തിരുവനന്തപുരം: ബിജെപി ബന്ധം അടക്കമുള്ള വിവാദപരമായ അനേകം കാര്യങ്ങള് ചര്ച്ച ചെയ്യാനിരിക്കെ ഇന്ന് ചേരുന്ന സിപിഎം സംസ്ഥാനസമിതിയില് പങ്കെടുക്കാതെ ഇ.പി. ജയരാജന് കണ്ണൂരിലേക്ക് തിരിച്ചുപോയെന്ന് സൂചന. എല്ഡിഎഫ് കണ്വീനര് സ്ഥാനം അദ്ദേഹം ഒഴിഞ്ഞേക്കുമെന്നും റിപ്പോര്ട്ടുകള് പറയുന്നു. ഇ.പി. പ്രകാശ് ജാവദേക്കറുമായി കൂടിക്കാഴ്ച്ച നടത്തിയെന്ന റിപ്പോര്ട്ടും ചര്ച്ച ചെയ്തേക്കും.
സ്ഥാനമൊഴിയാന് സന്നദ്ധനാണെന്ന് ഇപി പാര്ട്ടിയെ അറിയിച്ചതായിട്ടാണ് വിവരം. ഇന്ന് കണ്ണൂരില് ചില പരിപാടികളുണ്ടെന്നും അതില് പങ്കെടുക്കേണ്ടതുണ്ടെന്നുമാണ് ഇ.പി. തന്നെ ബന്ധപ്പെട്ട മാധ്യമങ്ങളോട് നല്കിയിരിക്കുന്ന വിവരം. അതേസമയം കണ്വീനര് സ്ഥാനം ഒഴിയുന്നത് സംബന്ധിച്ച കാര്യത്തില് പ്രതികരിച്ചില്ല. ഇ പി ജയരാജന് ബിജെപി നേതാവ് പ്രകാശ് ജാവദേക്കറുമായി കൂടിക്കാഴ്ച നടത്തിയെന്ന് ലോക്സഭാ തെരഞ്ഞെടുപ്പിന് മുമ്പായി വന്ന വിവാദം മുന്നണിക്കുള്ളില് നിന്നും കടുത്ത അതൃപ്തിയ്ക്ക് കാരണമായിരുന്നു.
വിഷയം ഇന്നത്തെ സംസ്ഥാന സമിതിയില് ചര്ച്ച ചെയ്യാനിരിക്കെയാണ് അദ്ദേഹം സ്ഥാനം ഒഴിയുമെന്ന റിപ്പോര്ട്ടുകള് പുറത്തുവന്നിരിക്കുന്നത്. സിപിഐഎം പാര്ട്ടി കോണ്ഗ്രസിന് മുന്നോടിയായുള്ള ബ്രാഞ്ച് സമ്മേളനങ്ങളും ഉടന് തുടങ്ങാനിരിക്കുകയാണ്. ഇതിന് മുന്നോടിയായി കൂടിയാണ് രാജി സന്നദ്ധത അറിയിച്ചത്. ഇതോടെ സംസ്ഥാന സമിതിയില് ഇപി ജയരാജന് പങ്കെടുക്കില്ലെന്ന് ഉറപ്പായി.
