തിരുവനന്തപുരം: താന് ജില്ലാസെക്രട്ടറി ആയിരിക്കുമ്പോള് പാര്ട്ടിക്ക് അപമാനമുണ്ടാക്കാന് സഖാക്കളെ അനുവദിക്കില്ലെന്നും അവര് വഴിതെറ്റാനോ പാര്ട്ടിയെ ഒറ്റുകൊടുക്കാനോ അനുവദിക്കില്ലെന്ന് തിരുവനന്തപുരം ജില്ലാസെക്രട്ടറി വി. ജോയ്. മധുമുല്ലശ്ശേരിക്ക് ഏതു പാര്ട്ടിയിലേക്ക് പോകുന്നതിനും തടസ്സമില്ലെന്നും പാര്ട്ടിയുടെ തത്ത്വങ്ങളും മൂല്യങ്ങളും ബലികഴിക്കുന്ന തരം നിന്ദ്യവും നീചവുമായ ചില പ്രവൃത്തികള് കണ്ടതുകൊണ്ടാണ് സെക്രട്ടറി സ്ഥാനത്ത് നിന്ന് മധു മുല്ലശ്ശേരിയോട് ഒഴിയാന് പറഞ്ഞതെന്നും വി. ജോയ് പറഞ്ഞു.
മധു മുല്ലശ്ശേരിയെ പുറത്താക്കിയത് കൂട്ടായി എടുത്ത തീരുമാനമാണ്. പാര്ട്ടി വിരുദ്ധ നടപടികള്ക്ക് അനുവാദം കൊടുക്കാത്തതാണ് മധുവിന്റെ പ്രശ്നം. ഒഴിയാന് പറഞ്ഞപ്പോള് പക്ഷെ സ്ഥാനം ഒഴിയാന് കഴിയില്ലെന്നാണ് മധു മുല്ലശ്ശേരി പറഞ്ഞത്. ഏത് സഖാവിന്റെ ഭാഗത്ത് നിന്ന് പിശക് വന്നാലും തിരുത്താന് ആവശ്യപ്പെടും. തിരുത്താന് പറ്റാത്ത സാഹചര്യമാണെങ്കില് നിലപാടുകള് സ്വീകരിക്കേണ്ടി വരും.
ഇന്നലെ ചേര്ന്ന സിപിഐഎം ജില്ലാ സെക്രട്ടറിയേറ്റ് യോഗത്തിലാണ് മധു മുല്ലശ്ശേരിയെ പുറത്താക്കാനുളള തീരുമാനമെടുത്തത്. ജില്ലാ സെക്രട്ടറിയേറ്റ് തീരുമാനം സംസ്ഥാന കമ്മിറ്റി അംഗീകരിക്കുകയായിരുന്നു. മധു പാര്ട്ടി തത്വങ്ങള്ക്ക് വിരുദ്ധമായി പ്രവര്ത്തിച്ചതിനാലാണ് മധു മുല്ലശ്ശേരിയെ പുറത്താക്കിയതെന്ന് സിപിഐഎം തിരുവനന്തപുരം ജില്ലാ സെക്രട്ടറി വി ജോയ് വാര്ത്താ കുറിപ്പിലൂടെ നേരത്തെ അറിയിച്ചിരുന്നു. ഇന്ന് രാവിലെ മധു മുല്ലശ്ശേരി ബിജെപി പ്രവേശനം നടത്തുകയും ചെയ്തു.
