മാങ്കുളം(ഇടുക്കി): വെള്ളച്ചാട്ടങ്ങളുടെ നാടായ മാങ്കുളത്ത് സഞ്ചാരികള്ക്ക് ആസ്വദിക്കാന് ആവോളം. അടിസ്ഥാന സൗകര്യങ്ങളുടെ അഭാവം കൂടി പരിഹരിച്ചാല് തെക്കിന്റെ കാശ്മീരിനെ വെല്ലുന്ന കാഴ്ചകളാണിവിടെ. അതിനാല് തന്നെ ടൂറിസം മേഖലയില് വികസന പാതയിലാണ് ഇന്നു മാങ്കുളം. റിസോര്ട്ടുകളും ഹോംസ്റ്റേകളും ഇന്ന് ഇവിടെയും സജീവമാണ്. പഞ്ചായത്തില് തന്നെ പതിമൂന്നു വെള്ളച്ചാട്ടമാണു സഞ്ചാരികള്ക്കായി പ്രകൃതി ഒരുക്കിവച്ചിരിക്കുന്നത്.
അതില് തന്നെ വലിയ വെള്ളച്ചാട്ടമായ നക്ഷത്ര കുത്ത് സാഹസിക സഞ്ചാരികളുടെ അടക്കം മനം കവരുന്നു. വിരിപാറയില്നിന്നാണു നക്ഷത്രകുത്തിലേക്ക് തിരിക്കുന്നത്. മൂന്നു കിലോമീറ്ററോളം യാത്രയുണ്ട് ഇവിടേക്ക്. സാഹസിക സഞ്ചാരികള്ക്ക് ട്രക്കിങ് നടത്തിയും ഇവിടേയ്ക്ക് എത്തിച്ചേരാം. നക്ഷത്ര ആകൃതിയുള്ള കുത്തില് കുളിച്ചും സല്ലപിച്ചും സമയം ചിലവഴിച്ചാണു സഞ്ചാരികള് മടങ്ങുക. രാജ്യത്ത് തന്നെ ഒരു പഞ്ചായത്ത് സ്വന്തമായി വൈദ്യുതി ഉത്പാദിപ്പിച്ചതും ഇവിടെയാണ്.
2000ല് നിര്മാണം ആരംഭിച്ച് 2004 ഡിസംബറില് പ്രവര്ത്തനം ആരംഭിച്ച മാങ്കുളം പഞ്ചായത്തിന്റെ വൈദ്യുത പദ്ധതി ഏറെ ശ്രദ്ധ നേടിയിരുന്നു. 110 കിലോവാട്ടായിരുന്നു ഉത്പാദന ശേഷി. 350 കുടുംബങ്ങള്ക്ക് ഇതിന്റെ പ്രയോജനം ലഭിക്കുമായിരുന്നു. എന്നാല് പിന്നീട് പദ്ധതി നിലച്ചു. എനര്ജി മാനേജ്മെന്റ് സെന്റര് 70 ലക്ഷം രൂപ മുടക്കി ഇതു നവീകരിക്കാമെന്ന് അറിയിച്ചെങ്കിലും വനം വകുപ്പുമായി നില്ക്കുന്ന തര്ക്കം മൂലം പദ്ധതി പുനരുജ്ജീവിപ്പിക്കാനായിട്ടില്ല. മാങ്കുളത്തെ കാഴ്ചകള് കാണാന് വനം വകുപ്പും ഇക്കോ ടൂറിസം പ്രോഗ്രാമിന്റെ ഭാഗമായി ജീപ്പ് സവാരി നടത്തുന്നുണ്ട്. കിളിക്കല്ല്, കണ്ണാടിപ്പാറ, കോഴിയലക്കുത്ത് എന്നീ വനാന്തര് ഭാഗങ്ങളിലേയക്കും ട്രക്കിങ് നടത്തുന്നുണ്ട്. സ്വകാര്യ ജീപ്പു ൈഡ്രവര്മാരും ട്രക്കിങ് പാക്കേജുകളുമായി ഇവിടെ സജീവമാണ്. മൂന്നാറിന്റെ ഭൂപ്രകൃതിയെ മലയുടെ മുകളില്നിന്നു കണ്ടാസ്വദിക്കാന് കണ്ണാടിപ്പാറയിലേക്കുള്ള യാത്ര വഴിയൊരുക്കുന്നു. സാഹസിക യാത്രികരുടെ മനസു നിറയ്ക്കുന്ന കാനന കാഴ്ചകളാണ് കിളിക്കല്ല് യാത്ര. പക്ഷി നിരീക്ഷകരുടെ അടക്കം ഇഷ്ടകേന്ദ്രമാണ് കോഴിയലക്കുത്ത് മേഖല. 33 വെള്ളച്ചാട്ടവും സഞ്ചാരികളുടെ ഇഷ്ട കേന്ദ്രമാണ്. പട്ടയ സ്ഥലങ്ങളിലായി സ്ഥിതി ചെയ്യുന്ന ഈ കുത്തില് കുളിക്കാനും മറ്റും സഞ്ചാരികള് ഏറെ എത്തുന്നുണ്ട്.
ഗോത്ര വിഭാഗങ്ങളുടെ ജീവിതചര്യങ്ങള് നേരിട്ടറിയാനും മാങ്കുളത്തെത്തുന്ന സഞ്ചാരികള്ക്ക് കഴിയും. ആദിവാസി ഗോത്രങ്ങളുള്ള വന മേഖലയാണു മാങ്കുളം. കോഴിയള, കുറത്തി, കമ്പനിക്കുടി, സിങ്കുകുടി, താളുംകണ്ടം തുടങ്ങിയ ഇടങ്ങളിലായാണ് അവരുടെ സെറ്റില്മെന്റുകള്. ഇടമലക്കുടിയാണു ഗോത്ര വിഭാഗം താമസിക്കുന്ന മറ്റൊരു സ്ഥലം. കാട്ടിലുടെ നടന്നു മാത്രമേ ഇവിടെ നിന്ന് അവിടെ എത്താന് കഴിയൂ.
ഇടമലക്കുടിക്കാര് സാധനങ്ങള് മറ്റും വാങ്ങുന്നതു ആനക്കുളത്തെത്തിയാണ്. ആലുവ-മൂന്നാര് ദേശീയപാത യാഥാര്ഥ്യമായാല് കുറത്തിക്കുടിക്കാര്ക്ക് ഏറെ പ്രയോജനം ചെയ്യുന്നതാണ്. രണ്ടു കാട്ടരുവികള് കണ്ടുമുട്ടി പഴയ പൂയംകുട്ടി പുഴയായി ഒഴുകുന്ന വലിയപാറക്കുറ്റിയാണ് മറ്റൊരു കാഴ്ചാ വിരുന്ന്. കോഴിവാലന് കുത്ത്, കരിന്തിരിക്കുത്ത്, മീന്കുത്തികുത്ത് എന്നിവയെല്ലാനം നയന മനോഹര കാഴ്ചകളാണ്. പെരുമ്പന്കുത്തും ആനക്കുളവും ഒക്കെ ചേരുമ്പോള് ഭൂമിയിലെ സ്വര്ഗം ഇവിടെ തന്നെ.
