മലപ്പുറം: പ്രസിദ്ധീകരിച്ച അഭിമുഖത്തില് കാര്യങ്ങള് തെറ്റായി വ്യാഖ്യാനിച്ചെന്നും വിശദീകരണം നല്കണമെന്നും ആവശ്യപ്പെട്ട് ദേശീയ മാധ്യമമായ ദി ഹിന്ദുവിന് മുഖ്യമന്ത്രിയുടെ കത്ത്. മുഖ്യമന്ത്രിയുടെ പ്രതികരണം തെറ്റായി വ്യാഖ്യാനിച്ചെന്നും അഭിമുഖത്തില് ഒരിടത്തും ഒരു സ്ഥലമോ പ്രദേശമോ മുഖ്യമന്ത്രി പരാമര്ശിച്ചിട്ടില്ലെന്ന് വിവാദം അവസാനിപ്പിക്കാന് വിശദീകരണം നല്കണമെന്നും മുഖ്യമന്ത്രിയുടെ ഓഫീസില് നിന്നും അയച്ച കത്തില് പറയുന്നു. മുഖ്യമന്ത്രി ദി ഹിന്ദു പത്രത്തിന് നല്കിയ അഭിമുഖത്തില് നടത്തിയ മലപ്പുറം പരാമര്ശം വന് വിവാദമായിരുന്നു.
പി.വി. അന്വര് ആരോപണവുമായി എത്തിയിരുന്നു. മുസ്ലിംവിരോധം പരസ്യമായി പറയുന്നതിന്റെ ഭാഗമാണെന്നും മുഖ്യമന്ത്രിയുടെ നിലപാട് മാറ്റമാണ് ഹിന്ദു ദിനപത്രത്തിലെ അഭിമുഖമെന്നും അന്വര് പറഞ്ഞിരുന്നു. ആര്എസ്എസിന്റെയും ബിജെപിയുടെയും മേശപ്പുറത്ത് തന്റെ നിലപാട് മാറ്റം എത്താന് വേണ്ടിയാണ് മുഖ്യമന്ത്രി മലയാള പത്രങ്ങള്ക്കൊന്നും അഭിമുഖം നല്കാതെ ഇംഗ്ളീഷ് പത്രത്തിന് നല്കിയതെന്ന് പി.വി. അന്വര് ആരോപിച്ചിരുന്നു. മുഖ്യമന്ത്രിയുടെ നിലപാട് ബിജെപി-ആര്എസ്എസ് നേതൃത്വത്തിന്റെ മേശ പുറത്ത് എത്താനും പിണറായിയുടെ നിലപാട് മാറ്റം അങ്ങിനെ അവര്ക്ക് മനസ്സിലാക്കാന് വേണ്ടിയുമാണ് ഇംഗ്ലീഷ് പത്രത്തിന് അഭിമുഖം നല്കിയതെന്നും മറ്റൊരു രാഷ്ട്രീയ ലക്ഷ്യവും ഇതിന്റെ പിന്നില് ഇല്ലെന്നും പി വി അന്വര് എംഎല്എ മലപ്പുറത്ത് പറഞ്ഞിരുന്നു.
മലപ്പുറം ജില്ല ക്രിമിനലുകളെ നാടാണെന്ന് അഭിമുഖത്തില് നല്കിയിരിക്കുന്ന പ്രസ്താവന പാര്ലമെന്റില് ഏറ്റവും കൂടുതല് ക്രിമിനല് കേസ് വരുന്ന ജില്ലയേതെന്ന് ചോദിച്ചാല് മലപ്പുറം എന്ന് ഉത്തരം വരാന് വേണ്ടിയാണെന്നും ആരോപിച്ചു. അവിടെ 85 ശതമാനം വരുന്ന മുസ്ലിങ്ങള് ക്രിമിനലാണെന്ന വ്യാഖ്യാനം വരാന് വേണ്ടിയാണ് ഈ നീക്കമെന്നുമായിരുന്നു ആരോപണം. പൊലീസിന് ആര്എസ്എസ് നയമാണെന്ന അന്വറിന്റെ ആരോപണങ്ങളുടെ പശ്ചാത്തലത്തിലാണ് മുഖ്യമന്ത്രിയുടെ പ്രതികരണം വന്നത്.
ദ ഹിന്ദു ദിനപത്രത്തിന് നല്കിയ അഭിമുഖത്തില് നേരത്തേ പി വി അന്വര് ഉന്നയിച്ച ആരോപണങ്ങളില് പ്രതികരിക്കുമ്പോഴായിരുന്നു മുഖ്യമന്ത്രി മലപ്പുറം പരാമര്ശം നടത്തിയത്. സ്വര്ണക്കടത്തും ഹവാല പണവും കടത്തുന്നതുമായി ബന്ധപ്പെട്ട് കഴിഞ്ഞ അഞ്ച് വര്ഷത്തിനിടെ പൊലീസ് നടത്തിയ പരിശോധനയില് ഉണ്ടായ അസ്വാരസ്യങ്ങള് ആണ് സിപിഐഎം-ആര്എസ്എസ് ബന്ധമെന്ന ആരോപണത്തിന് പിന്നിലെ പ്രധാന ഘടകമെന്ന് മുഖ്യമന്ത്രി പറഞ്ഞിരുന്നു. ഇത് വ്യാപക പ്രതിഷേധത്തിനും വിമര്ശനത്തിനും കാരണമായിരുന്നു.
