കഴിഞ്ഞ ദിവസങ്ങളില് സോഷ്യല് മീഡിയ വഴി ഏറ്റവും കൂടുതല് ചിരി പടര്ത്തിയ സംവിധായകനും അഭിനേതാവുമാണ് ബേസില് ജോസഫ്. കോഴിക്കോട് ഇ എം എസ് കോര്പറേഷന് സ്റ്റേഡിയത്തില് സൂപ്പര് ലീഗ് കേരളയുടെ ഉദ്ഘാടന പതിപ്പിന്റെ ഫൈനല് വേദിയില് നടന്ന സംഭവമാണ് ബേസിലിനെ എയറിലാക്കിയത്.
കാലിക്കറ്റ് എഫ്സി-ഫോഴ്സ കൊച്ചി മത്സരം കാണുന്നതിന് ഫോര്സ കൊച്ചിയുടെ ഉടമസ്ഥനായ നടനും സംവിധായകനുമായ പൃഥ്വിരാജും കാലിക്കറ്റ് എഫ്സിയുടെ ഉടമസ്ഥനായ ബേസില് ജോസഫും എത്തിയിരുന്നു. സമ്മാനദാന ചടങ്ങിനിടെ ഒരു കളിക്കാരന് ബേസില് കൈ കൊടുക്കാന് നീട്ടിയപ്പോള് അത് കാണാതെ പൃഥ്വിരാജിന് കൈ കൊടുത്ത് ആ താരം മടങ്ങിയ വീഡിയോ ക്രിക്കറ്റര് സഞ്ജു സാംസണ് സോഷ്യല് മീഡിയയിലൂടെ പങ്കിട്ടു. സഞ്ജു പങ്കിട്ട വീഡിയോ നിമിഷവേഗത്തില് വൈറലായി മാറുകയും ചെയ്തു, ബേസിലിനെ ട്രോളി നടന് ടൊവിനോ തോമസ് കമന്റിടുകയും ചെയ്തു.
അതിനു ശേഷം ഇതിനു മറുപടിയെന്നോണം ‘കൈ കിട്ടിയില്ലെങ്കിലും കപ്പ് കിട്ടി ഗയ്സ്’ എന്ന പോസ്റ്റുമായി ബേസിലും എത്തിയിരുന്നു. അതും സോഷ്യല് മീഡിയയിലൂടെ തരംഗമായി മാറി.
ഇപ്പോഴിതാ എയറിലായ ബേസില് ജോസഫിനെ വീണ്ടും എയറിലാക്കുകയാണ് കേരള പൊലീസ്. കുട്ടികളിലെ മാനസികസമ്മര്ദം ലഘൂകരിക്കുന്നതിനായി കേരള പൊലീസ് ആരംഭിച്ച ചിരി പദ്ധതിയുടെ പോസ്റ്ററിലാണ് ബേസില് ഇടം നേടിയത്. പോസ്റ്ററില് പൃഥ്വിരാജിനെ ചിരി ഹെല്പ് ലൈനായും ബേസിലിനെ മാനസിക സമ്മര്ദവുമായാണ് പൊലീസ് അവതരിപ്പിച്ചിരിക്കുന്നത്. ബേസിലിന് കൈകൊടുക്കാതെ മടങ്ങിയ കളിക്കാരനെയാകട്ടെ കുട്ടികള് എന്ന നിലയിലും അവതരിപ്പിച്ചു. ‘‘ചിരി'പദ്ധതി .... കുട്ടികളിലെ മാനസികസമ്മര്ദ്ദം ലഘൂകരിക്കാനായി പോലീസ് ആരംഭിച്ച പദ്ധതിയാണ് ചിരി. ചിരിയുടെ 9497900200 എന്ന ഹെല്പ് ലൈന് നമ്പരിലേക്ക് കുട്ടികള്ക്ക് മാത്രമല്ല അധ്യാപകരും മാതാപിതാക്കളും കുട്ടികളുടെ പ്രശ്നങ്ങളുമായി വിളിക്കാം...’’ എന്ന ക്യാപ്ഷന് നല്കിയാണ് കേരള പോലീസ് ഈ പോസ്റ്റര് പങ്കിട്ടിരിക്കുന്നത്.
നിമിഷ നേരം കൊണ്ട് കേരള പൊലീസിന്റെ പോസ്റ്റ് സോഷ്യല് മീഡിയയില് വൈറലായി. നിരവധി പേര് കമന്റുമായി എത്തി. ‘കേരള പൊലീസേ നിങ്ങളും’,‘ഇത് കാണുന്ന ബേസിലിന്റെ സമ്മര്ദം ആര് കുറയ്ക്കും’,‘ഒരു കുട്ടിയെ വേദനിപ്പിച്ചിട്ടാണോ മറ്റ് കുട്ടികളെ ചിരിപ്പിക്കുന്ന’തെന്നതടക്കമാണ് രസകരമായ കമന്റുകള്.
കേരള പൊലീസ് വളരെ രസകരമായി അവതരിപ്പിച്ച പോസ്റ്ററിന് കൈയടി നല്കുകയാണ് സൈബര് മീഡിയ. മുന്പും ഇത്തരത്തിലുള്ള പോസ്റ്ററുകളും തലക്കെട്ടുകളുമായി കേരള പൊലീസ് സോഷ്യല് മീഡിയയുടെ കൈയടി വാങ്ങിയിട്ടുണ്ട്.
