മൊബൈല് ഫോണുകള് പലപ്പോഴും മനുഷ്യ ജീവന് തന്നെ ഭീഷണിയായിത്തീരുന്ന അനേകം സാഹചര്യങ്ങള് നാം കണ്ടിട്ടുണ്ട്. കാരണം ഇവയുടെ ഉപയോഗം പലപ്പോഴും മനുഷ്യന്റെ ശ്രദ്ധയെ മാറ്റാറുണ്ട്. ചിലപ്പോള് പരിസരംപോലും നാം മറന്നുപോയെന്നുവരും. ഇതിന് ഉദാഹരണമാണ് റെയില്വേ ട്രാക്കില് ഉണ്ടാകുന്ന അപ്രതീക്ഷിതമായ അപകടങ്ങള്. ഫോണില് സംസാരിച്ച് റെയില്വേ ട്രാക്ക് മുറിച്ചുകടക്കുന്നതിനിടയില് നിരവധി ആളുകള്ക്കാണ് തങ്ങളുടെ ജീവന് നഷ്ടപ്പെട്ടിട്ടുള്ളത്. ഫോണില് സംസാരിക്കുമ്പോള് നമ്മളുടെ ശ്രദ്ധ സംസാരത്തില് മാത്രമായി പോകുകയും ചുറ്റും എന്ത് സംഭവിക്കുന്നു എന്നതില് ധാരണയില്ലാതെയും പോകുന്നതാണ് അപകടത്തിനാണ് കാരണം. അധികൃതര് എത്രയൊക്കെ നിര്ദ്ദേശം നല്കിയിട്ടും വീണ്ടും ഈ പ്രവണത തുടരുന്നതാണ് കാണുന്നത്.
അര്ജന്റീനയിലെ ബ്യൂണസ് അയേഴ്സില് നിന്നും സമൂഹ മാധ്യമങ്ങളില് പങ്കുവയ്ക്കപ്പെട്ട ഒരു വീഡിയോയില് സമാനമായ ഒരു അപകടത്തില് നിന്നും ആയുസിന്റെ ബലത്തില് രക്ഷപ്പെടുന്ന ഒരു യുവാവിനെ കാണാം. സിസിടിവി ദൃശ്യങ്ങളില് ഒരു യുവാവ് ഫോണില് സംസാരിച്ചുകൊണ്ട് റെയില്വേ ട്രാക്ക് മുറിച്ച് കടക്കുന്നതിന് കാണാം. പാളത്തിന്റെ നടക്കെത്തിയപ്പോഴാണ് തൊട്ടടുത്തെത്തിയ ട്രെയിന് ഇയാള് കാണുന്നത്. തുടര്ന്ന് ഇയാള് പിന്നിലേക്ക് നീങ്ങിയെങ്കിലും ദേഹത്ത് ട്രെയിന് തട്ടുകയും ഇതോടെ ഇയാള് പ്ലാറ്റ്ഫോമിലേക്്ക തെറിഞ്ഞ് വീഴുന്നതും ദൃശ്യങ്ങളില് കാണാം. യുവാവിന്റെ പരുക്കുകള് സാരമുള്ളതല്ലെന്ന് റിപ്പോര്ട്ടുകള് പറയുന്നു. അതേസമയം ഇയാള് മരണമുഖത്ത് നിന്നും അത്ഭുകരമായാണ് രക്ഷപ്പെട്ടതെന്ന് ദൃശ്യങ്ങളില് വ്യക്തം. ഒക്ടോബര് 15 ന് രാവിലെ ആറരയോടെയായിരുന്നു സംഭവം.
വീഡിയോ വൈറലയാതിന് പിന്നാലെ നിരവധി ആളുകള് കമന്റുകളുമായി രംഗത്തെത്തി. അതേസമയം പിന്നില് നില്ക്കുകയായിരുന്ന സ്ത്രീയെ നിരവധി പേര് വിമര്ശിച്ചു. യുവാവ് ഫോണുമായി നടന്ന് പോകുന്നത് അവര് കണ്ടിരുന്നെങ്കിലും അയാളെ തടയാന് ശ്രമിച്ചില്ലെന്ന് മാത്രമല്ല, യുവാവ് ട്രെയിനിടിച്ച് താഴെ വീണപ്പോള് അവര് ഒന്നു നോക്കാന് പോലും തയ്യാറായില്ലെന്ന് കുറിച്ചു. ' റോഡിലൂടെ നടക്കുമ്പോള് അച്ഛനമ്മമാര് പഠിപ്പിച്ച് തന്നത് ഓര്ക്കുന്നില്ലേ? ഇരുപുറവും നോക്കിനടക്കുക' ഒരു കാഴ്ചക്കാരന് എഴുതി.
