നെടുംകണ്ടം: ചെമ്മണ്ണാറില് മുത്തശ്ശിയോടൊപ്പം കാണാതായ നവജാത ശിശുവിനെ മരിച്ച നിലയില് കണ്ടെത്തിയ സംഭവം കൊലപാതകം. കുഞ്ഞിന്റെ അമ്മ ചെമ്മണ്ണാര് പുത്തന്പുരയ്ക്കല് ചിഞ്ചു (24), ചിഞ്ചുവിന്റെ മാതാപിതാക്കളായ ഫിലോമിന (64), ശലോമോന് (64) എന്നിവരെ പോലീസ് അറസ്റ്റു ചെയ്തു. രാത്രിയില് കുഞ്ഞ് കരഞ്ഞപ്പോള് ഭിന്നശേഷിക്കാരിയായ ചിഞ്ചു എടുത്തെറിഞ്ഞതാണു മരണ കാരണമെന്നു പോലീസ് പറഞ്ഞു.
കഴിഞ്ഞ ഓഗസ്റ്റ് പതിനാറിനായിരുന്നു സംഭവം. പ്രസവത്തിനായി സ്വന്തം വീട്ടിലെത്തിയതായിരുന്നു ചിഞ്ചു. ഇൗട്ടിത്തോപ്പ് ഇളംപുരയിടത്തില് സിജോയാണ് ചിഞ്ചുവിന്റെ ഭര്ത്താവ്. ഇവരുടെ രണ്ടു മാസം പ്രായമുള്ള കുഞ്ഞാണ് മരിച്ചത്. ചിഞ്ചുവും കുഞ്ഞും അമ്മ ഫിലോമിനയും ഒരു മുറിയിലാണു കിടന്നിരുന്നത്. സംഭവദിവസം പുലര്ച്ചെ ഫിലോമിനയെയും കുഞ്ഞിനെയും കാണാനില്ലെന്നു ശലോമോനാണ് നാട്ടുകാരെ അറിയിച്ചത്. തുടര്ന്ന് നടത്തിയ തെരച്ചിലില് സമീപത്തെ പുരയിടത്തില് നിന്നും കുഞ്ഞിന്റെ മൃതദേഹവും അബോധാവസ്ഥയില് ഫിലോമിനയെയും കണ്ടെത്തി.
മുന്പ് മരിച്ചു പോയ അയല്വാസി വിളിച്ചതിനെത്തുടര്ന്ന് കുഞ്ഞുമായി ഇറങ്ങിപ്പോയെന്നാണു ഫിലോമിന പറഞ്ഞത്. ഫിലോമിനക്ക് മാനസികാസ്വാസ്ഥ്യമുണ്ടെന്ന് ഭര്ത്താവ് പറഞ്ഞതിനെത്തുടര്ന്ന് കോലഞ്ചേരിയിലെ സ്വകാര്യ ആശുപത്രിയിലാക്കി. പോസ്റ്റുമോര്ട്ടത്തില് കുഞ്ഞ് മരിച്ചത് തലയ്ക്കേറ്റ പരുക്കിനെത്തുടര്ന്നാണെന്നു കണ്ടെത്തിയതിനെത്തുടര്ന്ന് പോലീസ് ചിഞ്ചുവിനെ ചോദ്യംചെയ്തെങ്കിലും തെളിവൊന്നും കിട്ടിയില്ല. സംശയം തോന്നിയ പോലീസ് ഫിലോമിനയെ കോലഞ്ചേരിയില് നിന്നും ഡിസ്ചാര്ജ് ചെയ്ത് കോട്ടയം മെഡിക്കല് കോളജില് പരിശോധനയ്ക്ക് വിധേയമാക്കി. ഇതില് മാനസിക പ്രശ്നങ്ങളില്ലെന്നു കണ്ടെത്തി. തുടര്ന്ന് മൂവരെയും പല തവണ ചോദ്യം ചെയ്തതോടെയാണ് കൊലപാതകത്തിന്റെ ചുരുളഴിഞ്ഞത്.
സംഭവം ദിവസം രാത്രി കുഞ്ഞ് വിശന്നു കരഞ്ഞപ്പോള് കുപ്പിപ്പാല് എടുക്കാനായി ഫിലോമിന അടുക്കളയിലേക്ക് പോയി. കരച്ചില് കേട്ട് അസ്വസ്ഥയായ ചിഞ്ചു കുഞ്ഞിനെയെടുത്തു ചുമരിലേക്ക് എറിയുകയായിരുന്നു. കുഞ്ഞിന് അനക്കമില്ലെന്ന് മനസിലായതിനെത്തുടര്ന്ന് ഫിലോമിനയും ഭര്ത്താവും ചേര്ന്നാണ് ഇത്തരത്തിലൊരു കഥ മെനഞ്ഞത്. ഉടുമ്പന്ചോല പോലീസിന്റെ നിരന്തരമായ ചോദ്യംചെയ്യലിനെ തുടര്ന്നാണ് മൂവരും കുറ്റം സമ്മതിച്ചത്. സ്പെഷ്യല് സ്കൂളില് പഠിച്ചിരുന്ന ചിഞ്ചുവിനെ വിവാഹജീവിതത്തിലേക്കു വിടരുതെന്ന് അധ്യാപകരും ഡോക്ടര്മാരും നിര്ദേശിച്ചിരുന്നതാണ്. ഇത് അവഗണിച്ചാണ് കല്യാണം നടത്തിയത്. അറസ്റ്റിലായ മൂവരെയും കോടതിയില് ഹാജരാക്കി റിമാന്ഡ് ചെയ്തു.
