ന്യൂഡല്ഹി: ഹരിയാനയില് ബി.ജെ.പി.യുടെ ചരിത്രപരമായ വിജയം നേടി മൂന്നാംവട്ടവും അധികാരത്തില് എത്തിയപ്പോള് വമ്പന് അട്ടിമറി പ്രതീക്ഷിച്ച കോണ്ഗ്രസിന് വീണ്ടും നിരാശ. പ്രതികൂലമായി മാറിയേക്കാവുന്ന അനേകം സാഹചര്യങ്ങള് ഉണ്ടായിട്ടും അനുകൂല കാലാവസ്ഥ സൃഷ്ടിച്ചെടുക്കാന് ബിജെപിയ്ക്ക് കരുത്തേകിയ വിജയ ശില്പ്പി ധര്മ്മേന്ദ്രപ്രധാനാണ് മാധ്യമങ്ങള് മുഴുവന് ക്രെഡിറ്റും കൊണ്ടു വെയ്ക്കുന്നത്.
പിന്നില് നിശബ്ദനായി നിന്നുകൊണ്ട് തന്ത്രങ്ങള് മെനഞ്ഞ അദ്ദേഹം ബിജെപിയുടെ ടീമില് വലിയ ആത്മവിശ്വാസം വളര്ത്തി. പാര്ട്ടിയുടെ മുഖ്യ തന്ത്രജ്ഞന് അമിത് ഷായുടെ അടുത്ത സഹായികളില് ഒരാളാണ് ധര്മ്മേന്ദ്രപ്രധാന്. ഒരു കാലത്ത് നിര്ണായകമായ പെട്രോളിയം മന്ത്രാലയം കൈകാര്യം ചെയ്യുകയും ഇപ്പോള് വിദ്യാഭ്യാസത്തിന്റെ ചുമതല വഹിക്കുകയും ചെയ്ത ഒഡീഷ നേതാവ് വര്ഷങ്ങളായി ദുഷ്കരമായ സംസ്ഥാനങ്ങള്ക്കും കഠിനമായ തിരഞ്ഞെടുപ്പ് പോരാട്ടങ്ങള്ക്കും ബി.ജെ.പിയുടെ കൈത്താങ്ങായി മാറി.
ഹരിയാനയ്ക്ക് മുമ്പ്, 2017-ല് ഉത്തരാഖണ്ഡിലും 2022-ല് ഉത്തര്പ്രദേശിലും തിരഞ്ഞെടുപ്പ് തന്ത്രമൊരുക്കാന് ബിജെപി നിയോഗിച്ചത് അദ്ദേഹത്തെയായിരുന്നു. ഈ വര്ഷം ബിജെപി വിജയിച്ച സ്വന്തം സംസ്ഥാനമായ ഒഡീഷയായിരുന്നു അദ്ദേഹത്തിന്റെ ദീര്ഘകാല പദ്ധതി. 2021-ലെ പശ്ചിമ ബംഗാള് തെരഞ്ഞെടുപ്പില് അദ്ദേഹത്തിന് കിട്ടിയ ഏക അസൈന്റ്മെന്റ് അദ്ദേഹം വിജയകരമായി പൂര്ത്തിയാക്കിയിരുന്നു. സംസ്ഥാനത്തുടനീളം തൃണമൂല് കോണ്ഗ്രസ് ജയിച്ചു കയറിയാലും മുഖ്യമന്ത്രി മമത ബാനര്ജി തോല്ക്കണമെന്നതായിരുന്നു.
ഹരിയാനയില് അസംതൃപ്തരായ ഒന്നിലധികം വിഭാഗങ്ങളിലുമുള്ള -- ജാട്ടുകള്, കര്ഷകര്, പട്ടാളമോഹികള്, അഗ്നിവീര് പദ്ധതിയില് അതൃപ്തരായ സൈനികമോഹികള്, പാര്ട്ടി പ്രവര്ത്തകര് എന്നിവരെയെല്ലാം അദ്ദേഹം പിടിച്ചെടുത്തു. കോണ്ഗ്രസിന്റെ ഉയര്ന്ന പ്രചാരണത്തില് ഇളകിമറിഞ്ഞവരേയൂം ബിജെപിക്കുള്ളിലെ വിമതരെയുമെല്ലാം അദ്ദേഹം ഒതുക്കി. ഒരു മാസത്തിലേറെയായി ഹരിയാനയില് തമ്പടിച്ചായിരുന്നു പ്രചരണം. റോഹ്തക്, കുരുക്ഷേത്ര, പഞ്ച്കുള എന്നിവിടങ്ങളില് ക്യാമ്പുകള് സ്ഥാപിച്ചു.
പാര്ട്ടി പ്രവര്ത്തകരെയും നേതാക്കളെയും ശ്രദ്ധിച്ചും കേന്ദ്ര നേതൃത്വവുമായി അവര്ക്കുവേണ്ടി ആശയവിനിമയം നടത്തിയും അദ്ദേഹം നിലത്തുറപ്പിച്ചു. അദ്ദേഹം പ്രവര്ത്തകരെ ആവേശഭരിതരാക്കി, കോണ്ഗ്രസ് പ്രചാരണത്തെ അപകീര്ത്തിപ്പെടുത്തുകയും സ്ഥാനാര്ത്ഥി നിര്ണയത്തില് സഹായിക്കുകയും ചെയ്തു. ഗ്രൗണ്ട് സീറോയില് പോയി പ്രവര്ത്തനങ്ങള് നടത്തി.
ചെറിയ മീറ്റിംഗുകള് നടത്തും... പ്രവര്ത്തകരില് നിന്ന് തത്സമയം ഫീഡ്ബാക്ക് എടുക്കുകയും നേതൃത്വത്തെ അറിയിക്കുകയും പോരായ്മകള് ഉടന് പരിഹരിക്കുകയും ചെയ്യും. ഹരിയാനയിലെ രോഷാകുലരായ ആളുകളെ സമാധാനിപ്പിക്കുകയും ദുര്ബലമായ ബൂത്തുകള് തിരിച്ചറിയുകയും ശക്തരായ പ്രവര്ത്തകരെ ഇറക്കുകയും ചെയ്തു.
