സോഷ്യൽ മീഡിയയ്ക്ക് ഏറെ സുപരിചിതരാണ് നടനും രാഷ്ട്രീയ നേതാവുമായ കൃഷ്ണകുമാറും ഭാര്യ സിന്ധു കൃഷ്ണയും മക്കളുമെല്ലാം. അച്ഛനോളം തന്നെ പ്രശസ്തരാണ്, മക്കളായ അഹാന, ദിയ, ഇഷാനി, ഹൻസിക എന്നിവരും. ഇപ്പോഴിതാ 30-ാം വിവാഹ വാർഷികം ആഘോഷിക്കുകയാണ് കൃഷ്ണകുമാറും സിന്ധു കൃഷ്ണയും.
വിവാഹ വാർഷികത്തോടു അനുബന്ധിച്ച് സിന്ധു കൃഷ്ണ പങ്കുവച്ച ചിത്രങ്ങളാണ് ശ്രദ്ധ നേടുന്നത്.30 വര്ഷം, 12/12/ 1994 എന്നായിരുന്നു ചിത്രത്തിന് ക്യാപ്ഷന് നല്കിയത്. വിവാഹ ചിത്രവും പങ്കുവെച്ചിരുന്നു.
ഇണക്കണങ്ങളും പിണക്കങ്ങളുമൊക്കെയായി സന്തോഷകരമായ ദാമ്പത്യമാണ് ഞങ്ങളുടേതെന്ന് കൃഷ്ണകുമാറും സിന്ധുവും മുന്പ് പറഞ്ഞിരുന്നു. സ്വന്തമായ കഴിവില് ഒന്നും നേടിയില്ല, എല്ലാം വന്ന് ഭവിച്ചതാണ്, എന്നും ദൈവത്തിനോട് നന്ദി പറയാറുണ്ടെന്നും മുന്പ് കൃഷ്ണകുമാര് പറഞ്ഞിരുന്നു.
കോളേജില് പഠിച്ചിരുന്ന സമയത്തായിരുന്നു സിന്ധു കൃഷ്ണകുമാറിനെ പരിചയപ്പെടുന്നത്. വിവാഹ ആലോചനകള് തുടങ്ങിയ സമയത്താണ് പ്രണയത്തെക്കുറിച്ച് വീട്ടില് പറഞ്ഞത്. മക്കളുടെ താല്പര്യം മനസിലാക്കിയ മാതാപിതാക്കള് വിവാഹം നടത്തുകയായിരുന്നു.
വീട്ടുകാര് പെട്ടെന്ന് തന്നെ വിവാഹം തീരുമാനിച്ചതിനാല് വേണ്ടത്ര തയ്യാറെടുപ്പുകള് നടത്താന് സമയം കണ്ടെത്തിയിരുന്നില്ലെന്ന് ഇരുവരും പറഞ്ഞിരുന്നു. കുടുംബത്തിന്റെ പിന്തുണയാണ് എന്നും തങ്ങളെ നയിക്കുന്നത്. വിവാഹം കഴിഞ്ഞ് വൈകാതെ തന്നെ അമ്മയായെന്നും സിന്ധു കൃഷ്ണ പറഞ്ഞിരുന്നു.
വിവാഹ വീഡിയോയും ചിത്രങ്ങളുമെല്ലാം സിന്ധുവും കൃഷ്ണകുമാറും സോഷ്യല്മീഡിയയിലൂടെ പങ്കിട്ടിരുന്നു. അധികം ആര്ഭാടങ്ങളൊന്നുമില്ലാതെയായിരുന്നു വിവാഹം. വരുന്നവരോടെല്ലാം വിവാഹത്തിന് വരണമെന്ന് പറഞ്ഞ് ക്ഷണിച്ച് മടുത്തിരുന്നുവെന്നും സിന്ധു പറഞ്ഞിരുന്നു.
ഇന്നത്തെ പോലെ ഹല്ദിയോ, സംഗീതോ ഒന്നും ഇല്ലായിരുന്നു അന്ന്. ആഭരണങ്ങളും മുല്ലപ്പൂവും നല്ല പട്ടുസാരിയുമൊക്കെയായിരുന്നു അന്നത്തെ നവവധുവിന്റെ അലങ്കാരങ്ങള് എന്നും സിന്ധു കൃഷ്ണ പറഞ്ഞിരുന്നു.
അഹാനയിലൂടെയാണ് പേരന്റിംഗ് പഠിച്ചത്. നിസാര കാര്യങ്ങള്ക്ക് പോലും ടെന്ഷനടിക്കുമായിരുന്നു ആദ്യം. പിന്നീടാണ് അതൊക്കെ മാറിയത്. വിവാഹം അവരവരുടെ തീരുമാനമാണെന്നും, സമയമാവുമ്പോള് അവര് തന്നെ നടത്തിക്കോളുമെന്നും ഇരുവരും പറഞ്ഞിരുന്നു.
അടുത്തിടെയായിരുന്നു ദിയ കൃഷ്ണ വിവാഹിതയായത്. കുടുംബത്തിലെ ആദ്യ വിവാഹം തന്റേതായിരിക്കുമെന്ന് നേരത്തെ ദിയ പറഞ്ഞിരുന്നു. രണ്ട് വര്ഷത്തെ പ്രണയത്തിനൊടുവിലായാണ് ദിയയും അശ്വിനും വിവാഹിതരായത്. വിവാഹ വിശേഷങ്ങളെല്ലാം വ്ളോഗിലൂടെ പങ്കിട്ടിരുന്നു.
