കൊള്ളിച്ചുകൊണ്ടുള്ള ഒരു പാര്ട്ടിയും സംഘടിപ്പിച്ചിരുന്നു.
