മില്യണും ബില്യണും തന്നെ സാധാരണക്കാരായ മിക്കവര്ക്കും കൂട്ടിയെടുക്കാന് വലിയ പാടാണ്. അപ്പോഴാണ് ഡെസില്യന്റെ കണക്കുമായി റഷ്യ വന്നിരിക്കുന്നത്. സംപ്രേഷണാവകാശവുമായി ബന്ധപ്പെട്ട വിഷയത്തില് ആഗോള ടെക് ഭീമനായ ഗൂഗിളിന് റഷ്യ ചുമത്തിയ കണക്കാണ് മുകളില് പറഞ്ഞത്. റഷ്യയുടെ ഉക്രെയ്ന് അധിനിവേശത്തിന് മറുപടിയായി റഷ്യന് സര്ക്കാര് നടത്തുന്ന മീഡിയ ചാനലുകളെ തടയാനുള്ള പ്ലാറ്റ്ഫോമിന്റെ തീരുമാനത്തിന്റെ പേരില് ഗൂഗിളിന്റെ മാതൃ കമ്പനിയായ ആല്ഫബെറ്റിന്റെ ഉടമസ്ഥതയിലുള്ള യൂട്യുബിനാണ് പിഴയിട്ടത്.
‘20,000,000,000,000,000,000,000,000,000,000,000 ഡോളറാണ്’ അക്കത്തില് എഴുതുമ്പോള് പിഴത്തുക. യൂട്യൂബില് റഷ്യന് ഭരണകൂട പിന്തുണയുള്ള ചാനലുകള് തടഞ്ഞുകൊണ്ട് ഗൂഗിള് ദേശീയ പ്രക്ഷേപണ നിയമങ്ങള് ലംഘിച്ചുവെന്ന റഷ്യന് കോടതി വിധിയെ തുടര്ന്നാണ് പിഴ ചുമത്തിയത്. ഈ ചാനലുകള് പുനഃസ്ഥാപിക്കണമെന്ന് ആവശ്യപ്പെടുന്ന അധിക വിധിയിലൂടെ പിഴ കൂട്ടി. ഒമ്പത് മാസ കാലയളവിനുള്ളില് പ്ലാറ്റ്ഫോം പാലിക്കുന്നതില് പരാജയപ്പെട്ടാല് ഓരോ ദിവസവും പിഴ ഇരട്ടിയാക്കുകയും ചെയ്തു.
2022 മാര്ച്ചില്, ആര്ടി, സ്പുട്നിക് എന്നിവയുള്പ്പെടെ നിരവധി റഷ്യന് സ്റ്റേറ്റ് ഓപ്പറേറ്റഡ് ചാനലുകള്ക്ക് യൂട്യൂബ് ആഗോള നിരോധനം പ്രഖ്യാപിച്ചപ്പോള് മുതല് ഈ പ്രശ്നം പിന്തുടരുന്നു. അക്രമ സംഭവങ്ങളെ നിരാകരിക്കുകയോ ചെറുതാക്കുകയോ നിസ്സാരമാക്കുകയോ ചെയ്യുന്ന ഉള്ളടക്കത്തെ നിരോധിക്കുന്ന ഉള്ളടക്ക നയങ്ങള് ചൂണ്ടിക്കാട്ടിയാണ് ഗൂഗിള് ഇതിനെ ന്യായീകരിക്കുന്നത്. ആഗോളതലത്തില് 1,000-ലധികം ചാനലുകളും 15,000-ലധികം വീഡിയോകളും നീക്കം ചെയ്യുകയും ഉക്രെയ്ന് സംഘര്ഷത്തെ ചുറ്റിപ്പറ്റിയുള്ള റഷ്യയുടെ വിവരണങ്ങളെ പിന്തുണയ്ക്കുന്ന ചാനലുകള്ക്കെതിരെ പ്രത്യേക നയങ്ങള് നടപ്പിലാക്കുകയും ചെയ്തു.
ഈ നടപടിയാണ് റഷ്യയില് നിന്നുള്ള തിരിച്ചടിക്ക് കാരണമായിരിക്കുന്നത്. 2020 മുതല്, രണ്ട് പ്രമുഖ റഷ്യന് സ്റ്റേറ്റ് അഫിലിയേറ്റഡ് മീഡിയ ഔട്ട്ലെറ്റുകളായ സാര്ഗ്രാഡ്, റിയാഫാന് എന്നിവ തടഞ്ഞതിന് 100,000 റൂബിള്സ് (ഏകദേശം 1,028 ഡോളര്) പ്രതിദിന പിഴയില് തുടങ്ങി ഗൂഗിള് തുടര്ച്ചയായി പെനാല്റ്റികള് നേരിടുന്നു. റിപ്പോര്ട്ടുകള് പ്രകാരം, 17 റഷ്യന് പ്രക്ഷേപകര് ഗൂഗിളിനെതിരെ കേസുകള് ഫയല് ചെയ്യുകയും പ്ലാറ്റ്ഫോമില് അവരുടെ ചാനലുകള് പുനഃസ്ഥാപിക്കണമെന്ന് ആവശ്യപ്പെടുകയും ചെയ്തു.
2022-ന്റെ തുടക്കത്തില് ഉക്രെയ്നിലെ റഷ്യയുടെ പൂര്ണ്ണ തോതിലുള്ള അധിനിവേശത്തിന്റെ തുടക്കത്തെത്തുടര്ന്ന്, ഗൂഗിള് റഷ്യയ്ക്കുള്ളിലെ പ്രവര്ത്തനങ്ങള് വെട്ടിക്കുറച്ചിരുന്നു. യൂട്യൂബ്, ഗൂഗിള് സെര്ച്ച് തുടങ്ങിയ സേവനങ്ങള് റഷ്യന് അതിര്ത്തിക്കുള്ളില് നിലനിര്ത്തി. ഭാഗികമായിട്ടാണ് റഷ്യയില് ഗൂഗിള് പ്രവര്ത്തനങ്ങള് തുടരുന്നത്. റഷ്യന് ബ്രോഡ്കാസ്റ്റര്മാരോടുള്ള നിലപാട് പുനഃപരിശോധിക്കാന് ഗൂഗിളിനെ പ്രേരിപ്പിക്കാന് ഉദ്ദേശിച്ചുള്ള വലിയൊരു പ്രതീകാത്മക നടപടിയാണ് പിഴയെന്ന് ക്രെംലിന് വിശേഷിപ്പിച്ചു.
റഷ്യയ്ക്കുള്ളില് യൂട്യൂബ് ആക്സസ് ചെയ്യാവുന്നതാണെങ്കിലും, റഷ്യന് മീഡിയ ചാനലുകളെ നിയന്ത്രിക്കുന്നത് തുടര്ന്നാല് പ്ലാറ്റ്ഫോം പൂര്ണ്ണമായും ബ്ലോക്ക് ചെയ്യുമെന്ന് അധികൃതര് ഭീഷണിപ്പെടുത്തിയിട്ടുണ്ട്.
