തിരുവനന്തപുരം: നടിയെ ആക്രമിച്ച കേസില് നീതി തേടി രാഷ്ട്രപതിക്ക് കത്തയച്ച് അതിജീവിത. മെമ്മറി കാര്ഡിലെ നിയമവിരുദ്ധ പരിശോധനയുമായി ബന്ധപ്പെട്ട് അന്വേഷണം അട്ടിമറിക്കപ്പെട്ടതായി ചൂണ്ടിക്കാണിച്ചാണ് പരാതി നല്കിയിരിക്കുന്നത്. ജുഡീഷ്യല് ഓഫീസര്മാരും ഉദ്യോഗസ്ഥരും കുറ്റക്കാരായ കേസില് ക്രിമിനല് നിയമപ്രകാരം നടപടിയെടുക്കണമെന്നാണ് ആവശ്യപ്പെട്ടിരിക്കുന്നത്.
അന്വേഷണ റിപ്പോര്ട്ടില് ഇതുവരെ നടപടി ഉണ്ടായിട്ടില്ലെന്നും വകുപ്പുതല നടപടിയില് ഒതുക്കാന് നീക്കം നടക്കുന്നതായും ചൂണ്ടിക്കാട്ടി കുറ്റക്കാര്ക്ക് എതിരെ നടപടി എടുക്കണമെന്നാണ് ആവശ്യം. ജുഡീഷ്യല് ഓഫീസര്മാരും ഉദ്യോഗസ്ഥരും കുറ്റക്കാരെന്ന് അന്വേഷണത്തില് കണ്ടെത്തി. ഹൈക്കോടതിക്കും സുപ്രീം കോടതിക്കും നല്കിയ പരാതിയില് പോലും നടപടി ഉണ്ടായിട്ടില്ലെന്ന് ചൂണ്ടിക്കാണിച്ചിട്ടുണ്ട്.
നടിയെ ആക്രമിച്ച കേസിലെ തെളിവായ പീഡന ദൃശ്യങ്ങളടങ്ങിയ മെമ്മറി കാര്ഡ് നിയമ വിരുദ്ധമായി മൂന്ന് കോടതികളില് പരിശോധന നടന്നതായി നേരത്തേ റിപ്പോര്ട്ടുകള് പുറത്തുവന്നിരുന്നു. മെമ്മറി കാര്ഡ് സംബന്ധിച്ച അന്വേഷണം നടത്തി ഹൈക്കോടതിയില് സമര്പ്പിക്കപ്പെട്ട റിപ്പോര്ട്ടില് 2018 ജനുവരി 9-ന് മെമ്മറി കാര്ഡ് നിയമ വിരുദ്ധമായി അങ്കമാലി മജിസ്ട്രേറ്റ്, ജില്ലാ പ്രിന്സിപ്പള് സെഷന്സ് കോടതി ബെഞ്ച് ക്ലാര്ക്ക് എന്നിവര് കണ്ടതായും ശിരസ്തദാറിന്റെ ഫോണില് ദൃശ്യങ്ങള് വന്നതായുമാണ് റിപ്പോര്ട്ടിലുള്ളത്.
അങ്കമാലി മജിസ്ട്രേറ്റ് മെമ്മറി കാര്ഡ് പരിശോധിച്ചത് രാത്രി 9.58-നാണെന്നും കണ്ടെത്തിയിരുന്നു. ജില്ലാ പ്രിന്സിപ്പള് സെഷന്സ് കോടതി ബെഞ്ച് ക്ലാര്ക്ക് മഹേഷ് മോഹനന് 2018 ഡിസംബര് 13ന് രാത്രി 10.58നുമാണ് മെമ്മറി കാര്ഡ് പരിശോധിച്ചതെന്നും റിപ്പോര്ട്ടിലുണ്ടായിരുന്നു.
മെമ്മറി കാര്ഡ് ഉപയോഗിച്ചത് ശിരസ്തദാര് താജുദ്ദീന്റെ വിവോ ഫോണിലാണെന്നും അന്വേഷണ റിപ്പോര്ട്ട് പറയുന്നു.
