തിരുവനന്തപുരം: സ്കൂള് കലോത്സവത്തിലെ അവതരണഗാനത്തിന് നൃത്തം പഠിപ്പിക്കാന് ശ്രദ്ധേയയായ ഒരു നടി അഞ്ച് ലക്ഷം രൂപ പ്രതിഫലം ആവശ്യപ്പെട്ടതായി മന്ത്രി വി ശിവന്കുട്ടി. ജനുവരിയില് നടക്കുന്ന സംസ്ഥാന സ്കൂള് കലോത്സവത്തില് 16,000 കുട്ടികളെ പങ്കെടുപ്പിച്ച് അവതരണഗാനത്തിനുള്ള നൃത്തം അവതരിപ്പിക്കാനായിരുന്നു നടിയെ സര്ക്കാര് ക്ഷണിച്ചത്.
നടിക്ക് പണത്തോട് ആര്ത്തിയും അഹങ്കാരവുമാണെന്നും വന്നവഴി മറക്കരുതെന്നും വിദ്യാഭ്യാസമന്ത്രി ആവശ്യപ്പെട്ടു. സ്കൂള് കലോത്സവത്തിലൂടെ മികച്ച കലാകാരിയാവുകയും അതുവഴി സിനിമയിലെത്തി വലിയ നിലയിലാവുകയും ചെയ്ത നടിമാരില് ചിലര് കേരളത്തോട് കാണിക്കുന്നത് അഹങ്കാരമാണെന്നും ശിവന്കുട്ടി പറഞ്ഞു. എന്നാല് നടിയുടെ പേര് വെളിപ്പെടുത്താന് മന്ത്രി തയ്യാറായില്ല.
അവതരണ ഗാനത്തിന് വേണ്ടി, നടിയോട് കുട്ടികളെ പത്ത് മിനിറ്റ് ദൈര്ഘ്യമുള്ള നൃത്തം പഠിപ്പിക്കാമോയെന്ന് ചോദിച്ചിരുന്നു. അതിന് അവര് സമ്മതിക്കുകയും ചെയ്തു. എന്നാല് അഞ്ച് ലക്ഷം രൂപ പ്രതിഫലം ചോദിച്ചത് വേദനിപ്പിച്ചു. ഇത്രയും വലിയ തുക നല്കി കുട്ടികളെ സ്വാഗതഗാനം പഠിപ്പിക്കേണ്ടെന്നും തീരുമാനിച്ചു.
ഇത്തരക്കാര് പിന്തലമുറയിലുള്ള കുട്ടികള്ക്ക് മാതൃകയാകേണ്ടവരാണ്. കുറച്ചുസിനിമയും കുറച്ച് കാശും ആയപ്പോള് കേരളത്തോട് അഹങ്കാരം കാണിക്കുകയാണ്. കേരളത്തിലെ 47 ലക്ഷം വിദ്യാര്ത്ഥികളോടാണ് ഈ നടി അഹങ്കാരം കാണിക്കുന്നതെന്നും വി ശിവന്കുട്ടി പറഞ്ഞു.
