വയനാട്: ദുന്തബാധിതര്ക്ക് ഭക്ഷ്യവിഷബാധയുണ്ടായ സംഭവത്തില് മേപ്പാടി ഗ്രാമപഞ്ചായത്തിന്റെ ഭാഗത്തിനിന്ന് ഗുരുതര വീഴ്ചയുണ്ടായി എന്നാരോപിച്ച് മേപ്പാടിയില് സിപിഎമ്മിന്റെ ശക്തമായ പ്രതിഷേധം. റോഡ് ഉപരോധിക്കുകയും വാഹനങ്ങള് തടയുകയും ചെയ്തു. പ്രതിഷേധക്കാരെ പോലീസ് തടഞ്ഞതോടെ ഉന്തും തള്ളുമാകുകയും പ്രവര്ത്തകരെ പൊലീസ് അറസ്റ്റ് ചെയ്ത് നീക്കുകയും ചെയ്തു.
കോണ്ഗ്രസ് ഭരിക്കുന്ന പഞ്ചായത്താണ് മേപ്പാടി. ഭക്ഷ്യവിഷബാധ ഉണ്ടായതിന് പിന്നാലെ സംഭവത്തില് അന്വേഷണം നടത്തിന് കളക്ടറോട് ആവശ്യപ്പെട്ടെന്ന് മന്ത്രി പി പ്രസാദ് വ്യക്തമാക്കി. ദുരന്തബാധിതര്ക്ക് വിതരണം ചെയ്ത സോയാബീന്സ് കഴിഞ്ഞ രണ്ടു കുട്ടികള്ക്കാണ് ഭക്ഷ്യ വിഷബാധയുണ്ടായത്. വയറുവേദനയും ഛര്ദ്ദിയും അനുഭവപ്പെട്ടതിനെ തുടര്ന്ന് ആശുപത്രിയില് എത്തിക്കുകയായിരുന്നു.
സിപിഐഎം പ്രവര്ത്തകരുടെ റോഡ് ഉപരോധത്തില് വാഹനങ്ങളുടെ നീണ്ട നിരയായതോടെ പ്രവര്ത്തകരെ മാറ്റാന് പൊലീസ് ശ്രമം തുടങ്ങി. എന്നാല് പിന്മാറാന് തയ്യാറാകാതെ നിന്ന പ്രവര്ത്തകര് ശക്തമായി പ്രതിരോധിച്ചതോടെയാണ് അറസ്റ്റ് ചെയ്തു നീക്കിയത്. മുണ്ടക്കൈ ചൂരല്മല ദുരന്തബാധിതര്ക്ക് പഴകിയ അരിയും മറ്റും വിതരണം ചെയ്തത് ഗുരുതരമായ പ്രശ്നം തന്നെയെന്നായിരുന്നു മുഖ്യമന്ത്രി പിണറായി വിജയന്റെയും പ്രതികരണം. അന്വേഷണം നടത്തുമെന്നും ഇത്തരം കാര്യങ്ങള് ഒരിക്കലും അനുവദിക്കില്ലെന്നും മുഖ്യമന്ത്രി പറഞ്ഞു.
ദുരന്തബാധിതര്ക്ക് സഹായം എത്തിക്കാന് സര്ക്കാരിന് സംവിധാനങ്ങളുണ്ട്. എന്നാല് ഇത് ആശ്ചര്യകരമാണ്. പ്രാദേശിക സര്ക്കാരാണ് പഴയ സാധനങ്ങള് വിതരണം ചെയ്തത് എന്നു കേള്ക്കുന്നു. അവ വിതരണം ചെയ്തതിന്റെ ഉദ്ദേശം എന്താണ്? പാവപ്പെട്ടവരെ സഹായിക്കാനാണോ അതോ മേന്മ കാണിക്കാന് നടത്തിയ നീക്കമാണോ എന്നും ചേലക്കരയില് യു ആര് പ്രദീപിന് വേണ്ടി എത്തിയ മുഖ്യമന്ത്രി ചോദിച്ചു.
