കൊച്ചി : കൊച്ചിയില് പിടിയിലായ വിവാദ സിനിമാവ്യാജന്മാര് തമിഴ് റോക്കേഴ്സിന്റെ രണ്ടുപേര് ഇതുവരെ ചിത്രീകരിച്ചത് 33 സിനിമകള്. മുന്പും തെന്നിന്ത്യന് സിനിമകളുടെ വ്യാജ പതിപ്പ് നിര്മ്മിച്ച് പണം സമ്പാദിച്ച സംഘത്തിന്റെ ഭാഗമാണ് പിടിയിലായവരെന്നാണ് വിവരം. ടൊവീനോ നായകനായ എആര്എം സിനിമ റെക്കോഡ് ചെയ്തത് കോയമ്പത്തൂര് എസ്ആര്കെ തീയേറ്ററില് വെച്ചാണെന്നും വിവരം കിട്ടി.
തമിഴ്നാട് സത്യമംഗലം സ്വദേശികളായ കുമരേശും, പ്രവീണ് കുമാറും വ്യാജ പതിപ്പിറക്കാന് തമിഴ് സിനിമയായ വേട്ടയ്യന് ഷൂട്ട് ചെയ്ത് മടങ്ങവെയാണ് പൊലീസിന്റെ വലയില് വീണത്. ഇവര് വ്യാജനുണ്ടാക്കിയവയില് മലയാളം, തമിഴ്, കന്നട സിനിമകള് വരെയുണ്ട്. തീയേറ്ററുകളില് ഒളിക്യാമറ ഉപയോഗിക്കാന് പാകത്തിന് മദ്ധ്യഭാഗത്തെ സീറ്റുകള് ബുക്ക് ചെയ്യുന്നതടക്കം വന്കിട പ്ലാനുകളാണ് സിനിമയുടെ വ്യാജപതിപ്പിന് പിന്നിലുള്ളത്. തിയറ്ററിലെ റിക്ലൈനര് സീറ്റുകളാണ് സിനിമ ക്യാമറയില് പകര്ത്താന് തെരഞ്ഞെടുക്കുന്നത്.
ഇതില് കിടന്നുകൊണ്ട് ചിത്രീകരിക്കും. ക്യാമറ പുതപ്പിനുളളില് ഒളിപ്പിക്കും. സിനിമ ഷൂട്ട് ചെയ്യുന്നത് തീയേറ്ററിലെ മറ്റുള്ളവര് കാണാതിരിക്കാനും ചുറ്റുമുളളവര്ക്ക് സംശയം തോന്നാതിരിക്കാനും മുന്നൊരുക്കങ്ങളും സംഘം നടത്തും. അഞ്ചും ആറും പേര് ചേര്ന്നാണ് സിനിമയ്ക്ക് തീറേയറ്ററില് എത്തുക ചിത്രീകരിക്കുന്ന സീറ്റിന്റെ അടുത്തടുത്ത സീറ്റുകള് എടുക്കും. റിലീസ് സിനിമകള് ആദ്യം ദിവസം തന്നെ ഷൂട്ട് ചെയ്യുകയാണ് രീതി. തമിഴ്നാട്ടിലെയും ബംഗലൂരുവിലേയും തിയേറ്ററുകളാണ് തെരഞ്ഞെടുത്തത്.
തിയേറ്റര് ഉടമകള്ക്ക് ഇടപാടില് പങ്കുളളതായി അന്വേഷണത്തില് കണ്ടെത്തിയിട്ടില്ല. കോയമ്പത്തൂര് എസ് ആര് ക്കെ തിയേറ്ററില് വച്ചാണ് ഇവര് എ ആര് എം സിനിമ റെക്കോര്ഡ് ചെയ്തത്. ടെലഗ്രാമില് അപ്ലോഡ് ചെയ്ത് സിനിമ പ്രചരിപ്പിച്ചു. ടൊവിനോ തോമസ് നായകനായ എ ആര് എം തിയേറ്ററുകളിലെത്തിയ അന്ന് തന്നെ സിനിമയുടെ വ്യാജ പതിപ്പുമിറങ്ങിയിരുന്നു. ഇതേ തുടര്ന്ന് നിര്മ്മാതാക്കളുടെ പരാതിയില് ദ്രുതഗതിയില് അന്വേഷിച്ച കൊച്ചി സൈബര് പൊലീസ് ബാംഗ്ലൂരില് നിന്നാണ് പ്രതികളെ പിടികൂടിയത്.
